CIHULA 3
Njatha Kulithzivathana Vati na Vithemi Vange?
ULINGA VATI?
Achithinganyeke ha chakumwenako echi: Lya mu chitatu, ku vuthsiki, Geoff wa myaka 17 namanetha vipangi vya ha njuvo. Cho ashwameka TV na kutumbama mu chitumbamo chendi chathzema mangana alithzime vuli.
Ha thimbu eyi, vaishe vaija na kwimana mu chikolo, vanavihilila.
Vatenukila Geoff ngwavo, “Vika uli na kuviyithila thimbu ku kukenga ha TV? Unapandele kukwatha shongo yove mu vipangi vya ku sikola. Kuwethi kulinga vinjikakuleke”
Geoff angunguta ngwendi: “Mwashangumuka lalo kutatoka.”
Vaishe vamukenga na kumwihula ngwavo: “Ngwove vika?”
Geoff akumbulula mu mombulu ngwendi, “Vyahi tate.”
Vaishe vanaluvala manene na kumutenukila ngwavo: “Kuwapandele kwendeka nange ngocho.”
Ngwe yove Geoff, ngwe unalingi vati kutewa kulichokota?
THINGANYEKAHO MWAMUVWA
Kuthimutwiya na vithemi vove kunalifu na kwendetha munyau. Nga uwana mulumba wa mamanya uli mu ngila, cho watha kuwongoloka.
CHAKUMWENAKO:
Leah wendekele ngwendi: “Njikawana manene vukalu vwa kuthimutwiya na vatate. Vithimbu vimo nga njithimutwiya navo, vakanjihula ngwavo, ‘Kunjathzivileko, unakala na kuthimutwiya nange ndi?’”
LEAH NATHA KWANGULA VINGILA VINO VITATU.
-
Kukangokela vaishe.
Leah akangokela vaishe ngwendi, “Njitolilileni, njishaka kumileka vukalu vwange.”
-
Kulikela kwendeka na vaishe.
Leah alikela kuleka vaishe vukalu vwendi.
-
Kuvandamena thimbu yaivwa ithina vakuthimutwiye ha vukalu vwendi.
Leah avandamena thimbu yeka, cho endeka na vaishe mu ngila yaivwa, nambe kuvathonekela mukanda wa kulumbununa vukalu vwendi.
Ngila muka iwatha kwangwila Leah?
ACHITHINGANYEKEHO: Vaishe ya Leah vali na kuthinganyeka vyeka, cho kuvathzivukile vyanaluvalela Leah. Nga Leah apangetha Ngila ya A, cho kukangoka kwendi kukumukwatha. Echi chinatha kuluvaletha lika vaishe na kujeneka kumutolilila mwamuvwa, cho lalo chimwetha ngwavo kethi na kuthingimika vaishe. (Efeso 6:2) Eyi ngila kuyatha kuvakwatha voshe.
Ngwe omwo mulumba wa mamanya kuwatha kukwonowetha kuya vungendthzi vwove, nove watha kwangula ngila yaivwa ya kulithzivathanenamo na vithemi vove
Ngila ya B inatha kusholola ngwe yayathi, oloni na ikeyo lalo kuyavwahele. Mwafwa vika? Mwafwa atha lika kuwana vukwathi nga aleka vaishe vukalu vwali navwo. Vaishe vanapandele kuthzivuka vili na kulingiwa mu kuyoya kwendi mangana vawane mwakumukwathela. Kwoloka kulu kukwatha kumanetha vukalu.
Ngila ya C, Leah kechelele chuma chimo chimwonowethe kwendeka na vaishe. Nayongola kukathimutwiya navo thimbu ikwavo. Nga angula kuvathonekela mukanda, cho natha kulithziva ku mbunge hehu.
Kuthoneka mukanda kumukwatha kulumbununa vyoshe vyashaka kuleka vaishe. Omwo vaishe vatanda mukanda, vathzivithitha vyanashakele kuvaleka Leah na kuwana ngila ya kumukwathelamo. Ngila ya C inapu yaivwa manene kuli Leah na kuli vaishe. Nameme endeka navo, nambe kuvathonekela mukanda, ngila ya C yalitombola na chinangulo cha mu Mbimbiliya cha “kuyongola ha vyuma vije vinena kwoloka.”—Loma 14:19.
Vingila muka vikwavo vyanatha kupangetha Leah?
Ngila muka yeka iwathinganyeka? Ithoneke mu chipalo. Thoneka lalo vyuma vyatha kutundamo.
KETHI WENDEKE VYEKA OKUNI KU MBUNGE YOVE KULI VYEKA
Anuka ngwove vyuma viwendeka, nomwo muvathinganyekela vithemi vove ha vyuma viwendeka hamo kuvilitombola.
CHAKUMWENAKO:
Vithemi vove vanatha kukwihula viunaluvalela. Oloni yove uvakumbulula ngwove, “Kunjishaka kumilekavyo.”
Vithemi vove vathinganyeka ngwavo hamo unalumbununa ngwove: “Kunjatha kumileka viñanda mwafwa kunjamikulahelele. Njikaleka vavuthamba vange vya vukalu vwange kethi yeni embwe.”
Achithinganyeke lalo uli mu vukalu vwakama, cho vithemi vove vashaka kukukwatha. Nga uvaleka ngwove: “Kethi mushote mbunge. Njivumanetha yange vavenya.”
-
Vithemi vove vanatha kuthinganyeka ngwavo unendeka ngwove
-
Unatha kukumbulula mwamuvwa nga wendeka ngwove:
