Yehova washaka vaje valyambata vatwalelele kunyunga chikumiyo chavo cha vulo. Yehova mwapandakanene Andama na Eva, wendekele ngwendi: ‘Munalume . . . akalipandakana na munakathzi wendi, cho vakapwa muvila umo lika.’ Yesu Kilisitu nendi welukilile awa majwi, cho wendekele ngwendi: “Ngechi vene, vaje vanapandakana Njambi, munu kethi avangunune.” (Kushangumuka 2:24; Mateo 19:3-6) Yehova na Yesu vamona vulo kupwa vwa kwilila, cho kuthsa lika chikecho chatha kumanetha vulo. (1 Kolinte 7:39) Ha kuwana ngwe vulo vwapwa vwa kujela, ngechi vanu kuvapandele kuvwombwanetha. Yehova wathzinda kuthsiya vulo kuje kuvatavethele mu Vithoneka.—Malakiya 2:15, 16.

 Mulonga muka uvendeka mu Vithoneka uje ulingitha munalume na munakathzi vathsiye vulo? Yehova wathzinda vupangala na vukwithzi. (Kushangumuka 39:9; 2 Samwele 11:26, 27; Myatho 51:4) Yehova wamona vupangala kupwa vwavuvi manene, mukemwo watavetha vanu vathsiye vulo nga umo nalingi vupangala. (Nga mushaka kuthzivuka muvanalumbunwina vupangala, kengeni Kapetulu 9, palangilafu 7.) Nga umo mu vulo nalingi vupangala, Yehova natavetha uje kalingile vupangala alyangwile vavenya nga ashaka kutumbama na muka-limbo lyendi uje nalingi vupangala indi embwe. (Mateo 19:9) Nga uje kethi na mulonga ashaka kukondoka ku vulo, Yehova kamumono ngwendi naviyithala embwe. Cho lalo chikungulukilo cha vaka-Kilisitu kuchethi kushongangeya vanu valikondole. Vithimbu vimo, kunatha kukala vyuma vije vilingitha munu uje kethi na mulonga atwalelele kutumbama na muka-limbo lyendi uje navulumuna nga namwetha mbunge ya kutenguluka. Twanukeni ngwetu voshe vaje vashaka kukondoka kwetheketha na Vithoneka, vanapande kulyangwila vavenya kulinga ngocho na kulitavela vukalu vwoshe vuje vwatha kutundaho.—Ngalatiya 6:5.

Vithimbu vimo kukapu vukalu vwakama manene, cho vaka-Kilisitu vamo vakalitepe na muka-limbo lyavo, nameme kuthsiya vulo okuni nou nalingi vupangala wai. Mu chifwa changachije, Mbimbiliya ngwayo uje natundu ku vulo “napande kukala muthzike nambe kwiluka kuli munalume wendi.” (1 Kolinte 7:11) Muka-Kilisitu wa chifwa echi, kathzitukile kushomboka nambe kwambata weka. (Mateo 5:32) Kengeni vukaku vumo vuje vunalingitha vaka-Kilisitu vamo valitepe.

Kuvyana kukwatha nanga. Nanga inatha kukala mu vujene mwafwa munalume shendi kuvatondela vyuma vya kulikwatha navyo mu kuyoya okuni ali na ndthzili ya kulinga ngocho. Mbimbiliya ngwayo: “Oloni nga umo katha kunyunga . . . vaka-nanga yendi navyana kukulahela, navihya kutuvakana uje kethi muka-kukulahela.” (1 Timateo 5:8) Nga munalume wa chifwa echi shendi kutenguluka, cho munakathzi natha kulitepa na muka-limbo lyendi  mangana alivingilikiye na kuvingilikiya vana vendi. Oloni vakulunu mu chikungulukilo cha vaka-Kilisitu vanapande kutondethetha mwamuvwa na kumona indi vuthunga vene munalume shendi kukwatha nanga yendi. Muka-Kilisitu uje avyana kukwatha nanga yendi vatha kumutunditha mu chikungulukilo.

Munu apupa muka-limbo lyendi. Munu uje akapupu muka-limbo lyendi natha kumuvulumuna nambe vene kumuthsiya. Nga uje ali na kuyandetha mukwavo wapwa muka-Kilisitu, cho vakulunu mu chikungulukilo vanapande kutondethetha vuthunga. Matoto na lwothzi vyatha kutundithitha munu mu chikungulukilo.—Ngalatiya 5:19-21.

Kuvindika muka-limbo lyendi kulemetha Njambi mu vuthunga. Munu natha kwonwetha muka-limbo lyendi kulemetha Njambi mu ngila ya vuthunga, nameme kumuthindiya mangana apokole mashiko a Njambi. Nga chili ngocho, cho uje ivanavindika napande kulyangwila vavenya nga kulitepa ikeyo lika ngila yanatha “kwononoka Njambi kethi vanu.”—Vilinga 5:29.

Mu vyuma vyoshe evi vitunathimutwiya, kumwapandele kuthindiya munu uje kethi na mulonga angule kulitepa na muka-limbo lyendi indi kutwalelela kutumbama nendi. Nameme vavuthamba va kuhya ku sipilitu na vakulunu mu chikungulukilo vatha kunangula munu kupangetha Mbimbiliya, oloni kuvatha kuthzivuka vyuma vyoshe vili na kulingiwa mu vulo vwavo. Yehova ikeye lika atha kuvimona. Munakathzi nambe munalume muka-Kilisitu katha kuthingimika Njambi na vulo nga ametha ñanda mangana awane ngila ya kulitepelamo na muka-limbo lyendi. Yehova atha kuthzivuka vyoshe nga munu avangeya muka-limbo lyendi ñanda mangana valitepe. Vyuma “vyoshe vili hanja ku mesho endi. Cho kuli ikeye tuvavoshe tunapande kulyambulwila vyetu yetu vavenya.” (VaHevelu 4:13) Oloni nga vukalu vwakama vwali na kumona muka-Kilisitu anga vuchitwalelela, cho kumwapandele kumwana mulonga nga angula kulitepa na muka-limbo lyendi. Kulutwe “yetu voshe tukemana ku mesho a Njambi na kututhompa.”—Loma 14:10-12.