CAPITA 12
Mwasa Kupwa Bati Kabusamba ka Njambi?
1, 2. Beya baje bapwile babusamba ba Yehova?
MUNU wa kufwa bati imushaka kulikuta nendi busamba? Hamo mushaka munu uje imwazema, imukalizibasana nendi. Munu uje wakala na ngozi na bifwa byabibwa bimwazema.
2 Yehova Njambi akangula banu bamo bapwe babusamba bendi. Cakumwenako, Abilahama wapwile kabusamba ka Yehova. (Isaya 41:8; Yakomba 2:23) Yehova wazemene lalo Ndabiti. Wendekele ngwendi Ndabiti “ikeye munalume injazema.” (Vilinga 13:22) Kapolofweto Ndanyele nendi ‘bamuzemene’ kuli Yehova.—Ndanyele 9:23.
3. Mwafwa bika Abilahama, Ndabiti na Ndanyele bapwile babusamba ba Yehova?
3 Bika byalingisile Abilahama, Ndabiti na Ndanyele balikute busamba na Yehova? Yehova walekele Abilahama ngwendi: “Yobe unononoka kushika kwange.” (Kushangumuka 22:18) Yehova ali na kulikuta busamba na baje bamwononoka. Asa kulikuta busamba na muyati wa banu. Yehova wendekele ku muyati wa Isalele ngwendi: ‘Nga munjononoka, yange njikapwa nji Njambi yeni, neni mukapwa banu bange.’ (Njelemiya 7:23) Ononokeni Yehova mangana mupwe kabusamba kendi.
YEHOVA AKANYUNGU BABUSAMBA BENDI
4, 5. Yehova ali na kunyunga bati babusamba bendi?
4 Mbimbiliya inendeka ngwayo Yehova ashaka kumwesa “nzili baje banakulahela kuli ikeye na bimbunge byabo byoshe.” (2 Mizimbu 16:9) Ku Myaso 32:8, Yehova nakulahesa woshe uje apwa kabusamba kendi ngwendi: “Njikakulongesa ngila ije iunapande kwendelamo, co njikakulongesa na kukunangula.”
5 Kuli umo citozi wa nzili ashaka kutwonowesa kulikuta busamba na Njambi. Oloni Yehova ashaka kutunyunga. (Tandeni Myaso 55:22.) Tuli na kupangela Yehova na mbunge yetu yoshe mwafwa wapwa kabusamba ketu. Tuli na kumwononoka nameme mu simbu yaikalu. Tuli na likulahelo lyakele nalyo muka-kwimba. Wendekele hali Yehova ngwendi: “Simbu yoshe Shukulu Kalunga ali muyehi nange mu kunjikwasa, co nacimo cahi casa kunjizibisa lyoba.” (Myaso 16:8; 63:8) Satana ashaka bati kutwonowesa kulikuta busamba na Njambi?
SATANA ALI NA KUBANGEYA BANU
6. Satana ali na kubangeya bika banu?
6 Mu Capita 11 twalilongesele ngwetu Satana wabangeyeye Yehova ngwendi wapwa muka-makuli, co lalo ntwama wamubi mwafwa katabesele ba Adama na Eva balyangwile bakebo babenya byuma byabibwa nebi byabibi. Ku mukanda wa Yombi banatuleka ngwabo Satana ali na kubangeya banu baje bashaka kulikuta busamba na Njambi. Satana nendeka ngwendi banu kubesi na kupangela Yehova mwafwa ya cizemo embwe, oloni bali na kumupangela mwafwa ya byuma byali na kubalingila. Nendeka lalo ngwendi asa kungumuna ngamba ya Njambi woshe woshe. Tumoneni byuma bitulilongesa kuli Yombi nomwo mubamunyungililile kuli Yehova.
7, 8. (a) Yehova wamwene bati Yombi? (b) Satana wendekele bika hali Yombi?
7 Yombi wapwile iya? Wapwile munu wamubwa uje wayoyele kusañulu myaka 3,600 inetimo. Yehova wendekele ngwendi ha simbu ije kukwakele munu wa kulifwa nendi hano hasi. Yombi wasingimikile manene Njambi, co wazindile bubi. (Yombi 1:8) Yombi wapwile kabusamba ka Yehova.
8 Satana wendekele ngwendi Yombi wapangelele Njambi mwafwa ya byuma byamulingilile. Satana walekele Yehova ngwendi: “Omwo yobe ukamunyungu simbu yoshe na naanga yendi na byuma byoshe ali nabyo. Co ukabezikisa byuma byoshe byalinga, co yobe unamwana bingombe babangi manene baje banashulisa lifuti lyoshe. Oloni nga utundisa byuma byoshe ebi byali nabyo, co akakushaula citona-mesho.”—Yombi 1:10, 11.
9. Yehova watabesele Satana alinge bika?
9 Satana wabangeyeye Yombi ngwendi wapangelele Yehova mwafwa ya byuma byamulingilile. Satana wendekele lalo ngwendi asa kwonowesa Yombi kupangela Yehova. Yehova wabyanene awa majwi a Satana. Ngeci wamutabesele eseke Yombi mangana alimwene ngwendi Yombi wazemene Yehova.
SATANA ALWISA YOMBI
10. Satana walwisile bati Yombi? Co Yombi walingile bati?
10 Satana wabangele tahi kunyongesa bimuna ba Yombi boshe. Kutundaho, watsiile bangamba ba Yombi babangi. Byuma bya Yombi byoshe byanyongele. Kutundaho lalo, Satana watsiile bana ba Yombi 10 ku lihunzi lyakama. Oloni Yombi watwaleleleho kulongwa kuli Yehova. “Mu byuma byoshe ebi byalingiwile, Yombi kalingile bubi nambe kushaula Njambi.”—Yombi 1:12-19, 22.
Yehova wabezikisile Yombi mwafwa wapwile kabusamba kendi wa kulongwa
11. (a) Cuma muka cikwabo calingile Satana kuli Yombi? (b) Yombi walingile bati?
11 Satana kalikelele embwe. Walwisile Njambi omwo wendekele ngwendi: “Aceseke kukwata ku mubila wendi, co akakushaula citona-mesho.” Satana wabinjisile Yombi mushongo waubi. (Yombi 2:5, 7) Oloni Yombi anga wapwile wa kulongwa kuli Yehova. Wendekele ngwendi: “Kunjumbila kuti kulongwa kwange kubanga noho hanjikatsila.”—Yombi 27:5, NWT.
12. Yombi wamwesele bati ngwendi Satana wendekele makuli?
12 Yombi kazibukile ngwendi Satana ikeye wakele na kumubangeya, co kazibukile lalo obyo wakele na kuyandela. Wasinganyekele ngwendi Yehova ikeye wakele na kumuyandesa. (Yombi 6:4; 16:11-14) Nameme ngoco, Yombi watwaleleleho kupwa wa kulongwa kuli Yehova. Ngeci Satana walimwenenene ngwendi Yombi kapangelele Njambi mwafwa ya byuma byamulingilile. Wamupangelele mwafwa wamuzemene. Satana wabangeyeye Yombi byuma bya makuli.
13. Bika byalingile Yehova ha kulongwa kwa Yombi?
13 Yombi kazibukile byakele na kulingiwa mwilu. Oloni wononokele kuli Njambi na kumwesa ngwendi Satana wapwa wamubi. Yehova wabezikisile Yombi mwafwa wapwile wa kulongwa.—Yombi 42:12-17.
BYALI NA KUMIBANGEYA SATANA
14, 15. Satana ali na kubangeya bika banu boshe?
14 Mwasa kulilongesa cilongesa cakama ku byuma byalingiwile kuli Yombi. Nameme ano matangwa, Satana ali na kutubangeya ngwendi tuli na kupangela Yehova mwafwa ya byuma byali na kutwana. Ku Yombi 2:4, Satana wendekele ngwendi: “Munu ana byoshe bije ali nabyo ngeci ayoye.” Satana kabangeyeye lika Yombi embwe, oloni nabangeya banu boshe. Omwo mwetile myaka yaingi kutunda ha kutsa kwa Yombi, Satana anga wakele na kushaula Yehova na kubangeya bangamba bendi. Cakumwenako, ku Visimo 27:11 ngwabo: “Munange, kala na mana, co njikabwahelela njikasa kukumbulula munu woshe uje anjipaya [nambe anjishaula].”
15 Neni mwasa kwononoka Yehova na kupwa kabusamba kendi wa kulongwa mangana mumwese ngweni Satana wapwa muka-makuli. Nga mumona ngweni munapande kutengululako byuma bimo mu buyoye bweni mangana mulikute busamba na Njambi, co lingeni ngoco. Kulikuta busamba na Njambi kunapu kwa seho manene. Satana ngwendi kumwasa kupwa ba kulongwa kuli Yehova nga muli mu bukalu. Ali na kutukwisa mangana atwonowese kupwa ba kulongwa kuli Njambi. Ali na kutukwisa bati?
16. (a) Bingila muka byali na kupangesa Satana mangana atwonowese kupangela Yehova? (b) Batico yeni, Liyabolo asa kumyonowesa bati kupangela Yehova?
16 Satana ali na kupangesa bingila byabingi mangana atwonowese kulikuta busamba na Njambi. Ali na kutulupukila “ngwe ndumba ashakezeka umo ngeci amusanyozole.” (1 Petulu 5:8) Keti mukomoke nga babusamba beni, babushoko bweni, nambe banu beka bamibindika kulilongesa Mbimbiliya na kulinga byabibwa. Munasa kuliziba ngweni bali na kumilwisa. * (Yowano 15:19, 20) Satana ali na kulipwisa lalo “ngwe kangelo ka mutanya.” Ngeci asa kutukwisa mangana atwonowese kwononoka Yehova. (2 Kolinte 11:14) Kuli ngila ikwabo lalo yali na kupangesa Satana mangana atwonowese kupangela Yehova. Ashaka tulizibe ngwetu kutufwila kupwa bangamba ba Njambi.—Visimo 24:10.
ONONOKENI MASHIKO A YEHOVA
17. Bika bituli na kwononokela Yehova?
17 Nga twononoka Yehova, co tumwesa ngwetu Satana wapwa muka-makuli. Bika bitukwasa twononoke? Mbimbiliya ngwayo: “Zemeni Shukulu Kalunga Njambi yeni na bimbunge byeni byoshe, na mwonyo weni woshe, na nzili yeni yoshe.” (Kwituluka mu Mashiko 6:5) Twononoka Yehova mwafwa twamuzema. Nga tuzema manene Yehova, co tulinga byuma byoshe byatuleka. Kapositolo Yowano wasonekele ngwendi: “Omwo cizemo cetu kuli Njambi cilumbunuka ngeci twononoke mashiko endi. Co mashiko endi keti amakalu kuli yetu embwe.”—1 Yowano 5:3.
18, 19. (a) Byuma muka bimo byanatuleka Yehova ngwendi byabibi? (b) Bika twendekela ngwetu Yehova kesi kutuleka tulinge byuma bije kutwasa kulinga?
18 Byuma muka bimo byanatuleka Yehova ngwendi byabibi? Taleni ebi byuma bimo mu cipalo ca “ Zindeni Byuma Byazinda Yehova.” Byuma bimo bili mu cipalo munasa kubimona ngweni kubyabihile. Oloni omwo mutanda Bisoneka na kubisinganyekesesa, mumona ngwendi kwakubwa kwononoka mashiko a Yehova. Munasa kumona ngweni munapande kwecela byuma bimo mu buyoye bweni. Kwecela byuma bimo kunasa kupwa kwakukalu, oloni nga mulinga ngoco, mubwahelela na kukala mu kwoloka mwafwa ya kupwa kabusamba ka Njambi. (Isaya 48:17, 18) Bika twendekela ngwetu munu nasa kwecela ebi bilinga byabibi?
19 Yehova kesi kutuleka tulinge byuma bije kutwasa kulinga. (Kwituluka mu Mashiko 30:11-14) Wapwa kabusamba ketu, co atuzibuka mwamubwa kutubakana mutulizibukila yetu babenya. Azibuka nzili yetu na buzeye bwetu. (Myaso 103:14) Kapositolo Paulu natukanyamesa ngwendi: “Njambi akanyungu cikulaheso cendi, co kataba ngeci bamyeseke na byeseko bya kutubakana nzili yeni ngeci mwimane mbe, ha simbu ije bamyeseka, ikeye akamyana nzili ya kukolesa, co amishokolwela ngila ngeci mwase kutundamo.” (1 Kolinte 10:13) Tukulaheleni ngwetu Yehova atwana nzili ya kulinga byabibwa. Amyana nzili ya kutubakana ije ya banu mangana mwase kulifwita na bukalu. (2 Kolinte 4:7) Paulu bamukwasele kuli Yehova mu simbu ya bukalu. Ngeci wendekele ngwendi: “Njinakanyama mu byuma byoshe mwafwa kuli umo ali na kunjana nzili.”—Filipu 4:13, NWT.
ZEMENI BYUMA BYAZEMA YEHOVA
20. Bifwa muka bya Njambi bimunapande kutembwinina, co mwafwa bika?
20 Nga tushaka kupwa kabusamba ka Yehova, co tulikeleni kulinga byuma byazinda. Oloni kuli byuma bikwabo lalo bitunapande kulinga. (Loma 12:9) Babusamba ba Njambi bazema byuma byazema. Ebi byuma banabitumbula ku Myaso 15:1-5. (Tandeni.) Babusamba ba Yehova banapande kutembwinina bifwa byendi bya kufwa ngwe “cizemo, kujolela, kwoloka, lukakateya, ngozi, bubwa, kulongwa, kulikehesa, na kulinyunga.”—Ngalatiya 5:22, 23.
21. Mwasa kumwesa bati bifwa byazema Yehova?
21 Mwasa kumwesa bati ebi bifwa byabibwa? Mumwesa ebi bifwa nga muzema byuma byazema Yehova kwitila mu kutanda Mbimbiliya na kulilongesayo simbu yoshe. (Isaya 30:20, 21) Nga mulinga ngoco, co muzema manene Yehova na kumilingisa mumwononoke.
22. Bubwa muka bumuwana mu kwononoka Yehova?
22 Munapande kwecele bilinga byabibi na kukala na bilinga byabibwa. Oku kunalifu na kushulula buzalo bwa laja na kuzala buzalo bwabuha. Mbimbiliya ngwayo munapande ‘kushulula bunu bwa laja’ na ‘kuzala bunu bwabuha.’ (Kolose 3:9, 10) Nameme kwakukalu kutenguluka, oloni Yehova natukulahesa kutwana “cikandelela” nga tulinga ngoco. (Myaso 19:11) Anguleni kupangela Yehova mangana mumwese ngweni Satana wapwa muka-makuli. Pangeleni Yehova mwafwa ya kumuzema, keti mwafwa ya bwana bumukatambula kulutwe embwe. Nga mulinga ngoco, co mupwa kabusamba kendi.
^ par. 16 Oku kukulumbununa ngwabo Satana ali na kupangesa baje bashaka kumibindika kulilongesa Mbimbiliya embwe. Oloni Satana wapwa ‘njambi wa kano kaye,’ co ‘kaye koshe kali mu nzili yendi.’ Ngeci kutwapandele kukomoka nga kuli bamo batubindika kupangela Yehova.—2 Kolinte 4:4; 1 Yowano 5:19.
