Achithinganyeke ha chakumwenako echi: Tim ali na kweha na vakwavo, cho mwanasha mbola kuma ikatulila ha njanena yambala na kutavuka.

Ngwe yove Tim, ngwe unalingi vati?

WATHA KWANGULA VINGILA VINO VITATU:

1. Utewa.

2. Uvangeya mukweni.

3. Uleka vavenya vyuma vyoshe vinalingiwa na kuvakulahetha kuvalandela njanena yeka.

Unatha kwangula Ngila ya A. Oloni kulitavela vyuma viunaviyitha kwapwa kwakuvwa manene, ipwe kutavula njanena yambala nambe vyuma vyeka.

1. Kunapu kwakuvwa kulinga ngocho.

   Mbimbiliya ngwayo: “Tushaka kulinga chuma cha vuthunga thimbu yoshe.”—VaHevelu 13:18.

2. Vanu vakathambetha vaje valitavela vuvi vwavo.

   Mbimbiliya ngwayo: “Uje ashweka vuvi vwendi kakavethzika, oloni uje alitavelavwo nakuvuthethza Njambi akamuthzivila mema ku mbunge.”—Vithimo 28:13.

3. Njambi akathzivi kuvwaha ku mbunge.

   Mbimbiliya ngwayo: “[Yehova] wathzinda vaka-kulinga vuvi, wakulahela vaka-kuthungama.”—Vithimo 3:32.

Karina, mumbanda wa myaka 20 wa ku United States, washwekelele vaishe mulonga uvamwanene wa kwendetha munyau mwamuvi. Oloni kathele kuvashwekelawo ha thimbu yailaha. Karina ngwendi: “Omwo mwetile mwaka umo lika, vatate vathzivukile mulonga unjalingile wa kwendetha munyau mwamuvi. Ngechi njakele mu vukalu vwakama manene.”

Vika vyanalilongetheleho? Karina wendekele ngwendi: “Kushweka mulonga kukavwethzelela lika ku vukalu, mwafwa hanga unapande kuufweta.”

Mbimbiliya ngwayo: “Yetu voshe vithimbu vyavingi tukaviyitha.” (Yakomba 3:2) Ngwe mutunamono, kulitavela milonga yetu oho vene kumwetha ngwavo tunakolo, cho twapwa lalo tu va kulikehetha.

Unapande kulilongetha ku vyuma viunathevuka. Vera wendekele ngwendi: “Thimbu yoshe yoshe injithevuka, njikalilongethaho chuma chimo chije chinjikwatha kupwa munu wamuvwa na kulinga vyuma mu ngila yaivwa.” Kenga muwatha kulingila ngocho.

 Unalombo kinga ya vaisho, cho mu kuyendetha unaithsiyi. Ulinga vati?

• Woloka lika kulu na kuthinganyeka ngwove hamo vaisho kuvaimono.

• Uleka vaisho vyuma vinalingiwa.

• Uleka vaisho vyuma vinalingiwa na kutwika munu weka mulonga.

Unonowa vyetheko vya ku sikola, mwafwa kuwakele na kutanda. Ulinga vati?

• Wendeka ngwove vyetheko vyacho kuvyendele vwino.

• Ulitavela omwo unonowa vyetheko.

• Utwika mulongethi wove mulonga.

Achithinganyeke ha vyakumwenako evi vitunendeka, cho lyake mu mwela wa (1) vaisho (2) mulongethi wove. Vika vivathinganyeka vaisho na mulongethi wove nga unalitavela mulonga wove? Vakuthinganyekela vika nga ushweka mulonga wove?

Kumbulula evi vihula vinatako omwo uthinganyeka ha mulonga umo uwalingile mwakawali.

Mulonga muka uwalingile? Cho walingile vati?

• Njinaushwekele.

• Njatwikile mukwetu mulonga.

• Njalitavelelewo.

Nga kuwalitavelele mulonga wove, cho walithzivile vati?

• Njavwahelele mwafwa njaujenjukile.

• Njalipayele ngwange ngwe njendekele vuthunga.

Ngila muka yeka iwapandele kumanethelamo ou mulonga?

Vika viwalilongethele ha mulonga wove?

Vanu vakashwekela vika milonga yavo nga vanathevuka?

Vanu va kumona vati nga ukashweke milonga yove thimbu yoshe? oloni vanu va kumona vati nga ulitavela milonga yove?—Luka 16:10.