1. Bika bimwasa kusinganyeka munina ya kulilongesa eli libulu?

MUNO mu libulu munalilongesamo biñanda byabingi bya mu Mbimbiliya. Munalilongesa ngweni Njambi nakulahesa banu kukayoya myaka yoshe. Munazibuka cifwa cibalimo batsi na likulahelo lya kusanguka. (Muka-kwambulula 9:5; Luka 23:43; Yowano 5:28, 29; Kujombolola 21:3, 4) Hamo munashangumuka kuya ku biwano bya Bakaleho ba Yehova, co munalimwena ngweni bali na kulemesa Njambi mu busunga. (Yowano 13:35) Hamo munashangumuka kulikuta busamba na Yehova na kumona ngweni munapande kumupangela. Hamo munalihula ngweni, ‘Bika binjinapande kulinga mangana njipangele Njambi?’

2. Uje Kaisopya washakelele bika kumumbwitika?

 ² Omwo mukemo mwalingile munalume umo wa Kaisopya mu matangwa a Yesu. Litangwa limo, munima ya kusanguka kwa Yesu, ndongesi yendi Filipu wambulwile muzimbu kuli ou munalume. Filipu wamwesele uje munalume ngwendi Yesu ikeye Mesiya. Byuma byalilongesele uje munalume wa Kaisopya byamukwatele ku mbunge. Ngeci wendekele ngwendi: “Kenga, mema awa. Bika lalo byasa kunjibindika kunjimbwitika?”—Vilinga 8:26-36.

3. (a) Yesu washikile bika baka-kumukabangeya? (b) Munu banapande kumumbwitika bati?

³ Mbimbiliya inamwesa ngwayo nga mushaka kupangela Yehova, co banapande tahi kumimbwitika. Yesu walekele baka-kumukabangeya ngwendi: ‘Yeni ku miyati ya banu na kubapwisa bandongesi, co bambwitikeni.’ (Mateo 28:19) Yesu natumwesa mwanja mwafwa nendi bamumbwitikile. Bamumbwitikile woshe mu mema, keti kumushamwina lika mema ku mutwe embwe. (Mateo 3:16) Ano matangwa, nga bambwitika muka-Kilistu, banapande kumumbwitika nambe kumuzimika mu mema.

4. Nga bamimbwitika, mumwesa bika ku bakweni?

⁴ Nga bamimbwitika, mumwesa bakweni ngweni mushaka kupwa kabusamba ka Njambi na kumupangela. (Myaso 40:7, 8) Nga kanda bamimbwitike, co lihuleni ngweni: ‘Bika binjinapande kulinga mangana banjimbwitike?’

5. (a) Bika bimunapande tahi kulinga simbu kanda bamimbwitike? (b) Biwano bya baka-Kilistu bimikwasa bati?

⁵ Munapande tahi kuzibuka Yehova na Yesu simbu kanda bamimbwitike. Munashangumuka laja kubazibuka omwo muli na kulilongesa Mbimbiliya. (Tandeni Yowano 17:3.) Oloni kumwapandele kulilongesa lika Mbimbiliya  embwe. Mbimbiliya ngwayo munapande ‘kushula na mana a cizango’ ca Yehova. (Kolose 1:9) Biwano bya Bakaleho ba Yehova bimikwasa mulikute busamba na Yehova. Ngeci, munapande kukala ku biwano simbu yoshe.— Vahevelu 10:24, 25.

6. Bilongesa muka bya mu Mbimbiliya bimunapande kuzibuka simbu kanda bamimbwitike?

⁶ Yehova kashaka ngwendi kubanga muzibuke byoshe bili mu Mbimbiliya asinoni bamimbwitike embwe. Kasinganyekele ngwendi uje Kaisopya kubanga azibuke Mbimbiliya yoshe asina bamumbwitike embwe. (Vilinga 8:30, 31) Tutwalelela kulilongesa bya Njambi myaka yoshe. (Muka-Kwambulula 3:11) Oloni simbu kanda bamimbwitike, munapande kuzibuka na kutaba bilongesa bya maputukilo bya mu Mbimbiliya.—Vahevelu 5:12.

7. Kulilongesa Mbimbiliya kunamikwasa bati?

⁷ Mbimbiliya ngwayo: “Nga likulahelo lyahi, kutwasa kuzibisa Njambi kubwaha.” (Vahevelu 11:6, NWT) Ngeci munapande tahi kukala na likulahelo asinoni bamimbwitike. Mbimbiliya inatuleka ngwayo banu bamo ba mu nganda ya Kolinte bazibile byuma bibabalongesele kuli bandongesi ba Yesu, ngeci “bakulahelele, co babambwitikile.” (Vilinga 18:8) Neni kulilongesa Mbimbiliya kunamikwasa mukulahele byuma byanakulahesa Njambi na ñombelo ya Yesu ya kutupatula ku bubi na ku kutsa.—Yoshwa 23:14; Vilinga 4:12; 2 Timateo 3:16, 17.

8. Bika bimilingisa mulekeko bakweni bimuli na kulilongesa?

⁸ Likulahelo lyeni likanyama omwo mulilongesa manene Mbimbiliya na kumona muili na kumikwasela mu kuyoya kweni. Oku kumilingisa mulekeko bakweni bimuli  na kulilongesa. (Njelemiya 20:9; 2 Kolinte 4:13) Oloni beya bamunapande kulekako bimuli na kulilongesa?

9, 10. (a) Beya bamwasa kushangumuka kuleka bimuli na kulilongesa? (b) Bika bimunapande kulinga nga mushaka kwambulwila hamo na cikungulukilo?

⁹ Munasa kuleka babushoko bweni, babusamba beni, bamwatunga nabo na bakweni baka-bipangi byuma bimuli na kulilongesa. Mulinga mwamubwa kubaleka, oloni endekeni nabo mu cizemo. Mu kwita kwa simbu, mukashangumuka kwambulwila hamo na cikungulukilo. Ha simbu oyo imuliziba ngweni muneteho, munapande kuleka Mukaleho uje ali na kumilongesa ngweni mushaka kwambulwila hamo na cikungulukilo. Nga mulongesi weni amona ngwendi mwasa, co lalo muli na kukabangeya mashiko a mu Mbimbiliya mu kuyoya kweni, co mu bubali bweni mukaliwana na bakulunu babali ba cikungulukilo.

¹⁰ Bika bimukasimutwiya mumukaliwana na bakulunu? Bakulunu bakasimutwiya neni mangana bamone indi munazibisisa bilongesa bya maputukilo bya mu Mbimbiliya na kumona indi muli na kubikabangeya mu kuyoya kweni. Bakashaka lalo kuzibuka indi cili bene mushaka kupwa Mukaleho wa Yehova. Zibukeni ngweni bakulunu bakebo bali na kunyunga banu boshe mu cikungulukilo, hamo lika neni. Ngeci kumwapandele kuziba lyoba kusimutwiya nabo. (Vilinga 20:28; 1 Petulu 5:2, 3) Munima ya kusimutwiya nabo, bakamileka indi munapande kushangumuka kuila hamo na cikungulukilo mu kwambulula.

11. Mwafwa bika munapande kumbila bilinga bimo simbu kanda mushangumuke kwambulwila hamo na cikungulukilo?

¹¹ Bakulunu banasa kumileka ngwabo kucili bilinga bimo bimunapande kumbila asina mushangumuka kwambulwila  hamo na cikungulukilo. Mwafwa bika munapande kumbila obyo bilinga? Omwo tuleka bakwetu bya Njambi, tuli na kwimanena Yehova. Ngeci yoyesi yetu inapande kunena kasingimiko kuli ikeye.—1 Kolinte 6:9, 10; Ngalatiya 5:19-21.

12. Mwafwa bika banu boshe banapande kutenguluka?

¹² Kuli byuma bikwabo bimunapande kulinga simbu kanda bamimbwitike. Kapositolo Petulu wendekele ngwendi: “Tengulukeni, asinoni ilukeni kuli Njambi, ngeci amisambese ku bibi byeni.” (Vilinga 3:19) Kutenguluka kulumbununa bika? Kutenguluka kunapu kuliziba kubihya ha bubi bwoshe bumunalingi. Cakumwenako, nga mwalikobelesele mu bilinga bya bukwizi, co munapande kutenguluka. Nameme bene mwakala na futisi yaibwa, anga munapande kutenguluka mwafwa tubaboshe tukabiisa, co tunapande kulomba Njambi atusambese.—Loma 3:23; 5:12.

13. ‘Kwiluka kuli Njambi’ kulumbununa bika?

¹³ Kuliziba lika kubihya ha bubi bumunalingi kunapumo ndi? Embwe. Petulu wendekele lalo ngwendi “ilukeni kuli Njambi.” Oku kulumbununa ngwabo munapande kwecela bilinga byabibi na kushangumuka kulinga byabibwa. Acisinganyekeni ngweni muli na kuya ku mutambela uje kumuzibuka. Omwo mweta ha mwela umo, munanguka ngweni muli na kuya mu ngila yeka. Mulinga bati? Twakulahela ngwetu mwimana, co mutenguluka na kuya mu ngila inapande. Mu cifwa cimolika, omwo mulilongesa Mbimbiliya munanguka bifwa bimo na bilinga bije bimunapande kwecela. Ngeci “ilukeni kuli Njambi,” nambe ngwetu eceleni bilinga byabibi na kushangumuka kulinga byabibwa.

14. Mwasa kulikundika bati kuli Njambi?

¹⁴ Munapande lalo kulikundika kuli Yehova simbu kanda bamimbwitike. Oku kunapu kwa seho manene. Mulikundika kuli Yehova nga mumukulahesa mu lilombelo ngweni mushaka kupangela lika ikeye na kutwameka cizango cendi kulutwe mu kuyoya kweni.—Kwituluka mu Mashiko 6:15.

15, 16. Bika bishongangeya munu alikundike kuli Njambi?

¹⁵ Munu uje akulahesa kupangela lika Yehova, nalifu na munu uje akulahesa mukwabo ngwendi akala nendi mu kuyoya kwendi kwoshe. Acisinganyekeni hali munalume uje atonda munakazi wa kwambata. Omwo munalume ananguka bubwa bwa munakazi yanangula, kumulingisa amuzeme na kushaka kumwambata. Nameme bulo kubwapwile bwabwasi, oloni munalume ambata uje munakazi mwafwa namuzeme.

¹⁶ Neni omwo muzibuka Yehova, mumuzema na kushaka kumupangela. Oku kumilingisa mumukulahese mu lilombelo ngweni mushaka kumupangela. Mbimbiliya ngwayo woshe uje ashaka kukaba Yesu napande “kulibyana ikeye babenya.” (Mako 8:34) Mwasa kulibyana bati? Mumwesa ngweni munalibyana nga mwononoka Yehova simbu yoshe. Byuma byashaka Yehova bikebyo bipwa bya seho manene kutubakana bimushaka yeni.—Tandeni 1 Petulu 4:2.

17. Mwafwa bika banu bamo kubesi kushaka kulikundika kuli Yehova?

¹⁷ Banu bamo kubesi kushaka kulikundika kuli Yehova. Bakatewe ngwabo hamo bonowa kumupangela, co bamuzibisa  kubihya. Beka bakasinganyeka ngwabo nga kubalikundikile kuli Yehova, co kabana mulonga ha byuma bibalinga.

18. Bika bimikwasa mwonwe kumutewa ngweni hamo muzibisa Yehova kubihya?

¹⁸ Nga muzema Yehova, co kumutewe ngweni hamo mumuzibisa kubihya. Mulinga mumwasela mwoshe mangana mushulisilile bimunamukulahesa mwafwa mwamuzema. (Muka-kwambulula 5:4; Kolose 1:10) Kumusinganyeka ngweni kulinga cizango ca Yehova kwapwa kwakukalu. Kapositolo Yowano wasonekele ngwendi: “Omwo cizemo cetu kuli Njambi cilumbunuka ngeci twononoke mashiko endi. Co mashiko endi keti amakalu kuli yetu embwe.”—1 Yowano 5:3.

19. Bika bimunapande kulikundikila kuli Yehova nameme kumwalumbunukile?

¹⁹ Likundikeni kuli Yehova nameme kumwalumbunukile. Yehova kesi kushaka ngwendi tulinge byuma bije kutwasa. (Myaso 103:14) Amikwasa mangana mulinge byabibwa. (Isaya 41:10) Kulaheleni Yehova na mbunge yeni yoshe, co ‘akamimwesa bingila bya busunga.’—Visimo 3:5, 6.

20. Munima ya kulikundika kuli Yehova, cuma muka cikwabo cimunapande kulinga?

²⁰ Muli na kuliziba ngweni munapande kulikundika kuli Yehova ndi? Munima ya kulikundika kuli Yehova, munapande lalo kulinga cuma cikwabo. Munapande kumbwitikiwa.

21, 22. Mwasa “kulitabela” bati ku mbunga ngweni muli na likulahelo?

²¹ Lekeni muka-kukwatasanesa cibunga ca bakulunu  ngweni mwalikundika kuli Yehova, co mushaka kumimbwitika. Muka-kukwatasanesa aleka bakulunu bamo mangana betuluke neni mu bilongesa bya maputukilo bya mu Mbimbiliya. Nga bamona ngwabo munapwisamo, co bamileka ngwabo bamimbwitika ha ciwano ca citingitingi nambe ca mutambela. Oku ku ciwano bakendeka ñanda ije ikalumbununa mwamubwa cimbwitiko. Uje akana eyi ñanda akehula baje baya ku cimbwitiko bihula bibali byabyasi. Kukumbulula  ebi bihula kumwesa ngwabo ‘munalitabela’ ku mbunga ngweni muli na likulahelo.—Loma 10:10.

²² Munima ya kukumbulula ebi bihula, co bakamimbwitika. Bakamizimika mu mema mbwitititi. Kumimbwitika kumwesa banu boshe ngwabo munalikundika kuli Yehova, co munapu Mukaleho wa Yehova.

23. Kumbwitika “mu lizina lya Tate na Mwana na munzinzime wa kujela” kulumbununa bika?

²³ Yesu wendekele ngwendi bandongesi bendi bakabambwitika “mu lizina lya Tate, na Mwana, na munzinzime wa kujela.” (Tandeni Mateo 28:19.) Oku kulumbununa bika? Kulumbununa ngwabo munataba ngweni Yehova ikeye amiyula. Co mwazibuka cipangi cali naco Yesu mu kushulisilila biyongola bya Njambi. Co lalo munazibuka mwali na kupangesela Njambi sipilitu yendi ya kujela mu kushulisilila biyongola byendi.—Myaso 83:18; Mateo 28:18; Ngalatiya 5:22, 23; 2 Petulu 1:21.

24, 25. (a) Cimbwitiko cimanena bika? (b) Bika bitulilongesa mu capita ya mamaneselelo?

²⁴ Cimbwitiko cimanena cuma cimo cakama manene. Kumimbwitika mu mema, kulumbununa ngwabo munatsi nambe munaseze yoyesi yeni ya laja. Co kutufuka mu mema, kulumbununa ngwabo mwashangumuka yoyesi yaiha ya kulinga cizango ca Njambi. Mumwesa ngweni mupangela Yehova kushangumuka ha litangwa eli. Zibukeni ngweni kumwalikundikile ku munu, ku munga nambe ku cipangi cimo embwe. Oloni munalikundika kuli Yehova.

²⁵ Nga mulikundika kuli Yehova na kumibwitika, kumikwasa mukale mu busamba bwabubwa na Yehova. (Myaso 25:14) Oloni kukulumbununa ngwabo nga banamimbwitika, co kunahu munoboka, embwe. Kapositolo Paulu wasonekele ngwendi: ‘Twaleleleniho kupangela kwoboka kweni na lyoba na kujaja.’ (Filipu 2:12) Cimbwitiko cinapu lika maputukilo a kutwala ku kwoboka. Oloni mwasa kutwalelelaho bati busamba bweni na Yehova? Capita inako ya mamaneselelo ikumbulula eci cihula.