Thimbu muka ije ndokathzi napande kulikuta nanga ku mutwe, cho mwafwa vika? Tuthimutwiyeni vyathonekele Paulu ha ñanda eyi. Natuleke vyuma vitunapande kulinga mangana twangule mwamuvwa vyuma vije vinenetha kathingimiko kuli Njambi. (1 Kolinte 11:3-16) Paulu wendekele ha vyuma evi vitatu: (1) vipangi vije vyanapande ndokathzi alikute nanga ku mutwe, (2) thimbu yanapande kulikuta nanga (3) na vyuma vimulingitha alikute nanga ku mutwe.

Vipangi vije vyanapande ndokathzi alikute nanga ku mutwe. Paulu wendekele vyuma vivali: kulombela na kwambulula Lijwi lya Njambi, nameme ngwetu kupolofweta. (Vesi 4, 5) Lilombelo lyapwa ngila itukathimutwiya na Yehova. Ano matangwa, kupolofweta kulumbununa chipangi choshe choshe cha kulongetha Mbimbiliya chalinga muka-Kilisitu. Kuma Paulu nendeka ngwendi munakathzi napande kulikuta nanga ku mutwe thimbu yoshe omwo alombela, nambe kulongetha vuthunga vwa mu Mbimbiliya ndi? Embwe. Kuili thimbu ije munakathzi napande kulikuta nanga ku mutwe ha kulombela nambe kulongetha

Thimbu yanapande kulikuta nanga. Paulu wendekele vingila vivali, mu nanga na mu chikungulukilo. Wendekele ngwendi:  “Munalume napu mutwe wa munakathzi wendi . . . Munakathzi woshe omwo alombela nambe kwambulula Lijwi lya Njambi mu mbunga ya vanu vaje valemetha, cho kafwiki ku mutwe wendi ali na kushaula munalume wendi.” (Vesi 3, 5) Mu nanga, Yehova nangula munalume kupwa mutwe wa munakathzi. Munakathzi napande kunanguka vuntwama vwa munalume wendi kutewa amushaula mu kulinga vipangi vije vyanana Yehova kuli munalume. Chakumwenako, nga munakathzi ali na kutwamenena chilongetha cha Mbimbiliya oku munalume wendi kwali, cho napande kulikuta nanga ku mutwe mu kumwetha kathingimiko kuli munalume wendi. Napande kulinga ngocho nameme munalume wendi wapwa wa kumbwitika nambe embwe, mwafwa ikeye mutwe wa nanga. * Nga alombela nambe kulongetha oku munendi wa munalume wamundondo wa kumbwitika kwali, cho napande kulikuta lalo nanga ku mutwe. Echi kuchilumbununa ngwavo munendi ikeye mutwe embwe, oloni mwafwa ya vuntwama vuvana vanalume va kumbwitika mu chikungulukilo cha vaka-Kilisitu.

Paulu wendekele ha ngila ikwavo ngwendi: “Nga umo ali na vimata ha chuma echi nambe yange nambe vikungulukilo vya Njambi kutwethi na ngila yeka lalo ya kulemethela.” (Vesi 16) Mu chikungulukilo cha vaka-Kilisitu, vuntwama vavwana ku vanalume va kumbwitika. (1 Timateo 2:11-14; VaHevelu 13:17) Vanalume lika vakevo vavakangula kupwa vakulunu na vaka-kupangela mangana vashulithilile chipangi chavana Njambi cha kunyunga vutanga vwendi. (Vilinga 20:28) Vithimbu vimo, vanakathzi vanatha kuvaleka vapange vipangi vivakapanga vanalume va kumbwitika. Chakumwenako, munakathzi natha kutwamenena chiwano cha kuya mu lihya nga munalume wa kumbwitika wai. Natha lalo kutwamenena chilongetha cha Mbimbiliya oku ndolome wa kumbwitika kwali. * Ha kuwana ngwe evi vinapu vipangi vya chikungulukilo, ngechi napande kulikuta nanga ku mutwe mangana amwethe ngwendi ali na kupanga chipangi chanapandele kupanga munalume.

 Kuli vipangi vyavingi vitukalingi ha kulemetha Njambi vije ndokathzi kapandele kuvikutila nanga ku mutwe. Chakumwenako, kapandele kulikuta nanga ku mutwe nga akumbulula mu chikungulukilo, nambe nga ali mu lihya na munalume wendi nambe na ndolome wa kumbwitika, nambe nga ali na kulombela na vana vendi va vanalume va kujeneka kumbwitika. Nga kuli vyuma vimo vije ndokathzi kathzivithithile mwamuvwa ha ñanda eyi ya kulikuta nanga ku mutwe, cho natha kutondethetha mu mavulu akwavo. * Oloni nga anga kathzivithitha, cho natha kulikuta nanga ku mutwe nga chitakutaku chendi chimutavetha kulinga ngocho, ngwe muvanamwetha mu chikupulo.

Vyuma vimulingitha alikute nanga ku mutwe. Mu vesi 10, vanendekamo vyuma vivali vije vilingitha ndokathzi alikute nanga ku mutwe. Vanendeka ngwavo: “Omwo ya tungelo, munakathzi napande kufwika ku mutwe wendi kusholola ngechi ali mwithi ya mashiko a munalume wendi.” Cha kulivanga, kengeni majwi endeka ngwavo, “kusholola ngechi ali mwithi ya mashiko.” Kulikuta nanga ku mutwe kumwetha ngwavo munakathzi nathingimika chiyulo cha Yehova ha kwana vanalume va kumbwitika chipangi cha kutwamenena mu chikungulukilo. Ngechi amwetha ngwendi wathzema Yehova Njambi na kupwa wa kulongwa kuli ikeye. Majwi endeka ngwavo: “Omwo ya tungelo,” amwetha lalo chuma cha mu chivali chije chilingitha ndokathzi alikute nanga ku mutwe. Tungelo vakalithzivi vati nga munakathzi alikuta nanga ku mutwe wendi?

Tungelo vakathzivi kuvwaha ha kumona chiyulo cha Yehova vali na kuchithingimika mu munga yendi ya mwilu neyi ya hathi. Tungelo vakalilongetha vyavingi ku vanu va kujeneka  kulumbunuka. Navo vanapande kulyononwetha ku vyuma vyanavwahetha Yehova, chuma chije chivonwene tungelo vamo mu vithimbu vya kunima. (Yunda 6) Tungelo vanatha kumona vandokathzi va mana, vaje neshwala mu kukulahela valyononwetha ku chiyulo cha ndolome wa kumbwitika wamuha. Vithimbu vimo ava va ndokathzi vapwa vaka-Kilisitu va kuvwavetha vaje vakayula hamo na Kilisitu mwilu. Ava vandokathzi vakakala ha vitumbamo vya vulemu manene kutuvakana nevi vivali navyo tungelo. Ava vandokathzi vali na kwana tungelo mwanja wauvwa. Kunapu kuvethzika kwakama nga vandokathzi voshe vamwetha ku mesho a maundthzi a tungelo ngwavo vapwa va kulikehetha, cho lalo vapwa va kulongwa na kulyononwetha.