Achithinganyeke ha chakumwenako echi: David ali na kwenda vuthsiki, cho nakawashumukila ku mwela uje kathzivuka. David ananguka ngwendi nathzimbala, hamo nathethze ngila yanapandele kwita.

Ngwe yove David, ngwe ulinga vati

Watha kulinga vyuma vino:

1. Wihula vanu.

2. Upangetha chimuniko.

3. Utwalelelaho kwenda mu kuthinganyeka ngwove hamo uwana ngila iunathethzele.

Ngila ya mu chitatu kuikukwatha.

Ngila ya mu chivali yaivwa kutuvakana ya kulivanga, mwafwa uli na chimuniko chije chinapande kukukwatha omwo wenda vuthsiki.

Mbimbiliya nayo yatha kukukwatha mu chifwa echi.

Eli livulu lya kuthsimana lyatha

• kukutwamenena mu vukalu vuuliwana navwo mu kuyoya

• kukukwatha ulithzivuke yove vavenya na kupwa u munu wamuvwa

• kukukwatha uyoye mwamuvwa

Kushwa ku vwanike, tukehula vihula.

• Mwafwa vika lilu lyapwa lya kuthzivuluka?

• Vingongonothi vavitangele vati?

Omwo tuya na kukola, tukehula ha vyuma vitukamono mu kaye.

• Mwafwa vika vyuma vyavivi vikalingiwa?

• Vika vivakathsila vanu?

Mulinga vati nga vamileka ngwavo vikumbululo muvyakala mu Mbimbiliya?

Vanu vavangi vathinganyeka ngwavo Mbimbiliya yapwa livulu lya kulaja, cho veka ngwavo yaikalu kuithzivithitha. Mbimbiliya ikeyo yaikalu indi vanu vakevo vamona Mbimbiliya mu ngila ya kuhenga? Vavalekele vyuma vya makuli ha Mbimbiliya ndi?

Chakumwenako, vanu vakathinganyeka ngwavo Njambi ikeye ali na kuyula kano kaye. Kuma mukemwo vene ndi? Kano kaye kali mu vukalu vwakama. Mu kaye muli vyuma vyavivi manene, vya kufwa ngwe tuyando na mishongo na kuthsa na vuhutu na vimonde. Njambi wa chithzemo atha kunena vati evi vyuma vyavivi?

Ushaka kuthzivuka muvakumbulwila echi chihula ndi? Unatha kukomoka kuthzivuka viyendeka Mbimbiliya hali uje ali na kuyula kaye.

Unananguka ngwove vyoshe vivanathimutwiya muno mu mukanda vinemana ha Mbimbiliya. Vakaleho va Yehova vakulahela ngwavo Mbimbiliya ikeyo lika yatha kuvatwamenena. Vakulahela ngocho, mwafwa ‘vaihwimininine kuli Njambi, ngechi ili na theho mu kulongetha vuthunga, mu kwendekela na mu kuthungametha.’ (2 Timateo 3:16, 17) Unapande kutanda eli livulu lya kulaja, oloni lyatha kumanetha vukalu vwove.