1, 2. Kuli kutwasa kutewela ano matangwa?

ACISINGANYEKENI ngweni muli na kwenda hanja oku lihunzi lili na kupekula. Kwilu kushangumuka kulifwika, co mihyato na mikalateto iputuka. Mu kasimbu kakandondo lika, nyonzi ishangumuka kunyoka. Co mutala noku noku mangana muwane kwa kubanda. Muliziba bati nga muwana mwela waubwa wa kubanda? Muliziba ku mbunge hehu.

² Netu ano matangwa tuli mu bukalu bwa cifwa eci. Byuma mu kaye bili na kubihya manene. Munasa kulihula ngweni, ‘Kuli kunjitewela?’ Munu umo wa mu Mbimbiliya wasonekele ngwendi: “Yobe wapwa butewelo bwange na cimpaka cange. Yobe wapwa u Njambi yange, kuli yobe njinakulahela.” (Myaso 91:2) Yehova ikeye asa kutukwasa mu bukalu bwetu, co natukulahesa byuma byabibwa kulutwe.

3. Yehova asa kupwa bati butewelo bwetu?

³ Yehova asa kutunyunga bati? Asa kutukwasa tulifwite na bukalu bwoshe bwoshe butuliwana nabwo, mwafwa wakala na nzili manene kutubakana banu baje bashaka kutubulumuna. Nameme tuliwana mu bukalu ano matangwa, oloni twasa kukulahela ngwetu kulutwe Yehova akabumanesa. Mbimbiliya itushongangeya ngwayo: “Kaleni mu cizemo ca Njambi.” (Yunda 21) Tunapande kutwalelelaho busamba bwetu na Yehova mangana atukwase mu simbu ya bukalu. Oloni twasa kulinga bati ngoco?

4, 5. Yehova natumwesa bati cizemo cendi?

⁴ Nga tushaka ngwetu busamba bwetu na Yehova butwalelele, co tunangukeni tahi mwanatuzemena ikeye.  Singanyekeni ha byuma byoshe byanatulingila Yehova. Natwana lino lifuti-libu, co nashulisaho bimbuto byabibwa na tusitu. Natwana lalo byakulya bya kutobala na mema a kunwa. Yehova natuleka lizina lyendi na bifwa byendi byabibwa mu Mbimbiliya. Maneneni, Yehova natumwesa cizemo cendi ha kututumina Munendi yazema, Yesu, aije hano hasi mu kututsila. (Yowano 3:16) Ñombelo ya Yesu ikeyo inatulingisa tukale na lilabelelo lya byuma byabibwa bya kulutwe.

⁵ Yehova nashimbika Bumwene bwa Mesiya, nameme fulumende ya mwilu ije ololo imanesa tuyando twoshe. Obu Bumwene, bukatengulula hasi hoshe kupwa paladaisi, co banu boshe bakayoya mu kwoloka na kubwahelela myaka yoshe. (Myaso 37:29) Yehova natumwesa lalo cizemo cendi ha kutulongesa mwakuyoyela mwamubwa ano matangwa. Natulanya ngwendi tulombele kuli ikeye, co atolilila ku malombelo etu simbu yoshe. Yehova namwesa cizemo cendi ku banu boshe.

6. Munapande kulinga bati ha cizemo canamimwesa Yehova?

⁶ Munapande kulinga bati ha cizemo canamimwesa Yehova? Mumweseni ngweni mwakandelela ku byuma byoshe byanamilingila. Oloni banu babangi ano matangwa kubesi kukandelela. Omwo mukemwo mubalingile bamo ha simbu yakele Yesu hano hasi. Simbu imo, Yesu wakangwile baka-mbumba likumi, oloni umolika ikeye wakandelelele. (Luka 17:12-17) Tunapande kutembwinina uje munu umolika wakandelelele kuli Yesu. Tunapande kukandelela kuli Yehova simbu yoshe.

7. Tunapande kuzema bati Yehova?

⁷ Netu tunapande lalo kuzema Yehova. Yesu walekele bandongesi bendi ngwendi bazeme Yehova na mbunge yabo yoshe na mwonyo wabo woshe na mana abo oshe. (Tandeni Mateo 22:37.) Oku kulumbununa bika?

8, 9. Tumwesa bati ngwetu twazema Yehova?

 ⁸ Kwendeka lika ngwetu twazema Yehova kunapumo ndi? Embwe. Nga twazema Yehova na mbunge yetu yoshe na mwonyo wetu woshe na mana etu oshe, co tunapande kumwesa ngoco mu bilinga byetu. (Mateo 7:16-20) Mbimbiliya ngwayo nga twazema Yehova, co twononoka mashiko endi. Kuma kwononoka mashiko endi kwakukalu ndi? Embwe, “mashiko endi keti amakalu kuli yetu.”—Tandeni 1 Yowano 5:3.

⁹ Nga twononoka Yehova, co tupwa ba kubwahelela na kushubuluka mu kuyoya kwetu. (Isaya 48:17, 18) Oloni bika bitukwasa mangana tutwaleleleho busamba bwetu na Yehova? Tusimutwiyeni ha byuma bimo.

10. Mwafwa bika munapande kutwalelelaho kulilongesa bya Yehova?

¹⁰ Mwalikutile bati busamba na Yehova? Omwo mwashangumukile kulilongesa Mbimbiliya, mwashangumukile kuzibuka mwamubwa Yehova na kulikuta nendi busamba. Busamba bweni na Yehova bunapu ngwe tuhya. Nga mushaka ngweni tuhya tutwaleleleho kushukuma, munapande kwakaho bikuni. Ngeci neni munapande kutwalelela kulilongesa bya Yehova mangana busamba bweni bukanyame.—Visimo 2:1-5.

11. Bilongesa bya mu Mbimbiliya bimikwasa bati?

¹¹ Omwo mutwalelela kulilongesa Mbimbiliya, mulilongesa byuma bije bimyeta ku mbunge. Taleni mubalizibilile bandongesi bamo babali ba Yesu omwo wabalumbunwinine bupolofweto bwa mu Mbimbiliya. Bendekele ngwabo: “Kuma bimbunge byetu kubyezukile omwo nakele na kwendeka netu mu ngila na kutunungulwila bya mu bisoneka ndi?”—Luka 24:32.

12, 13. (a) Bika byasa kulingiwa ku cizemo cetu citwazema naco Njambi? (b) Twasa kutwalelela bati kuzema Yehova?

 ¹² Omwo mwashangumukile kulilongesa Mbimbiliya na kuzibisisa mwamubwa Bisoneka, hamo byamikwatele ku mbunge ngwe mubyakwatelelele baje bandongesi babali. Oku kwamikwasele muzibuke Yehova na kumuzema. Ngeci kumushaka eci cizemo ceni citonole embwe.—Mateo 24:12.

¹³ Omwo mulikuta busamba na Njambi, munapande kupanga na nzili mangana mukanyamese busamba bweni. Munapande kutwalelela kulilongesa bya Yehova na Yesu na kusinganyeka ha byuma bimulilongesa, nomwo mumubipangesela mu kuyoya kweni. (Yowano 17:3) Omwo mutanda Mbimbiliya nambe kulilongesayo, munapande kulihula ngweni: ‘Eyi ñanda inanjilongesa bika hali Yehova? Bika binjinapande kumuzemena na mbunge yange yoshe na mwonyo wange woshe?’—1 Timateo 4:15.

14. Kulombela kutukwasa bati tuzeme manene Yehova?

 ¹⁴ Nga muli na kabusamba, musimutwiya nendi simbu yoshe mangana mukanyamese busamba bweni. Mu ngila imolika, nga tusimutwiya na Yehova simbu yoshe mu lilombelo, co tumuzema manene. (Tandeni 1 Tesalonika 5:17.) Lilombelo lyapwa bwana bwabubwa bwa kutunda kuli Tate yetu wa mwilu. Tunapande kwendeka nendi kutunda kwisi ya mbunge yetu simbu yoshe. (Myaso 62:8) Kutwapandele kwilukila majwi a kulifwa mu malombelo etu simbu yoshe, oloni tunapande kulomba bili ku mbunge yetu. Nga tutwalelela kulilongesa Mbimbiliya na kulombela kutunda kwisi ya mbunge, co tuzema manene Yehova.

15, 16. Mwamona bati cipangi ca kwambulula?

¹⁵ Tulekeniko lalo bakwetu byuma bitwakulahela mangana busamba bwetu na Yehova butwaleleleho. Kunapu kubezika kwakama kulekako bakwetu bya Yehova. (Luka 1:74) Eci cikeco cipangi cije Yesu wanene baka-Kilistu boshe ba busunga. Tubaboshe tunapande kwambulula muzimbu waubwa wa Bumwene bwa Njambi. Mwashangumuka laja kwambulula muzimbu ndi?—Mateo 24:14; 28:19, 20.

¹⁶ Kapositolo Paulu wamwene cipangi ca kwambulula kupwa ca seho, mukemwo wacitumbwile ngwendi “bufuko.” (2 Kolinte 4:7) Kuleka bakweni bya Yehova na biyongola byendi cikeco cipangi cakama cimunapande kulinga. Mumwesa ngweni muli na kupangela Yehova, co akandelela manene ku cipangi ceni. (Vahevelu 6:10) Kwambulula kumibezikisa na kubezikisa lalo baje bamitolilila mwafwa mukwasa bakweni na kulikwasa yeni babenya kupwa babusamba ba Yehova na kwasa kutambula mwonyo wa myaka yoshe. (Tandeni 1 Kolinte 15:58.) Cipangi ca kwambulula cikeco lika casa kumishubulwisa.

17. Bika bitunapande kwambulwila manene muzimbu?

 ¹⁷ Tunapande kupanga manene cipangi ca kwambulula. Tunapande ‘kwambulula lijwi,’ co tunapande kulinga ngoco na ntwima. (2 Timateo 4:2) Banu banapande kuziba bya Bumwene bwa Njambi. Mbimbiliya ngwayo: “Litangwa lije omwo Shukulu Kalunga akasompa banu lili muyehiyehi, lili na kwija bwasi bwasi.” Litangwa lya kukotoka kwa kaye ‘kulishwala’ kwija. (Zefaniya 1:14; Hambakuke 2:3) Ololo Yehova anyongesa kano kaye kakabi ka Satana. Simbu kanda litangwa lije lyete, tunapande kunangula banu mangana bangule kupangela Yehova.

18. Mwafwa bika tunapande kulemesela Yehova hamolika na bakwetu baka-Kilistu?

¹⁸ Yehova ashaka ngwendi tumulemesele hamo na bakwetu baka-Kilistu ba busunga. Mbimbiliya ngwayo: “Ngeci bene, tuliyongoleni umo na mukwabo na kulikwasa umo na umo na kumwesa cizemo na kulinga mwamubwa. Keti tulikele kulikungulula hamolika, ngwe futisi ya bamo. Oloni tulikoleseni umo na mukwabo na kuhyana, omwo litangwa lya Mwene lili muyehi.” (Vahevelu 10:24, 25) Tunapande kulinga mwoshe mutwasela mangana tukale ku biwano byoshe. Ku biwano kukekwo kutulishongangeya na kulikanyamesa umo na mukwabo.

19. Bika bitukwasa tuzeme bandolome na bandokazi betu?

¹⁹ Nga muya ku biwano, muwana babusamba bababwa baje bamikwasa kulemesa Yehova. Muliwana na bandolome na bandokazi ba kulisezaseza baje bashaka kulemesa Yehova ngeci mweni. Oloni basa kusebuka mwafwa nabo kubalumbunukile ngeci mweni. Nga banamibiisila, co munapande kubakonekela. (Tandeni Kolose 3:13.) Taleni ha bifwa byabibwa bya bandolome na bandokazi beni. Oku kumikwasa mangana mubazeme na kutwalelelaho busamba bweni na Yehova.

20, 21. “Kuyoya kwakubwa” kwapwa kuka?

²⁰ Yehova ashaka ngwendi babusamba bendi boshe bayoye mwamubwa. Mbimbiliya inatuleka ngwayo kulutwe tukayoya mwamubwa kutubakana ano matangwa.

²¹ Kulutwe kutukayoyo lika myaka 70 nambe 80, oloni tukayoya myaka yoshe. Tukalikuwa “mwonyo wa myaka yoshe,” co lalo tukapwa ba kulikangula. Tukakala mu kwoloka, co tukapwa ba kubwahelela mu paladaisi. Mbimbiliya inatumbula oku kuyoya ngwayo “kuyoya kwakubwa.” Yehova natukulahesa kuyoya kwakubwa, oloni tunapande kulifwita mangana tukawane oku kuyoya kwakubwa.—1 Timateo 6:12, 19.

22. (a) Twasa kukawana bati “kuyoya kwakubwa”? (b) Bika twendekela ngwetu nameme tulifwite bati, te kutwapandele kukayoya myaka yoshe?

²² Twasa kukawana bati oku “kuyoya kwakubwa”? Tunapande ‘kulinga mwamubwa’ na “kupwa baka-kufuka mu bipangi byabibwa.” (1 Timateo 6:18) Oku kulumbununa ngwabo tunapande kupangesa bitulilongesa mu Mbimbiliya. Kuyoya kwakubwa kutukaciwana mu nzili yetu babenya embwe. Nameme tulifwite bati, te kutwapandele kukayoya myaka yoshe. Oloni bunapu lika bwana buje Yehova akana bangamba bendi ba kulongwa mwafwa ya ‘kutetela kwendi kwakama.’ (Loma 5:15) Tate yetu wa mwilu ashaka kwana obu bwana ku bangamba bendi ba kulongwa.

23. Mwafwa bika munapande kwangula mwamubwa byakulinga hano bene?

²³ Lihuleni ngweni: ‘Njili na kulemesa Njambi mu ngila yashaka ndi?’ Nga munanguka ngweni kuli bimo bimunapande kutengululako, co lingeni ngoco bwasi bwasi. Nga tukulahela Yehova na kumwononoka, co apwa butewelo bwetu. Anyunga banu bendi ba kulongwa muno mu matangwa  a kukotoka kwa kaye kakabi ka Satana. Kutundaho, Yehova akatukobelesa mu Paladaisi muje mutukayoya myaka yoshe ngwe muje mwatukulahesele. Mwasa kuwana kuyoya kwakubwa nga mwangula bwino byakulinga hano bene.