Umona vati, kwapwa kwakwathi thimbu yoshe kwononoka ku vithemi vove ndi?— Thimbu imo, kukapu kwakukalu. Uthzivuka ngwove Yesu wononokele kuli Yehova na vithemi vendi ndi?— Kulilongetha vyendi kukukwatha kwononoka ku vithemi vove nambe ngwavo kukapu kwakukalu. Vandamena tulilongethe eyi ñanda mwamuvwa.

Thimbu kanda achije hano hathi, Yesu wakele mwilu na Ishe Yehova. Oloni Yesu, wakele nawa na vithemi hano hathi. Mathzina avo apwile Yosefa na Maliya. Uthzivuka muchethzililile mangana vapwe vithemi vendi?—

Yehova wanungulwile vuyoye vwa Yesu kutunda mwilu nakuvwaka mwimo lya Maliya mangana Yesu athemukile hano hathi. Echi chapwile chuma chakukomowetha! Yesu wakele mwimo lya Maliya ngwe muchikafu ku vimbututu voshe muvakakolo mumemo a vainavo. Cho hanima ya vingonde 9, Yesu wathemukile. Omwo mukemwo muchethzilile mangana Maliya na munalume wendi Yosefa vapwe vithemi va Yesu vahano hathi

Mwakele na myaka 12 yakuthemuka, Yesu walingile chuma chije chamwethele chithzemo chendi chakama kuli Ishe Yehova. Chalingiwile omwo Yesu navamu nanga yendi vakutile vungendthzi vwavulaha, kuya ku Yelusalema ku chiwano cha Pasovala. Muvelukile kwimbo, Maliya na Yosefa kuvamwene Yesu ha chendo. Uthzivuka kwathalele Yesu?—

Yosefa na Maliya velukile vwathi-vwathi ku Yelusalema na kukatonda-tonda Yesu. Valijujukilile manene mwafwa kuvamuwanene. Oloni hanima ya matangwa atatu, vamuwanene mutembele! Uthzivuka vyanenethele ngwavo Yesu akale ku tembele?— Mwafwa kukekwo kwakele nakulilongethela vya Ishe, Yehova. Wathzemene manene Yehova cho washakele kumuthzivitha kuvwaha. Yesu wononokele thimbu yoshe kuli Yehova, nambe ngwavo kwapwile kwakukalu kulinga ngocho. Yesu wononokele lalo kuli Yosefa na Maliya ndi?— Eyo, na Mbimbiliya yendeka ngwayo wononokele.

Vika viulilongetha kuli Yesu?— Unapande kwononoka ku vithemi vove nambe ngwavo kethi kwakwathi kulinga ngocho. Wononoka oni indi vati?—