Achithinganyeke ha chakumwenako echi: Karen mukweta ku chilika. Cho athziva lijwi lya mundambo munima yendi.

Karen ngwendi atenguluke, amona kavuthamba kendi Jessica nakwata mitumwa ivali ya kufukula laja. Karen nananguka ngwendi mu mitumwa muli vwala. Jessica ana Karen mutumwa umo wa vwala na kumuleka ngwendi, “Nove watha kunwa vwala, mwafwa wakolo.”

Karen ashaka kuvyana, oloni lalo ali na kuthziva shwamwa. Karen kashaka kavuthamba kendi athinganyeke ngwendi shendi kunwa. Cho lalo Jessica wapwa mumbanda wamuvwa. Nga anwa vwala, cho kukwavihile. Karen ayongola ngwendi, ‘Kunwa vwala kunalithethze na kunwa vumbanda vwa kupendetha.’

Ngwe yove Karen ngwe unalingi vati?

Unapande kuthzivuka chifwa chove mangana wangule mwamuvwa vya kulinga. Chifwa cha munu chapwa chuma chije chimukwatha athzivuke mwafwila na vyuma vyanapande kulinga. Kukala na mana a chifwa echi kukukwatha ukale na ndthzili ya kulyangwila vya kulinga kutuvakana vakweni vakwangwile vya kulinga.—1 Kolinte 9:26, 27.

Watha kukala vati na ndthzili ya kulyangwila vya kulinga? Kuthzivuka muvakumbulwila evi vihula vinatako, kukukwatha ukale na ndthzili ya kwangula vya kulinga.

Kuthzivuka hayalenga ndthzili yove na vifwa vyove vyavivwa kwatha kukukanyametha.

MWANJA WA MU MBIMBILIYA: Kapositolo Paulu wathonekele ngwendi: “Nambe njinapu wa mundondo ha kwendeka, oloni mwa vuthunga vene kethi mu mana embwe.” (2 Kolinte 11:6) Paulu wathzivukile Vithoneka, ngechi wakolethele omwo vakwavo vamwethekele. Kechelele vyendeka vyavivi vya vakwavo vithzeyethe likulahelo lyendi.—2 Kolinte10:10; 11:5.

LILULE YOVE VAVENYA: Thoneka chashu nambe vwana vuwakala navwo.

Lumbununa chifwa chove chiwashaka. (Chakumwenako, waka vakweni mbunge ndi? U muka-kwana ndi? Vakukulahela ndi? Ukanyungu thimbu ndi?)

Lilyenge lyatha kumbitukila haje halinathzeyela, ngechi futithi yove yaivwa yatha kuvihya nga wechelela vyuma vyavivi kukuthzeyetha.

MWANJA WA MU MBIMBILIYA: Paulu wathzivukile vuthzeye vwendi. Ngechi wathonekele ngwendi: “Omwo njivwahelela mu lishiko lya Njambi mukati ka muvila wange. Oloni njimona lishiko lyeka lili na kupanga mu muvila wange, lishiko lije lili na kulwitha lishiko lije linjinatava mu mbunge yange. Linanjipwitha chindthzinda cha lishiko lya vuvi.”—Loma 7:22, 23.

LILULE YOVE VAVENYA: Unapande kupangela ha vuthzeye muka?

Watha kulonda mu munyau na kuleka ndilaiva ngwove lithzenge mu mikwakwa kweta noho hawahwila mathzi ndi? Kuwatha kulinga ngocho.

Vika ulilongethaho? Vilengo vyatha kukukwatha wonwe kulithzenga mu kuyoya kwove. Uli nevi vya kulinga, cho lalo uthzivuka mwakuvilingila.

MWANJA WA MU MBIMBILIYA: Paulu wathonekele ngwendi: “Njili na kushatuka na kushungametha ku mamanethelelo.” (1 Kolinte 9:26) Paulu kongumukile na vyuma vyeka, oloni walyakelele chilengo na kuyoya mu kulitombola na vyuma vyalyangwilile.—Filipu 3:12-14.

LILULE YOVE VAVENYA: Thoneka vilengo vitatu viushaka kushulithilila mwaka wijaho.

Nga kuukulahela vimo, cho nevi vyavivwa viulinga vyahi. Upwa ngwe chongono mangana ulifwe na vakweni. Echi chimwetha ngwavo kuwalithzivukile muwafwa.

Oloni nga uli nevi viwakulahela, cho ulinga vyuma mu ngila yaivwa nameme vakweni valinga vyuma vyavivi.

MWANJA WA MU MBIMBILIYA: Nameme kapolofweto Ndanyele wapwile mwanike, cho lalo wakele kulako na nanga yendi na vakwavo vaka-kulemetha, oloni “wayongwele mu mbunge” yendi ngwendi athingimika mashiko a Njambi. (Ndanyele 1:8) Echi chamukwathele alinge vyuma mu vuthunga. Ndanyele wayoyele mu kulitombola na vyuma vyakulahelele.

LILULE YOVE VAVENYA: Vika viwakulahela? Chakumwenako: Wakulahela Njambi ndi? Nga mukemwo, cho mwafwa vika? Vukaleho muka vunakukwatha ukulahele ngwove Njambi kwali?

Wakulahela ngwove mashiko a Njambi atha kukukwatha ndi? Nga mukemwo, cho mwafwa vika?

Ushaka kufwa ngwe liputa lije lipekumukila noku noku na lihundthzi, indi ushaka kufwa ngwe muti uje kuwatha kuwa na lihundthzi lyakama? Litakamethe, cho ufwa ngwe uje muti. Nga ulinga ngocho, cho watha kukumbulula chihula chendeka ngwavo Njafwa vati?