VIÑANDA VIKWAVO
Mwakumanethela Vukalu mu Viñanda vya Mingotho
Ku 1 Kolinte 6:1-8, Paulu wathimutwiyiye vya vanu vaje vatwalele vakwavo vaka-kukulahela ku vindthzango vya kuthompela. Wavihililile ha kuwana ngwe vaka-Kilisitu vamo mu Kolinte vatwalele vakwavo kuli “vaka-kuthompa vaje vaka-kujeneka kukulahela.” (Vesi 1) Paulu wamwethele ngwendi vaka-Kilisitu kuvapandele kuya na kumanethela viñanda vyavo ku vindthzango vya ku kaye, oloni vanapandele kuvimanethela ku chikungulukilo. Tuthimutwiyeniko ha vyuma vimo vyalingithile Paulu endeke awa majwi na vyuma vikwavo vije kendekele.
Nga twalipyakana na mukwetu muka-kukulahela mu viñanda vya mingotho, tunapande kumanetha viñanda vyetu mu ngila ije yashaka Yehova, kethi kukavangeya vithinganyeka vyetu embwe. (Vithimo 14:12) Ngwe muje mwendekele Yesu, chachivwa kumanetha vukalu thimbu kanda vwame. (Mateo 5:23-26) Oloni vaka-Kilisitu vamo vakakaluwitha vimbunge vyavo na kutwala viñanda vyavo ku vindthzango vya kuthompela. Paulu wendekele ngwendi: “Omwo yeni muli na viñanda ha kati keni chimwetha ngechi munonwa.” Vika vyendekelele ngocho? Mwafwa kulitwala ku vindthzango kukaviyitha lithzina lyalivwa lya chikungulukilo neli lya Njambi itukalemetha. Ngechi tunapande kuthinganyeka mwamuvwa ha chihula chehwile Paulu ngwendi: “Vika kumutavela vamilinge mwamuvi?”—Vesi 7.
Paulu wendekele lalo ngwendi Njambi natwana chikungulukilo mangana chimanethe vichokota. Vakulunu vapwa vaka-Kilisitu va mana, mwafwa vathzivuka kupangetha mwamuvwa vuthunga vwa mu Vithoneka. Mukemwo Paulu wendekele ngwendi ‘vatha kuthungametha viñanda ha kati ka vaka-Yesu.’ (Vesi 3-5) Yesu wendekele ngwendi vichokota vije vikatuka mu kulinga vuvi vwa kufwa ngwe kuvangeya na chipululu, tunapande kuvumanetha mu kukavangeya evi vingila vitatu. Ngila ya kulivanga, tunapande kuthimutwiya ku vushweke na munu natuvulumwina. Ya mu chivali, nga katolilila, cho tunapande kulanyako mukaleho umo nambe vavali. Cho ya mu chitatu, nga anga katolilila, cho twatha kutwala ñanda yetu ku chikungulukilo mangana vakulunu vakaitale.—Mateo 18:15-17.
Vakulunu va chikungulukilo kuvapwile maako va fulumende, nambe vaka-mingotho, cho kuvapandele kukwatha vakwavo mu kukavangeya mashiko a fulumende embwe. Vakulunu kuvethi kuvatula viñanda vya vandolome vaje vanalipyakana mu mingotho. Oloni vakashaka kuvakwatha lika mangana vapangethe Vithoneka mu kumanetha vukalu vwavo. Nga ñanda yavo yaikalu, cho vanatha kwihula ntwama wa kuthzenguluka, nambe ofisi ya munango ya Vakaleho va Yehova mangana vavaleke mwakulingila. Oloni kuli viñanda vimo vije kuvyapandele kuvithompa ngwe muje mwendekele Paulu. Viñanda muka ovyo?
Viñanda vimo vinapande kuvitwala ku vindthzango vya kuthompela mangana vakavivatule mwamuvwa. Chakumwenako, ndthzango ya kuthompela ikeyo lika yatha kumanetha viñanda vya kufwa ngwe kwana munu mukanda wa kuthsiya vulo, kupatula mwana, kwana vukwathi ku munakathzi ivanakondola, kutambula fweto kuli vaka-ishuwalansi ya vyuma vinavihya, kumikwatha mu kufweta mikuli na kushaka kumwetha ngwe lipapelo lya vyuma vyanathethze muthsi linapu lya vuthunga indi embwe. Kunatha lalo kukala viñanda vije vilingitha ndolome ivanalandela saimoni nendi aye ku ndthzango ya kuthompela mangana alivingilikiye. *
Nga mulitwala ku vindthzango vya kuthompela mangana ngweni mumanethe vichokota, cho kumwethi na kujomboka majwi endekele Paulu. * Muka-Kilisitu napande kushungwiya kujeletha lithzina lya Yehova na kunena kwoloka na likwatathano mu chikungulukilo. Vaka-kukavangeya Kilisitu vavathzivukila ha chithzemo, cho “chithzemo kuchethi kulitondela vyacho chikecho vavenya.”—1 Kolinte 13:4, 5; Yowano 13:34, 35.
^ par. 2 Nameme kuvyethi kulingiwa, oloni vithimbu vimo muka-Kilisitu natha kuvulumwina mukwavo mulonga wakama wa kufwa ngwe kuwitha munakathzi na kumulala, kumutwa vimbandu, kumuthsiya, nambe kumwiva vyuma vyendi. Mu milonga ya chifwa echi, muka-Kilisitu kaviyitha nga aya na kwambulula ku tupokola, nameme kulinga ngocho kumitwala ku ndthzango ya kuthompela.
^ par. 3 Nga mushaka vithimpi vikwavo, kengeni Kaposhi ka Kukengela ka Vundele ka March 15, 1997, ha liputa 17-22, naka ka October 15, 1991, ha liputa 25-28.
