1, 2. Cihula muka citunapande kulihula, co mwafwa bika tunapande kulihwilaco?

MU KULILONGESA Mbimbiliya, munamono ngweni banu babangi bali na kulishasha ngwabo bali na kulemesa Njambi, oloni lalo bali na kulongesa na kulinga byuma byazinda. (2 Kolinte 6:17) Mukemwo Yehova natuleka ngwendi tutunde mu bulombelo bwa makuli, nameme “Mbambilone Wakama.” (Kujombolola 18:2, 4) Bika bimunapande kulinga? Munu na munu napande kulyangwila byakulinga. Tunapande kulihula ngwetu: ‘Njishaka kulemesa Njambi mu ngila yashaka, indi njitwalelelaho kumulemesa munjikamulemesela?’

² Nga munatundu laja mu bulombelo bwa makuli, co munalingi mwamubwa. Oloni hamo kucili bilinga na bisemwa bimo bya mu bulombelo bwa makuli bimwashaka manene. Tusimutwiyeni ha bilinga na bisemwa bimo mangana tumone bikwapwila kwa seho kubimona ngwe mwabimona Yehova.

3. (a) Mwafwa bika bamo kunasa kubakaluwila kulemesa Njambi kwa kujeneka kupangesa tuponya? (b) Mbimbiliya inendeka bika ha kupangesa tuponya mu kulemesa Njambi?

³ Banu bamo banapangesa tumponya mu binjubo byabo mu kulemesa Njambi ha myaka yaingi. Nga neni muli na kubapangesa, co mwasa kuliziba ngweni kumwasa kulemesa Njambi nga mumbila kuti tuponya. Oloni anukeni ngweni Yehova ali na kutulongesa mutunapande kumulemesela. Mbimbiliya inatuleka ngwayo Yehova kashaka ngwendi tupangese  tuponya mu kumulemesa.—Tandeni Kutuuka 20:4, 5; Myaso 115:4-8; Isaya 42:8; 1 Yowano 5:21.

4. (a) Mwafwa bika kutwapandele kukombelela bakulu? (b) Yehova wabyaneselele bika banu bendi kwendeka na batsi?

⁴ Banu bamo bali na kubiisila simbu yabo na nzili yabo mu kukombelela bakulu. Oloni tunalilongesa ngwetu batsi kubasa kutukwasa nambe kutubulumuna. Nakumo kwahi kubali na kuyoya. Ngeci kutwapandele kwendeka na batsi, mwafwa mizimbu ije isholoka ngwe itunda kuli bakebo, ikatundu ku bandemone. Mukemwo Yehova walekele Baisalele ngwendi keti bendeke na batsi, nambe kulikobelesa mu bilinga bya bundemone.—Kwituluka mu Mashiko 18:10-12; taleni Biñanda bya Kushongo ha 26 na 31.

5. Bika bimikwasa mulikele kukombelela bakulu na kupangesa tuponya mu kulemesa Njambi?

⁵ Bika bimikwasa mulikele kukombelela bakulu nambe kupangesa tuponya mu kulemesa Njambi? Munapande kutanda Mbimbiliya na kusinganyeka omwo Yehova mwamwenamo ebi byuma. Yehova wabimona kupwa bya “bunyengwe.” (Kwituluka mu Mashiko 27:15) Lombeleni kuli Yehova litangwa na litangwa mangana amikwase mumone ebi byuma ngwe mwabimona ikeye na kumikwasa mumulemese mu ngila yashaka. (Isaya 55:9) Yehova amikwasa mumbile byuma byoshe bije binakundama ku bulombelo bwa makuli.

6. Banu bangwilile bika litangwa lya 25 December ngwabo likelyo lyasemukile Yesu?

⁶ Cilika ca Kilisimasi catsimana manene mu kaye, co banu babangi basinganyeka ngwabo capwa cilika ca kwanuka kusemuka kwa Yesu. Eci cilika ca Kilisimasi catunda mu bulombelo bwa makuli. Libulu limo lyamwesa ngwalyo Baloma ba kujeneka kukulahela balingile cilika ca kusemuka  nambe kutuhuka kwa litangwa ha 25 December. Bantwama ba bulombelo bashakele ngwabo banu babangi baje kubakulahelele bapwe baka-Kilistu. Ngeci bashangumukile kulinga cilika ca kusemuka kwa Yesu ha 25 December nameme keti likelyo litangwa lyasemukile. (Luka 2:8-12) Bandongesi ba Yesu kubalingile cilika ca Kilisimasi. Libulu limo lyamwesa ngwalyo myaka 200 kutunda ha kusemuka kwa Yesu, “naumo wahi wazibukile litangwa lyasemukile, co banu babandondo lika bashakele ngwabo balizibuke.” (Sacred Origins of Profound Sings) Banu bashangumukile kulinga cilika ca Kilisimasi te muneti myaka ya kutubakana 300 kutunda ha kusemuka kwa Yesu.

7. Mwafwa bika baka-Kilistu ba busunga kubesi kulinga cilika ca Kilisimasi?

⁷ Banu babangi bazibuka ngwabo cilika ca Kilisimasi na byuma bibakalingi ha litangwa eli, bya kufwa ngwe kulyana mabwana na biwano bya kukina byapwa bya baka-kaye. Cakumwenako, simbu imo mu England na kumitambela imo ya ku America, babindikile kulinga cilika ca Kilisimasi mwafwa ngwabo catunda ku kaye. Woshe wacilingile bamwanene kashitiko. Oloni kukapwa muje, banu bashangumukile lalo kulinga cilika ca Kilisimasi. Mwafwa bika baka-Kilistu ba busunga kubesi kulinga cilika ca Kilisimasi? Mwafwa bashaka kuzibisa Njambi kubwaha mu byoshe bibalinga.

8, 9. Mwafwa bika baka-Kilistu ba kulibanga kubalingile bilika bya kusemuka kwabo?

⁸ Cilika ca kwanuka litangwa lyasemukile munu naco catsimana manene mu kaye. Baka-Kilistu banapande kucilinga ndi? Bilika bya kwanuka litangwa lya kusemuka bibanendeka mu Mbimbiliya byapwile bya banu baje kubalemesele Yehova. (Kushangumuka 40:20; Mako 6:21) Ebi  bilika byapwile bya kulemesa binjambi ba makuli. Mukemwo baka-Kilistu ba kulibanga “bamwene bilika bya kwanuka matangwa a kusemuka kwa banu kupwa bya baka-kaye.”—The World Book Encyclopedia.

⁹ Baloma na Bangiliki ba kusañulu bakulahelele ngwabo sipilitu ikaija ku munu na munu ha litangwa lya kusemuka kwendi, co ikamunyungu mu kuyoya kwendi kwoshe. Ngeci balingile bilika bya kwanuka kusemuka kwabo mwafwa bakulahelele ngwabo kulinga ngoco kulingisa binjambi babo banyungilile munu wasemukile ha litangwa olyo.

10. Mwafwa bika baka-Kilistu ano matangwa kubesi kulinga bilika bya kwanuka matangwa a kusemuka?

¹⁰ Yehova washaka bilika bije byakundama ku bulombelo bwa makuli ndi? (Isaya 65:11, 12) Embwe. Mukemwo kutwesi kulinga bilika bya kwanuka matangwa a kusemuka, nambe bilika byeka bya kukundama ku bulombelo bwa makuli.

11. Mwafwa bika banu bamo bakalingi bilika bya matangwa a kuhwima? Bika bimunapande kwaka kulutwe?

¹¹ Banu bamo bazibuka ngwabo cilika ca Kilisimasi na matangwa eka a kuhwima byapwa bya ku kaye, oloni anga bacibilinga. Bamona ngwabo matangwa a kuhwima akabana simbu ya kubwahelela na binaanga byabo. Neni mwamona ngoco ndi? Kubwahelela na naanga yeni kukwabihile. Yehova ikeye wakeleko naanga, co ashaka ngwendi tulizeme. (Efeso 3:14, 15) Oloni tunapande kwaka kulutwe busamba bwetu na Yehova, kutubakana kulikobelesa mu bilika bya bulombelo bwa makuli mangana ngwetu tuzibise babushoko bwetu kubwaha. Mukemwo kapositolo Paulu wendekele ngwendi: “Twaleleleniho kunanguka bije bizibisa Mwene kubwaha.”—Efeso 5:10, NWT.

12. Matangwa muka a kuhwima aje Yehova kashakele?

 ¹² Banu babangi basinganyeka ngwabo kunapu kwa ngoco kuzibuka oho hatunda matangwa a kuhwima. Oloni Yehova kesi kusinganyeka ngoco. Kashakele matangwa a kuhwima aje atunda mu bulombelo bwa makuli, nameme bilika bije bizumbangeya banu nambe bipandelo bya lifuti. Cakumwenako, baka-Ingito bakele na bilika byabingi bya kulemesa binjambi babo ba makuli. Baisalele mubatundile mu ingito nabo bashangumukile kulinga cilika cimo ca baka-Ingito na kucitumbula ngwabo “ciwano ca kusingimika Shukulu Kalunga.” Oloni Yehova wabanyanyamesele. (Kutuuka 32:2-10) Tulingeni muje mwendekele kapolofweto Isaya. Wendekele ngwendi: ‘Keti mukwate ku cuma cimo ca kujwala.’—Tandeni Isaya 52:11.

13. Bihula muka bimwasa kulihula nga mulikela kulinga bilika bya matangwa a kuhwima?

¹³ Omwo mulikela kulinga bilika bya matangwa a kuhwima, hamo mwasa kulihula bihula byabingi. Mwasa kulihula ngweni: Nga bakwetu banjihula obyo kunjesi kulingila cilika ca Kilisimasi, njibakumbulula bati? Njilinga bati nga munu anjana bwana ha litangwa lya Kilisimasi? Njilinga bati nga muka-njubo yange ashaka ngwendi tulinge cilika cimo ca litangwa lya kuhwima? Njikwasa bati bana bange bonwe kubihilila nga kubalingi cilika ca Kilisimasi, nambe ca kwanuka matangwa abo a kusemuka?

14, 15. Mulinga bati nga munu amimeneka na majwi abakapangesa ha matangwa a kuhwima, nameme amyana bwana?

¹⁴ Singanyekeni mwamubwa majwi amukumbulula, nomwo mumunapande kulingila. Cakumwenako, nga munu amimeneka na majwi abakapangesa ha matangwa a kuhwima, kumwapandele kwoloka kulu embwe. Mwasa kumukumbulula ngweni: “Njakandelelako.” Oloni nga ashaka kuzibuka obyo kumwesi kulingila oco cilika, co munapande  kumulumbunwina. Lingeni ngoco mu ngozi, mu kunyanyama na mu kasingimiko. Mbimbiliya ngwayo: “Endekesi yeni simbu yoshe inapande kupwa yaibwa, ya mbwase na kubwahelelesa, co zibukeni bati mumunapande kukumbulwila mwamubwa kuli banu boshe.” (Kolose 4:6) Hamo mwasa kumuleka ngweni mwashaka kulikuwa na bakweni na kubana mabwana, oloni keti ha matangwa awa a kuhwima embwe.

¹⁵ Mulinga bati nga munu amyana bwana ha litangwa lya kuhwima? Mbimbiliya kuyatwanene mashiko mutunapande kulingila embwe. Oloni inatuleka lika ngwayo tunapande kukala na citakutaku cacibwa. (1 Timateo 1:18, 19) Hamo munu uje amyana bwana kazibuka ngwendi kumwesi kulinga cilika ca litangwa lya kuhwima. Indi hamo asa kumileka ngwendi: “Njizibuka ngwange kumwesi kulinga eci cilika ca litangwa lya kuhwima, oloni njishaka lika kumyana obu bwana.” Nga cili ngoco, mwasa kutambula obu bwana nambe kubyana. Oloni ngila imwangula inapande kumilingisa mukale na citakutaku cacibwa. Kutwapandele kulinga byuma bije bitsiya busamba bwetu na Yehova.

16. Bika bimunapande kulinga nga naanga yeni ishaka kulinga cilika ca litangwa lya kuhwima?

¹⁶ Bika bimunapande kulinga nga naanga yeni ishaka kulinga cilika ca litangwa lya kuhwima? Kumwapandele kubalwisa embwe. Nabo bali na nzili ya kulyangwila bibashaka kulinga. Kaleni na ngozi, co basingimikeni ha byuma bibashaka kulinga ngwe mumushaka neni bamisingimike. (Tandeni Mateo 7:12.) Oloni bika bimunapande kulinga nga naanga yeni ishaka mukale hamo ku cilika ca litangwa lya kuhwima? Simbu kanda mwangule byakulinga, bangeleni kulomba kuli Yehova mangana amikwase. Singanyekeniho mwamubwa, co tondeseseni oyo ñanda mu mikanda  yetu. Anukeni ngweni munapande kwangula byuma bije bizibisa Yehova kubwaha.

17. Bika bimunapande kulinga mangana bana beni bonwe kubihilila omwo bamona bakwabo balinga bilika bimo bya matangwa a kuhwima?

¹⁷ Bika bimunapande kulinga mangana bana beni bonwe kubihilila omwo bamona bakwabo balinga bilika bimo bya matangwa a kuhwima? Bisimbu bimo munapande kubalingilako byuma byabibwa. Mwasa kubana mabwana. Oloni kusikama na bana beni na kubamwesa cizemo bukebwo bwana bwakama bumwasa kubana.

18. Bika bitunapande kuila ku biwano bya baka-Kilistu?

¹⁸ Tunapande kutunda mu bulombelo bwa makuli na kumbila kuti bilika na bisemwa byabwo byoshe mangana tuzibise Yehova kubwaha. Oloni tunapande lalo kulemesa Njambi mu ngila yaibwa. Twasa kumulemesa bati ngoco? Twasa kulinga ngoco nga tuya ku biwano bya baka-Kilistu simbu yoshe. (Tandeni Vahevelu 10:24, 25.) Biwano byapwa bya seho manene mu kulemesa kwa busunga. (Myaso 22:22; 122:1) Twasa kulitakamesa umo na mukwabo ku biwano.—Loma 1:12.

19. Bika bimunapande kulekela bakweni busunga bumunalilongesa mu Mbimbiliya?

¹⁹ Mwasa lalo kulemesa Njambi mu ngila yaibwa nga muleka bakweni bimunalilongesa mu Mbimbiliya. Banu bali mu bishoti mwafwa ya byuma byabibi bili na kulingiwa mu kaye. Hamo neni muzibukako bamo. Balekeni byuma byabibwa bitunabandamena kulutwe. Nga muya ku biwano simbu yoshe na kuleka bakweni busunga bwa mu Mbimbiliya, co kumushungwiya lalo kukala mu bulombelo bwa makuli na kulinga bilika byakalamo. Nga mwangula kulemesa Yehova mu ngila yaibwa, mupwa ba kubwahelela, co lalo amibezikisa manene.—Malaki 3:10.