KAPETULU 1
“This Is What the Love of God Means”
“Chithzemo chetu kuli Njambi chilumbunuka ngechi twononoke mashiko endi. Cho mashiko endi kethi amakalu kuli yetu embwe.”—1 YOWANO 5:3.
1, 2. Vika vikamishongangeya kuthzema Yehova Njambi?
MWATHZEMA Njambi ndi? Nga mwalikundika kuli Yehova Njambi na kupwa kavuthamba kendi, cho mukumbulula na ndthzili ngweni eyo njamuthzema. Twashaka kuthzema Yehova. Twathzema Njambi mwafwa natumwetha chithzemo. Mbimbiliya ngwayo: “Tuthzema omwo Njambi watuthzemene ha kulivanga.”—1 Yowano 4:19.
2 Yehova wavangele kututhzema yetu. Natwana lifuti-livu kupwa limbo lyetu lyalivwa. Akatunyungu ku muvila. (Mateo 5:43-48) Akatwana lalo vitutonda ku sipilitu. Natwana Lijwi lyendi, Mbimbiliya. Natukulahetha ngwendi nga tumulomba, cho atutolilila na kutwana sipilitu yendi ya kujela mangana itukwathe. (Myatho 65:2; Luka 11:13) Maneneni watutuminine Munendi umo lika kwa kutupatula ku vuvi na ku kuthsa. Yehova natumwetha chithzemo chakama manene.—Tandeni Yowano 3:16; Loma 5:8.
3. (a) Vika vitunapande kulinga mangana tukale mu chithzemo cha Njambi? (b) Chihula muka chitunapande kulihula, cho chikumbululo tuchiwana kuli?
3 Yehova ashaka ngwendi tunganyale ku chithzemo chendi myaka yoshe. Oloni kuwana vukwathi nambe kujeneka kuvuwana kunemana hali yetu vavenya. Lijwi lya Njambi litunangula ngwavo: “Kaleni mu chithzemo cha Njambi, omwo muvandamena . . . mwonyo wa myaka yoshe.” (Yunda 21) Lijwi lya “kaleni” limwetha ngwavo tunapande kulingako vimo mangana tukale mu chithzemo cha Njambi. Tunapande kumwetha kukandelela kwetu ha chithzemo chendi. Tunapande kulihula ngwetu, ‘Njatha kumwetha vati ngwange njathzema Njambi?’ Twatha kukumbulula echi chihula ha kutanda majwi a kapositolo Yowano awa endeka ngwavo: “Chithzemo chetu kuli Njambi chilumbunuka ngechi twononoke mashiko endi. Cho mashiko endi kethi amakalu kuli yetu embwe.” (1 Yowano 5:3) Tulinga mwamuvwa kuthinganyeka viwalumbununa awa majwi, mwafwa tushaka kumwetha Njambi ngwetu twamuthzema manene.
“CHITHZEMO CHETU KULI NJAMBI CHILUMBUNUKA NGECHI”
4, 5. (a) Majwi a kwendeka ngwavo “chithzemo chetu kuli Njambi” alumbununa vika? (b) Lumbununeni mumwashangumukile kuthzema Yehova mu mbunge yeni.
4 Vika vyathinganyekele kapositolo Yowano ha kuthoneka ngwendi “chithzemo chetu kuli Njambi?” Awa majwi kuwalumbununa chithzemo cha Njambi kuli yetu, oloni chithzemo chetu kuli ikeye. Mwanuka omwo mwashangumukile kuthzema Yehova mu mbunge yeni ndi?
Kulikundika na chimbwitiko vinapu vushangumukilo vwa kushaka kwononoka Yehova mu kuyoya kweni
5 Anukeni lalo mumwalilongethele vuthunga hali Yehova na viyongola vyendi ha thimbu ya kulivanga na kushangumuka kukulahela. Mwathzivithithile ngweni nameme mu vaka-vuvi, vaje vangunukile kuli Yehova Njambi, oloni mukawana lalo vuyoye vwa kulumbunuka vuje vwathzimbalethele Andama na kukatambula mwonyo wa myaka yoshe muli Kilisitu. (Mateu 20:28; Loma 5:12, 18) Mwashangumukile kuthzivuka theho ya ñombelo yatwanene Yehova ha kutuma Munendi umo lika kwija na kumithsila. Mwalithzivile kuvwaha, ngechi mwashangumukile kuthzema Njambi, mwafwa ya chithzemo chendi chakama cha namimwetha.—Tandeni 1 Yowano 4:9, 10.
6. Mwatha kumwetha vati chithzemo cha vuthunga, cho echi chithzemo chamishongangeyeye kulinga vika?
6 Vyuma vimwalilongethele vyamilingithile mushangumuke kuthzema Yehova. Kuthzema Njambi kukwapwile kwendeka lika ha kanwa ngweni, “Njathzema Yehova.” Chithzemo cha vuthunga munapande kuchimwetha mu vilinga, ngechi mwa likulahelo. (Yakomba 2:26) Tumwetha chithzemo nga tulinga vyuma vije vithzivitha vakwetu kuvwaha. Omwo mwashangumukile kuthzema Yehova, mwashakele kuyoya mu ngila ije ithzivitha kuvwaha Ishweni wa mwilu. Vamimbwitika laja ndi? Nga mukemwo, cho chithzemo cheni na kulyana kweni vikevyo vyamilingithile vamimbwitike. Mwalikundikile kuli Yehova na kumimbwitika mangana mulinge chithzango chendi. (Tandeni Loma 14:7, 8.) Nga mushaka kushulithilila chikumiyo cheni kuli Yehova, cho kavangeyeni majwi anatako endekele Yowano.
“TWONONOKE MASHIKO ENDI”
7. Mashiko muka amo anatwana Njambi, cho vika vyalivungila mu kuwakavangeya?
7 Yowano atuleka vikulumbununa kuthzema Njambi ngwendi: “Twononoke mashiko endi.” Mashiko a Njambi apwa aka? Yehova natwana mashiko amangi mu Lijwi lyendi, Mbimbiliya. Chakumwenako, navindika vilinga vya kufwa ngwe kupenda, vukwithzi, kulemetha tumponya, vwithzi na makuli. (1 Kolinte 5:11; 6:18; 10:14; Efeso 4:28; Kolose 3:9) Kwononoka mashiko a Njambi kunambatethelela na kuyoya mwaya mashiko a mu Mbimbiliya.
8, 9. Tuthzivuka vati vyuma vyashaka Yehova nameme ha vukalu vuje kuvendekele mu Mbimbiliya? Aneni chakumwenako.
8 Tunapande kufwitangana mangana tuthzivithe Yehova kuvwaha, kethi ngwe kukavangeya lika mashiko endi embwe. Yehova katwanene mashiko a kututwamenena mu vyuma vyoshe vitulinga mu kuyoya kwetu kwa litangwa na litangwa. Vithimbu vimo tunatha kuliwana na vukalu vuje kuvathonekele mu Mbimbiliya. Ngechi twatha kuthzivuka vati vyuma vije vithzivitha Yehova kuvwaha? Mbimbiliya yamwetha mwamuvwa vithinganyeka vya Njambi. Omwo tulilongetha Mbimbiliya, tuthzivuka vyuma vyathzema Yehova nevi vyathzinda. (Tandeni Myatho 97:10; Vithimo 6:16-19) Cho lalo tuthzivuka vifwa na vilinga vyathzema. Nga mulilongetha vyavingi hali Yehova na vingila vyendi, cho vilinga vyeni na vyuma vimwangula kulinga vilitombola na vithinganyeka vyendi. Nameme muliwana na vukalu vuje kuvathonekele mu Mbimbiliya, mwatha kuthzivuka “vije vyashaka [Yehova] ngechi muvilinge.”—Efeso 5:17
9 Chakumwenako, mu Mbimbiliya kumwethi mashiko aje atuvindika kutala mafilimu na mapulongilamu a ha televijini aje amwetha lwothzi nambe vupangala. Kuma tushaka ngwetu kuvanga kukale mashiko aje endeka mpundu ha vyuma evi ndi? Tuthzivuka omwo Yehova mwakamwena evi vyuma. Lijwi lyendi lituleka ngwavo: “Yehova wathzinda munu uje wathzema lwothzi.” (Myatho 11:5, NWT) Lituleka lalo ngwavo: “Njambi akuthompa vaka-kulinga vupangala na vukwithzi.” (VaHevelu 13:4) Nga tuthinganyeka ha majwi awa, cho tuthzivuka chithzango cha Yehova. Ngechi, kutwapandele kutala mafilimu aje amwetha vilinga vyavivi vyathzinda Njambi yetu. Tuthzivitha Yehova kuvwaha nga tujenjuka vyuma vya vunyengwe vije vivamona vaka-kaye kupwa vyavivwa. *
10, 11. Vika vitukononokela kuli Yehova, cho tunapande kumwononoka mu ngila muka?
10 Vika tukononokela mashiko a Njambi? Mwafwa vika tushaka kuyoya mu ngila ije inalitombola na vithinganyeka vya Njambi? Kutwethi kwononoka mashiko a Njambi mwafwa ya kuthinganyeka ngwetu tuliwana mu vukalu vuje vukatundu mu kujomboka mashiko endi embwe. (Ngalatiya 6:7) Oloni tukononoka kuli Yehova mangana tumwethe ngwetu twamuthzema. Tushaka tuthzivithe Yehova kuvwaha ngwe omwo mwana mwakashaka kuthzivitha chithemi chendi kuvwaha. (Myatho 5:12) Njambi wapwa Tatetu, cho twamuthzema. Kuthzivuka ngwetu tuli na kuyoya mu ngila ije itukwatha ‘vatutetele kuli Shukulu Kalunga,’ kukatuthzivitha manene kuvwaha.—Vithimo 12:2.
11 Ngechi kutwapandele kwononoka Njambi mu kututhindiya, nambe mu vithimbu vimo embwe. * Kutwapandele kwononoka lika mashiko nga vyuma vili mwamuvwa, nameme nga kukwethi vukalu. Oloni tunapande, ‘kwononoka na vimbunge vyetu vyoshe.’ (Loma 6:17) Netu tukalithziva ngwe mwalithzivilile muka-kwimba myatho uje wathonekele ngwendi: “Njili na kuvwahelela ha mashiko ove aje anjathzema.” (Myatho 119:47) Twashaka kwononoka Yehova. Tuthzivuka ngwetu Yehova ashaka tumwononoke na vimbunge vyetu vyoshe, kethi mu vithimbu vimo embwe. (Kwituluka mu Mashiko 12:32) Tushaka ngwetu Yehova atwendeke ngwe mwendekele hali Nowa. Mbimbiliya yendeka hali ou kukulwila yetu wa kulongwa, ou wathzemene Njambi na kumwononoka myaka yaingi ngwavo: “Ngechi vene, Nowa walingile vyoshe vije vyamushikile Njambi.”—Kushangumuka 6:22.
12. Kuma kwononoka Yehova kwatha kumuthzivitha kuvwaha ndi?
12 Yehova akalithzivi vati nga tumwononoka na vimbunge vyetu vyoshe? Lijwi lyendi lyendeka ngwavo ‘akavwahelela.’ (Vithimo 27:11) Kuma kwononoka kwatha kuthzivitha Yehova kuvwaha, Mwene wa mwilu na hathi ndi? Eyo kukamuthzivitha manene kuvwaha. Yehova watutangele na ndthzili ya kulyangwila vya kulinga. Echi chilumbununa ngwavo twatha kwangula kwononoka Njambi, nambe kujeneka kumwononoka. (Kwituluka mu Mashiko 30:15, 16, 19, 20) Nga twononoka Yehova mwafwa yakumuthzema, cho tuthzivitha Tatetu wa mwilu kuvwaha. (Vithimo 11:20) Echi chimwetha lalo ngwavo tunangula ngila yaivwa.
“MASHIKO ENDI KETHI AMAKALU KULI YETU EMBWE”
13, 14. Mwafwa vika twendekela ngwetu ‘mashiko a Njambi kethi a makalu kuli yetu,’ cho chakumwenako muka chivanatwana?
13 Kapositolo Yowano atuleka vuthunga vukwavo lalo ha mashiko a Yehova ngwendi: “Mashiko endi kethi amakalu kuli yetu embwe.” Lijwi lya chiNgiliki livatengulula ngwavo “amakalu” ku 1 Yowano 5:3 lilumbununa “kulema.” * Mbimbiliya ikwavo lalo yendeka ngwayo: “Mashiko endi kuwethi kututhzivitha kulema.” (New English Translation) Mashiko a Yehova kuwapwile amakalu, nambe amavi. Vanu va kujeneka kulumbunuka vatha kwononoka mashiko a Njambi.
14 Tuchitaleni ha chakumwenako chino. Twendeke ngwetu muli na kavuthamba keni uje ashaka kujalukila ku mwela weka, cho amilomba ngwendi mumwambatetheko. Kavuthamba keni ali na vitele vyavingi vya kwambata. Vitele vimo vyavyehu, vikwavo vilema kuvanga kuvijundula vanu vavali. Muthinganyeka ngweni atha kumyangwila vitele vya kulema vije kumwatha kwambata ndi? Embwe. Kashaka ngwendi mwambate vitele vije vyatha kumivulumuna. Mu chifwa chimo lika, Njambi yetu wa chithzemo na ngothzi kashaka ngwendi twononoke mashiko aje amakalu kuwakavangeya. (Kwituluka mu Mashiko 30:11-14) Katha kutuleka ngwendi tujundule chitele cha kulema ngocho. Yehova athzivuka hayalenga ndthzili yetu, “omwo ikeye athzivuka muje mwatutangele, athzivuka ngechi yetu twapwa likungu.”—Myatho 103:14.
15. Mwafwa vika twatha kukulahela ngwetu mashiko a Yehova akatukwatha?
15 Mashiko a Yehova kuwapwile amakalu. Mashiko endi akatukwatha. (Tandeni Isaya 48:17.) Ngechi Mosesa walekele vaIsalele va kuthañulu ngwendi: “Shukulu Kalunga Njambi yetu watushikile kwononoka mashiko oshe awa na kuwathingimika, ngechi tukale mwamuvwa matangwa oshe a kulutwe, cho akatunyunge mu kuyoya kwetu kwoshe.” (Kwituluka mu Mashiko 6:24) Netu twakulahela ngwetu kuli vyuma vyavivwa vyanatwanena awa mashiko endi, cho Yehova ashaka ngwendi atukwathe mu kuyoya kwetu. Njambi katha kutuleka ngwendi tulinge vyuma vije kutwatha. Mana a Yehova apwa a kulova manene. (Loma 11:33) Athzivuka vyuma vitushaka. Yehova lalo wapwa chithzemo. (1 Yowano 4:8) Vyoshe vyakalingi na kwendeka akavilingi mu chithzemo. Mashiko oshe anatwana Yehova anemana ha chithzemo.
16. Vika vitukwatha kwonononoka nameme ngwavo kutwalumbunukile, cho lalo tuli muno mu kaye kakavi?
16 Echi kuchilumbununa ngwavo kwononoka mashiko a Njambi kwapwa kwakwathi. Tunapande kupanga na ndthzili mangana tujenjuke ku futithi ya kano kaye kakavi kaje ‘kali mu ndthzili ya uje Liyavolo.’ (1 Yowano 5:19) Tunapande lalo kulwa ndthzita na mivila yetu ya kujeneka kulumbunuka, ije ikatushongangeya kupokola mashiko a Njambi. (Loma 7:21-25) Oloni nga tuthzema Njambi, cho twatha kuhyana. Yehova akavethzikitha vaje vamuthzema kutundilila ku mbunge. Akana sipilitu yendi ya kujela kuli “vaje vamwononoka.” (Vilinga 5:32) Eyi sipilitu ikemi vushuka vwavuvwa kuli yetu, nameme ngwetu vifwa vyavivwa vije vyatha kutukwatha tumwononoke.—Ngalatiya 5:22, 23.
17, 18. (a) Vika vituthimutwiya muno mu livulu, cho vika vitunapande kwaka mu vithinganyeka? (b) Vika vituthimutwiya mu kapetulu kanatako?
17 Muno mu livulu, tuthimutwiya ha vinangulo na mashiko a Yehova, cho tumona lalo omwo mwaya chithzango chendi. Omwo tuthimutwiya, tunapande kwaka manene mana ku vyuma vitulilongetha. Kutwapandele kwivala ngwetu Yehova kethi kututhindiya kwononoka mashiko endi. Washaka ngwendi twononoke kutundilila kwithi ya vimbunge vyetu. Twanukeni ngwetu Yehova ashaka ngwendi tuyoye mwamuvwa mu thimbu ino na kukawana kuyoya kwa myaka yoshe kulutwe. Tunapande kumona ngwetu kwononoka kunapu ngila yaivwa ya kumwetha ngwetu twathzema manene Yehova.
18 Yehova mu chithzemo chendi, natwana chitakutaku mangana chitukwathe kwangula vyuma vyavivwa ku vyavivi. Oloni tunapande tahi kulongetha chitakutaku chetu mangana chitutwamenene mwamuvwa. Eyi ikeyo ñanda ituthimutwiya mu kapetulu kanatako.
^ par. 9 Kengeni Kapetulu 6 kalino livulu mangana muthzivuke mwakwangwila vyuma vije vimithzivitha kuvwaha.
^ par. 11 Nambe vandemone vatha kulikwitha kwononoka. Yesu mwashikile vandemone ngwendi vatunde mu mivila ya vanu vamo, vandemone vatundile mu mivila ya vaje vanu, nambe ngwavo valingile ngocho mu kulithindiya.—Mako 1:27; 5:7-13.
^ par. 13 Ku Mateo 23:4, eli lijwi valipangetha mu kulumbununa “vitele vya kulema,” nambe mashiko a chithemwa avalimangelele vaka-kuthoneka na vaFaliseo mangana vanu vawakavangeye. Ku Vilinga 20:29, 30, eli lijwi lalo vanalitengulula ngwavo tungunga “va vukalu,” cho limanena mbunga ya vaka-kutengulukila vaje “vakendeka makuli” mu kungumuna vakwavo.
