1. Tusimutwiya lilombelo muka lije lyatsimana manene?

BANU babangi bazibuka lilombelo lije lyatsimana manene lya Tate Yetu, nambe Lilombelo lya Mwene. Yesu wapangesele eli lilombelo mu kulongesa bandongesi bendi mwakulombelela. Walombele bika? Mwafwa bika eli lilombelo lyapwa lya seho kuli yetu ano matangwa?

2. Byuma muka byakama bitatu bije Yesu watulekele ngwendi tulombe?

² Yesu wendekele ngwendi: “Omu mukemwo mumunapande kulomba, ngweni: ‘Tate yetu uli mwilu, balemese [nambe bajelese] lizina lyobe. Bumwene bwobe bwije, cizango cobe bacilinge hano hasi, ngwe omwo bakacilingi mwilu.” (Tandeni Mateo 6:9-13.) Mwafwa bika Yesu watulekele ngwendi tulombe ebi byuma bitatu?—Taleni Biñanda bya Kushongo ha 20.

3. Bihula muka bitukumbulula muno mu capita?

³ Twalilongesele ngwetu lizina lya Njambi ikeye Yehova. Co tunasimutwiiye lalo mwashakela Njambi ngwendi banu bayoye, nomwo muhanapande kupwa hano hasi. Oloni Yesu walumbunwine bika mwendekele ngwendi: “Bumwene bwobe bwije”? Muno mu capita bakumbulula bihula bino: Bumwene bwa Njambi bwapwa buka? Bukalinga bika? Co bukajelesa bati lizina lyendi?

4. Bumwene bwa Njambi bwapwa buka? Iya ibanangula kupwa Mwene?

⁴ Yehova nashimbika fulumende yendi mwilu, co nangula Yesu kupwa Mwene. Eyi fulumende banaitumbula  mu Mbimbliya ngwabo Bumwene bwa Njambi. Yesu ikeye “Mwene ya bimyene na Shukulu ya bashukulu.” (1 Timateo 6:15) Yesu asa kulinga byuma byabibwa kutubakana baka-kuyula boshe ba bunu. Co ali na nzili manene kutukabana binzili bya baka-kuyula boshe nambe nga tubakumbasana hamo.

5. Bumwene bwa Njambi bakayula oku buli kuli? Bukayula bika?

⁵ Yesu welukile mwilu omwo mwetile matangwa 40 kutunda ha kusanguka kwendi. Mu kwita kwa simbu, Yehova wamwangwile kupwa Mwene wa Bumwene bwendi. (Vilinga 2:33) Bumwene bwa Njambi bukayula hano hasi hoshe oku buli mwilu. (Kujombolola 11:15) Mukemwo Mbimbiliya inatumbula Bumwene bwa Njambi ngwayo ‘Bumwene bwa mwilu.’—2 Timateo 4:18.

6, 7. Yesu nalisezela hali na bimyene ba bunu?

⁶ Mbimbiliya ngwayo Yesu natubakana bimyene boshe mwafwa “ikeye lika kesi kutsa.” (1 Timateo 6:16) Bimyene ba bunu bakatsi, oloni Yesu kakatsi. Byuma byoshe byabibwa byakatulingila Yesu bikakalako myaka yoshe.

⁷ Mu bupolofweto bwa mu Mbimbiliya, bamwesele ngwabo Yesu akapwa Mwene wa busunga, muka-kutetela. Bendekele ngwabo: ‘Munzinzime wa Shukulu Kalunga ukamwana mana na kuzibisisa na kunangula na nzili. Ikeye akazibuka cizango ca Shukulu Kalunga, co akamusingimika, co akajolela ha kusingimika Shukulu Kalunga. Mwene ou kakasompo ha cifwa ca munu, nambe bya kuziba lika embwe, akasompela tuhutu mwamubwa.’ (Isaya 11:2-4) Neni mushaka kukala na mwene wa cifwa eci ndi?

8. Bika twendekela ngwetu Yesu kakayulu likalyendi?

⁸ Njambi nangula banu bamo bakayule na Yesu mu fulumende  ya mwilu. Cakumwenako, kapositolo Paulu walekele Timateo ngwendi: “Nga tutwalaho na lukakateya, co [tukayula] lalo hamo nendi.” (2 Timateo 2:12) Bangahi bakayula hamo na Yesu?

9. Banu bangahi bakayula na Yesu? Simbu muka ije Njambi washangumukile kubangula?

⁹ Ngwe mutunalilongesele mu Capita 7, kapositolo Yowano bamumwesele cimona. Co wamwene Mwene Yesu nemana na bimyene beka 144,000. Aba ba 144,000 bakebo beya? Yowano wendekele ngwendi “babasonekele lizina lyendi [Yesu] na lizina lya Ishe ha maholo abo.” Co lalo wendekele ngwendi: ‘Aba bakebo baje bali na kukabangeya Muna Manga kwoshe kuje aya. Banabakulu kutunda hakati ka miyati ya banu boshe.’ (Tandeni Kujombolola 14:1, 4.) Aba ba 144,000 bapwa baka-Kilistu ba kulongwa. Njambi nabangula mangana bakapwe bimyene baje bakayula lifuti-libu. Nga umo wabo atsa, co asanguka oho bene na kuya mwilu. (Kujombolola 5:10) Tunde bene ku simbu ya tupositolo, Yehova nakala na kwangula baka-Kilistu ba kulongwa batunge cibunga ca ba banu 144,000 baje bakapwa bimyene.

10. Bika twendekela ngwetu Yehova watuzema ha kutwangwila Yesu na baje 144,000 mangana batuyule?

¹⁰ Yehova watwaka mbunge, mukemwo nabwahesa ngwendi kukale banu bamo bakayule hamo na Yesu. Yesu akatuyula mwamubwa, mwafwa atuzibuka mwamubwa. Azibuka bwino mubwafwa bunu, nomwo mukwafwa kuyanda. Paulu wendekele ngwendi Yesu “uje ibesekele mu bingila byoshe ngwe yetu,” asa “kututetela ku kuzeya kwetu.” (Vahevelu 4:15; 5:8) Aba ba 144,000 nabo bazibuka mubwafwa bunu, co banalifwiti na tupenga twabo na mishongo. Ngeci, tunakulahela ngwetu Yesu  na baje 144,000 bakatuzibisisa bwino, mwafwa bazibuka bukalu bwetu.

11. Yesu walongeselele bika bandongesi bendi balombe ngwabo cizango ca Njambi bacilinge mwilu?

¹¹ Yesu walongeselele bika bandongesi bendi balombe ngwabo cizango ca Njambi bacilinge mwilu? Mu Capita 3, twalilongesele ngwetu Satana Liyabolo watengulukilile Yehova. Oloni Yehova watabesele Satana na tungelo ba kujeneka kulongwa nambe bandemone, batumbame mwilu ha kasimbu kakandondo. Ha simbu ije, keti ngwe boshe mwilu balingile cizango ca Njambi. Tukalilongesa byabingi hali Satana na bandemone mu Capita 10.

12. Byuma byakama muka bibali bibanendeka ku Kujombolola 12:10?

¹² Mbimbiliya inamwesa ngwayo munima ya kwangula Yesu kupwa Mwene wa Bumwene bwa Njambi, akaya na kulwisa Satana. (Tandeni Kujombolola 12:7-10.) Vesi 10 inendeka byuma byakama bibali bije binapande kulingiwa. Ca kulibanga, Bumwene bwa Njambi bushangumuka kuyula oku Yesu Kilistu ikeye Mwene. Ca mu cibali, Satana bamusheka mwilu na kumumbila hano hasi. Mu mapalagilafu ali kulutwe, tumona ngwetu ebi byuma binalingiwa laja.

13. Bika byalingiwile mwilu omwo batundisilemo Satana?

¹³ Mbimbiliya ituleka ngwayo tungelo ba kulongwa babwahelelele manene omwo Satana na bandemone bendi babatundisile mwilu. Inendeka ngwayo: “Bwaheleleni yeni melu neni mwakalamo.” (Kujombolola 12:12) Mwilu muli oni kwoloka na likwatasano lyakama, mwafwa boshe balimo bali na kulinga cizango ca Njambi.

14. Bika bili na kulingiwa hano hasi omwo Satana bamutundisa mwilu?

 ¹⁴ Oloni kuyoya kunakaluwa manene hano hasi. Banu bali na kuyanda manene mwafwa “Liyabolo nashuluka hasi,” co “nashulu na bukalu omwo nazibuka ngeci kunasala lika kasimbu kakandondo kuli ikeye.” (Kujombolola 12:12) Satana nalubala mwafwa banamumbila hano hasi, co nazibuka lalo ngwendi ololo bamunyongesa. Ngeci, ali na kulifwita mangana anenele banu tuyando twa kulisezaseza.

15. Njambi ashaka ngwendi hasi hafwe bati?

¹⁵ Oloni cizango ca Njambi ca kupwisa hasi hoshe kupwa hahabwa kucatengulukile. Ashaka ngwendi banu ba kulumbunuka bakayoye myaka yoshe mu paladaisi hano hasi. (Myaso 37:29) Bumwene bwa Njambi bukashulisilila bati byuma ebi?

16, 17. Ku Ndanyele 2:44 batuleka bika ha Bumwene bwa Njambi?

¹⁶ Bupolofweto buli ku Ndanyele 2:44 ngwabwo: “Ha simbu ya baka-kuswana baje, Njambi wa mwilu akaka bumwene buje kubukahu. Naumo wahi akabufungulula, co bukanyongesa bumwene bwoshe, oloni bukebwo bukakala myaka yoshe.” Obu bupolofweto butulongesa bika ha Bumwene bwa Njambi?

¹⁷ Ca kulibanga, banatuleka ngwabo Bumwene bwa Njambi bukashangumuka kuyula “ha simbu ya baka-kuswana baje.” Oku kulumbununa ngwabo omwo bukashangumuka kuyula obu Bumwene, bukawana bifulumende bya hasi bicili na kuyula. Ca mu cibali, banatuleka ngwabo Bumwene bwa Njambi kubakabufungulula, oloni bukakalako myaka yoshe. Ca mu citatu, kukakala nzita mukati ka Bumwene bwa Njambi na bifulumende bya kaye. Bumwene bwa Njambi bukebwo bukahyana na  kupwa fulumende ije ikayula hano hasi hoshe. Banu bakakala na fulumende yaibwa ije kanda bamoneho laja.

18. Bumwene bwa Njambi bukalwa nzita ya mamaneselelo na bifulumende bya kaye. Ije nzita baisana bati?

¹⁸ Bumwene bwa Njambi bukashangumuka bati kuyula hasi hoshe? Simbu kanda nzita ya mamaneselelo ya Alamagidoni ishangumuke, bandemone bakongumuna “bimyene ba hano ha kaye hoshe na kubakungulwila hamolika ku nzita ha litangwa lyakama lya Njambi Muka-nzili Yoshe.” Bifulumende bya banu bikalwa na Bumwene bwa Njambi.—Kujombolola 16:14, 16; taleni Biñanda bya Kushongo ha 10.

19, 20. Bika bitushakela ngwetu Bumwene bwa Njambi buyule hasi hoshe?

¹⁹ Bika bitutondela Bumwene bwa Njambi? Ca kulibanga, twapwa tu baka-bubi, co tukabinji na kutsa. Oloni Mbimbiliya inendeka ngwayo mu Bumwene bwa Njambi, tukayoya myaka yoshe. Ku Yowano 3:16 ngwabo: “Njambi wazemene baka-kaye manene ngeci wanene Munendi umolika, ngeci woshe akulahela kuli ikeye keti anyonge, oloni akale na mwonyo wa myaka yoshe.”

²⁰ Ca mu cibali, tutonda Bumwene bwa Njambi mwafwa tuli na kuyoya hamo na banu bababi. Babangi bali na kukwisa na kulinga byuma byabibi. Kutwasa kubanyongesa, oloni Njambi lika ikeye akabanyongesa. Banu bababi baje bali na kulinga bubi, bakanyonga ha nzita ya Alamagidoni. (Tandeni Myaso 37:10.) Ca mu citatu, tutonda Bumwene bwa Njambi mwafwa bifulumende bya banu binonwa kuyula bwino, oloni binashulu lika bukenya na bubi. Kubyesi na kukwasa banu bononoke Njambi. Mbimbiliya ngwayo “munu natumbama na nzili hali mukwabo munu mangana amuyandese.”—Muka-kwambulula 8:9, NWT.

21. Bumwene bukashulisilila bati cizango ca Njambi hano hasi?

 ²¹ Munima ya Alamagidoni, Bumwene bwa Njambi bukashulisilila cizango ca Njambi hano hasi. Cakumwenako, bukatundisako Satana na bandemone bendi. (Kujombolola 20:1-3) Co naumo wahi akabinja nambe kutsa. Ndando ya kupatula ikakwasa banu ba kulongwa bakayoye myaka yoshe mu Paladaisi. (Kujombolola 22:1-3) Obu Bumwene bukajelesa lizina lya Njambi. Oku kujelesa kulumbununa bika? Kulumbununa ngwabo muikayula fulumende ya Njambi hano hasi, banu boshe bakasingimika lizina lyendi.—Taleni Biñanda bya Kushongo ha 21.

22. Tunazibuka bati ngwetu Yesu kapwile Mwene omwo wakele hano hasi, nambe ha simbu ije bene welukile mwilu?

²² Yesu walongesele bandongesi bendi balombe ngwabo: “Bumwene bwobe bwije.” Oku kwamwesele ngwabo Bumwene bwa Njambi bukaija kulutwe. Yehova akalibanga tahi kushimbika Bumwene bwendi, co akangula Yesu kupwa Mwene. Kuma Yesu bamwangwile kupwa Mwene ha simbu ije bene welukile mwilu ndi? Embwe, wabandamenene tahi. Omwo mwetile simbu kutunda ha kusanguka kwa Yesu, Petulu na Paulu balumbunwine bwino  omwo Yesu akashulisilila bupolofweto buli ku Myaso 110:1. Omu mu bupolofweto, Yehova wendekele ngwendi: “Tumbama ku liboko lyange lya cilyo, noho njifungulula bitozi bobe.” (Vilinga 2:32-35; Vahevelu 10:12, 13) Simbu ya kupwa muli yapandele kubandamena Yesu asinoni Yehova amupwise Mwene?

23. (a) Yesu washangumukile kuyula mwaka uka mu Bumwene bwa Njambi? (b) Bika bitulilongesa mu capita inatako?

²³ Ha myaka yaingi te na mwaka wa 1914 kanda wete, baka-Kilistu ba busunga bazibukile ngwabo ou mwaka wa 1914 ukapwa wa kulitila mu bupolofweto bwa mu Mbimbiliya. Byuma binalingiwa mu kaye kushwa mu 1914 bimwesa ngwabyo byuma bibendekele bya busunga. Yesu washangumukile kuyula mu mwaka ou bene. (Myaso 110:2) Omwo Yesu washangumukile kuyula, wombilile Satana hano hasi. Ngeci, Satana nasala lika na “kasimbu kakandondo.” (Kujombolola 12:12) Mu capita inatako tulilongesa byuma byabingi bije bimwesa ngwabyo tuli mu matangwa a kukotoka. Tulilongesa lalo ngwetu Bumwene bwa Njambi ololo bushulisilila cizango ca Njambi hano hasi.—Taleni Biñanda bya Kushongo ha 22.