Ngwetu wamono ou mumbanda ali muchikupulo, ndi vati?— Napu mwana waumo munalume walithzina lya Njefeta. Mbimbiliya kuituleketha lithzina lyou mumbanda. Oloni tuthzivuka ngwetu chuma chanangwile kulinga chathzivithile vaishe na Yehova kuvwaha. Vandamena tulilongethe vyalingiwile kuli ikeye na vaishe va Njefeta.

Njefeta wapwile munalume wamuvwa. Cho wakele na thimbu yaingi yakulongetha munendi vya Yehova. Wapwile lalo ntwama wakukanyama. Ngechi vaIsalele vamulombele ngwavo avatwamenene kulwitha vitothzi vavo.

Njefeta walombele vukwathi kuli Njambi. Wakulahethele ngwendi nga akahyana cho akana Yehova munu akalivanga kumushesha kutunda ku ndthzita. Ou munu nethi kukakala na kupanga mu mbalaka ya Njambi muvuyoye vwendi vwoshe. Mbalaka yapwile njuvo omwo vanu vakele  nakulombelela Njambi kunima. Chilivene Njefeta wahyanene mu ndthzita! Uthzivuka munu walivangele kumushesha omwo welukile kwimbo ndi?—

Unakumbulula mwamuvwa, wapwile muna Njefeta wa mumbanda! Echi chathzivithile Njefeta shwamwa manene. Mwafwa ikeye umolika wapwile munendi. Cho Njefeta wapandele kumutwala kweka. Oloni anuka ngwove Njefeta wakulahethele Njambi. Ohovene munendi wendekele ngwendi, ‘Tate, mwakulahethele Yehova, cho mutela kulinga ngocho.’

Muna Njefeta nendi wathzivile kuvihya ku mbunge. Mwafwa okwo ku mbalaka nethi kukatumbamene kwakujeneka kushomboka na kukala na vana. Oloni watondele manene kushulithilila chikulahetho cha vaishe mangana athzivithe Yehova kuvwaha. Ocho chikecho chakele manene kumbunge yendi kutuvakana kushomboka nambe kukala na vana. Ngechi wajalukile kukakala ku mbalaka muvuyoye vwendi vwoshe.

Uthinganyeka ngwove chuma chanalingile ou muna Njefeta cha thzivithile vaishe na Yehova kuvwaha ndi?— Chili vene! Chavathzivithile kuvwaha. Nove vene nga uthingimika na kuthzema Yehova ngwe muna Njefeta, uthzivitha vithemi vove na Yehova kuvwaha.