Kulemetha pandelo. Vakaleho va Yehova vakulahela ngwavo kulikombelela, nambe kulemetha pandelo na kwimba mwatho wa lifuti, vinapu vilinga vya kumwetha ngwavo lifuti na vantwama valyo vakevo vatwovola, kethi Njambi embwe. (Isaya 43:11; 1 Kolinte 10:14; 1 Yowano 5:21) Omwo mukemwo mwalingile Mwene Nevukataneza wa mu Mbambilone ya kuthañulu. Ou mwene washakele vanu vamone vukama vwendi, ngechi washongele kamponya na kuleka vanu voshe vakombelele kamponya oku mwatho wa kufwa ngwe mwatho wa lifuti uli na kwimba. Oloni vakwenje vatatu va vaHevelu, va Shandelaki na Meshake na Ambendenengo vavyanene kukombelela uje kamponya nameme vathzivukile ngwavo vatha kuvathsiya.—Ndanyele, kapetulu 3.

Carlton Hayes uje walilongethele mithzimbu ya kuthañulu wendekele ngwendi mu matangwa etu ano, “vanu vali na kulemetha pandelo mu kumwetha ngwavo vakulahela manene lifuti lyavo. Vanalume vakashulula matepa nga vetitha pandelo. Vaka-kuthoneka vakathoneka myatho ya kuthzumbangeya pandelo, cho vanike navo vakembi myatho ya kulemetha pandelo.” Wendekele lalo ngwendi mafuti akala na “matangwa a kujela,” a kufwa ngwe October 24 muno Zambia, cho akala lalo na “vasandu na vanu va luthsimo na vitembele.” Ku chilika chimo cha  mu Brazil, muka-kushika mashwalale wendekele ngwendi: “Vanu vakathingimika pandelo na kuilemetha . . . ngwe muvakalemethela lifuti lyavo.” Livulu limo lyendeka ngwavo: “Pandelo yapwa ya kujela ngechi mwa chilindakano.”—The Encyclopedia Americana.

Eli livulu lyendeka lalo ngwavo myatho ya lifuti “yamwetha ngwavo vanu vathzema manene lifuti lyavo, cho mu myatho yacho mwakala majwi a kulombela Njambi mangana atwamenene vanu nambe vantwama na kuvanyunga.” Ngechi vangamba va Yehova vamona vilika vije vimwetha ngwavyo vanu vathzema lifuti lyavo na kulemetha pandelo na kwimba myatho ya lifuti kupwa vulombelo. Livulu limo lya vaka-America lyendekele ovyo vana va Vakaleho va Yehova vavyanenene kulemetha pandelo, nameme kulithinga kukundwiya fulumende mu masikola. Lyendekele ngwavo: “Ndthzango Yakama ya Kuthompela ivatava ngwayo vilika vya chifwa echi vinapu vya vulombelo.”—The American Character.

Nameme vangamba va Yehova kuvethi kulikoveletha mu vilika evi vivamona ngwavo kuvavitavethele mu vithoneka, oloni kuvethi kuvyanetha vakwavo nga valinga ngocho. Vakaleho va Yehova vathingimika evi vipandelo na kuvimona kupwa vifwitha vya lifuti, cho vamona vantwama va fulumende kupwa “vaka-kushwana” vaje vapwa ‘vangamba va Njambi.’ (Loma 13:1-4) Ngechi Vakaleho va Yehova vakakavangeya lishiko lya kulombelela ‘vimyene na voshe vaje vali na kushika.’ Tukavalombelela mangana “tuyoye mu kwoloka na kathingimiko koshe kuli Njambi hamo na vilinga vyavivwa.”—1 Timateo 2:2.

Kuvwota mu kwangula ntwama. Vaka-Kilisitu va vuthunga vakathingimika vakwavo vaje vakavwoto. Kuvethi kulwitha vanu mu thimbu ya kuvwota, oloni vakalyononwetha ku vantwama vaje vavanangula laja. Oloni kuvethi kulikoveletha mu viñanda vya chiyulo cha lifuti. (Mateo 22:21; 1 Petulu 3:16) Muka-Kilisitu napande kulinga vati nga mu lifuti mwakala vashaka ngwavo munu na munu kuvanga avwote? Indi natha kulinga vati lalo nga vanu valwitha vaje kuvethi kuya ku myela ya kuvwotela? Anukeni ngweni Shandelaki na Meshake na Ambendenengo  vaile ku chana cha Ndula, ngechi muka-Kilisitu natha kuya ku mwela wa kuvwotela nga chitakutaku chendi chimutavetha. Oloni kapandele kupokola lishiko lya kujeneka kulikoveletha mu viñanda vya chiyulo cha lifuti. Napande kuthinganyeka ha vinangulo vino vya kupwa 6:

1. Vaka-kukavangeya Yesu “kuvapwile vaka-kaye.”—Yowano 15:19.

2. Vaka-Kilisitu vemanena Kilisitu na Vumwene vwendi.—Yowano 18:36; 2 Kolinte 5:20.

3. Chikungulukilo cha vaka-Kilisitu chakulahela vyuma vimo, cho vanu vakalamo valikwatathana, mwafwa vakala na chithzemo ngwe chije cha Kilisitu.—1 Kolinte 1:10; Kolose 3:14.

4. Vaje vangula ntwama, navo vakala na mulonga nga alinga vyuma vyavivi.—Kengeni evi vinangulo vili ku 1 Samwele 8:5, 10-18 na 1 Timateo 5:22.

5. Yehova wamwene ngwendi vaIsalele vanamuvyana omwo vashakele kukala na mwene ivamona na mesho.—1 Samuele 8:7.

6. Vaka-Kilisitu vanapande kupwa va kuthzituka kwendeka vya Vumwene vwa Yehova kuli vaka-vupolitiki.—Mateo 24:14; 28:19, 20; VaHevelu 10:35.

Vipangi vyeka. Mu mafuti amo, fulumende yashaka vanu vaje vavyana chipangi cha vushwalale vapange vipangi vimo. Nga tuli mu vukalu ovu, cho tunapande kulomba kuli Njambi, tunatha lalo kulekako muka-Kilisitu wa kuhya, mangana twangule mwamuvwa mutulingila.—Vithimo 2:1-5; Filipi 4:5.

Lijwi lya Njambi lyatuleka tupwe ‘vaka-kulikehetha kuli vaka-kushwana na vaje vali na moko ya kushwana, ngechi tuvononoke, na kulivwahethela mu kulinga mwamuvwa mu vyuma vyoshe, . . . , cho thimbu yoshe tusholole vuvwa vunapandemo ku mesho a vanu voshe.’ (Tito 3:1, 2) Tunatha kulihula vihula vino ngwetu: ‘Kupanga vipangi vivananjileke kunjilingitha njilikovelethe mu viñanda vya chiyulo cha lifuti, nambe vya vulombelo vwa makuli ndi?’ (Mika 4:3, 5; 2 Kolinte 6:16, 17) ‘Kupanga echi chipangi kunjonwetha kushulithilila vipangi vyange vya ku sipilitu ndi?’ (Mateo 28:19, 20; Efeso 6:4; VaHevelu 10:24, 25) ‘Kuma kulikoveletha mu vipangi evi, kunjikwatha  njiwane thimbu ya kupanga vipangi vyange vya ku sipilitu, nameme kuya na kwambulula thimbu yoshe ndi?’—VaHevelu 6:11, 12.

Nga chitakutaku cha muka-Kilisitu chimutavetha kukovela chipangi cha kukundama ku vushwalale kutuvakana kumutwala mu kamenga, cho vaka-Kilisitu vakwavo vanapande kuthingimika vithinganyeka vyendi. (Loma 14:10) Oloni nga ngwendi katha kupanga echi chipangi, vakwavo vaka-Kilisitu vanapande kumuthingimika lalo.—1 Kolinte 10:29; 2 Kolinte 1:24.