1. Iya napande kutuleka ngila yaibwa ya kulemeselamo Njambi?

MU BULOMBELO bwabungi bali na kulishasha ngwabo bali na kulongesa busunga. Oloni keti mukemwo, mwafwa kubesi kulongesa busunga hali Njambi, nomwo mutunapande kumulemesela. Twasa kuzibuka bati ngila yaibwa ya kulemeselamo Njambi? Yehova ikeye lika asa kutuleka mwakumulemesela.

2. Mwasa kuzibuka bati ngila yaibwa ya kulemeselamo Njambi?

² Yehova natwana Mbimbiliya mangana tuzibuke ngila yaibwa ya kumulemeselamo. Ngeci lilongeseni Mbimbiliya, co Yehova amikwasa mangana muizibisise mwafwa wamyaka mbunge.—Isaya 48:17.

3. Njambi ashaka ngwendi tulinge bika?

³ Banu bamo bali na kwendeka ngwabo Njambi natabesa ngila yoshe yoshe ya kumulemesalamo. Oloni Yesu kalongesele ngoco. Wendekele ngwendi: “Keti munu woshe anjitumbula ngwendi, ‘Mwene, Mwene’ akakobela mu Bumwene bwa mwilu embwe, oloni kubanga baje bakalingi cizango ca Tate wa mwilu.” Ngeci, tunapande tahi kuzibuka cizango ca Njambi na kulinga munai cizango cendi. Eyi inapu ñanda yakama, mwafwa Yesu wesekesele banu baje kubesi kwononoka Njambi ku bitozi, “baka-kulinga byabibi.”—Mateo 7:21-23.

4. Bika byendekele Yesu hali baje balinga cizango ca Njambi?

⁴ Yesu watunangwile ngwendi baje balinga cizango ca Njambi, baliwana na byeseko. Wendekele ngwendi: “Kobeleni mu cikolo cacindondo, omwo cikolo cakama na ngila ya kujanjabala biya ku kunyongesa, co babangi bali na kuyamo. Omwo cikolo cacindondo na ngila ya kulishwata  biya ku mwonyo, co baje baiwana banapu babandondo.” (Mateo 7:13, 14) Ngila ya kulishwata, nambe ngila yaibwa ya kulemeselamo Njambi, iya ku kuyoya kwa myaka yoshe. Ngila ya kujanjabala, nambe ngila yaibi ya kulemeselamo Njambi, iya ku kutsa. Oloni Yehova kashaka ngwendi banu bakanyonge. Ngeci nabana simbu ya kulilongesa mangana bamuzibuke.—2 Petulu 3:9.

5. Mwasa kuzibuka bati baje bali na kulemesa Njambi mu ngila yaibwa?

⁵ Yesu wendekele ngwendi twasa kuzibuka baje balemesa Njambi mu ngila yaibwa. Twasa kubazibukila ha byuma bibakulahela na ha bilinga byabo. Wendekele ngwendi: “Mukabazibukila ku bilinga byabo.” Co wendekele lalo ngwendi: “Muti woshe waubwa ukaimi bushuka bwabubwa.” (Mateo 7:16, 17) Eci kucilumbununa ngwabo baka-kulemesa Njambi bapwa ba kulumbunuka embwe. Oloni bangamba ba Njambi bakeseka kulinga byabibwa. Tusimutwiyeni byuma bije bitukwasa tuzibuke baje bali na kulemesa Njambi mu ngila yaibwa.

6, 7. Bika twendekela ngwetu bilongesa bya busunga binemana ha Mbimbiliya? Bika bitulilongesa kuli Yesu?

⁶ Bilongesa byetu binapande kwimana ha Mbimbiliya. Mbimbiliya ngwayo: “Bisoneka byoshe byatunda kuli Njambi, co bitukwasa mu kulongesa, mu kwendekela, mu kusungamesa byuma, mu kunyanyamesa mu busunga, mangana munu wa Njambi apwe wa kushula mwoshe na kulibwahesela mwamubwa kupanga bipangi byabibwa.” (2 Timateo 3:16, 17, NWT) Kapositolo Paulu wasonekele ngwendi: “Omwo twaminenelele lijwi lya Njambi, yeni mwalizibile na kulitambula, keti ngwe lijwi lya kutunda kuli banu, oloni ngwe lijwi lya Njambi, lije linapu lijwi lya Njambi bene.” (1 Tesalonika 2:13) Bilongesa bya mu  kulemesa kwa busunga binemana ha Mbimbiliya, keti ha bisinganyeka na bilongesa bya banu embwe.

⁷ Byoshe byalongesele Yesu byemanene ha Lijwi lya Njambi. (Tandeni Yowano 17:17.) Kakangi wapangesele Bisoneka. (Mateo 4:4, 7, 10) Bangamba ba Njambi ba busunga bali na kukabangeya mwanja wa Yesu. Bibali na kulongesa binemana ha Mbimbiliya.

8. Bika byatulongesele Yesu ha ñanda ya kulemesa Yehova?

⁸ Tunapande kulemesa lika Yehova. Ku Myaso 83:18, NWT banendeka ngwabo: “Yobe ibatumbula lizina ngwabo Yehova, yobe lika wapwa Wahakamwa Manene hasi hoshe.” Yesu washakele banu bazibuke Njambi wa busunga, mukemwo wabalongesele lizina lya Njambi. (Tandeni Yowano 17:6.) Yesu wendekele ngwendi: “Yehova Njambi yobe ikeye iunapande kulemesa, co ikeye lika iunapande kupangela cipangi ca kujela.” (Mateo 4:10, NWT) Yetu bangamba ba Njambi tuli na kukabangeya mwanja wa Yesu. Tuli na kulemesa lika Yehova, tuli na kupangesa lizina lyendi, tuli na kulileka bakwetu na kubaleka byuma byakatulingila.

9, 10. Bika bituli na kulinga mu kumwesa ngwetu twazema bakwetu?

⁹ Tunapande kuzema manene bakwetu banu. Yesu walongesele bandongesi bendi balizeme umo na mukwabo. (Tandeni Yowano 13:35.) Twatunda ku mitambela na ku bisemwa bya kulisezaseza, co bamo mukati ketu bapwa baka-kufuka beka tuhutu. Oloni kuzema bandolome na bandokazi betu kunatukwatasana hamo. (Kolose 3:14) Ngeci kutwesi kuya ku nzita kukatsiya banu. Mbimbiliya ngwayo: ‘Bana ba Njambi na bana ba Liyabolo mubazibukila aha: Baje kubesi kulinga byabibwa na baje kubesi kuzema bakwabo kubapwile bana ba Njambi embwe.’ Inendeka lalo ngwayo: ‘Tunapande kulizema umo na  mukwabo. Kutwapandele kupwa ngwe Kaini, ikeye wakundamene kuli Liyabolo, co watsiile shongo yendi Abele.’—1 Yowano 3:10-12; 4:20, 21.

¹⁰ Tuli na kupangesa simbu yetu, nzili yetu na byuma bituli nabyo mu kukwasa bakwetu na kubashongangeya. (Vahevelu 10:24, 25) ‘Tuli na kulinga byabibwa ku banu boshe.’—Ngalatiya 6:10.

11. Bika bitutabela ngwetu kwoboka kwetu kunemana hali Yesu?

¹¹ Tunapande kwononoka Yesu mwafwa kwoboka kwetu kunemana hali ikeye. Mbimbiliya ngwayo: “Kutwasa kuwana kwoboka muli weka lalo embwe, omwo kukwesi lizina lyeka muno mu kaye lyanana Njambi ku banu litunapande kwobokelamo.” (Vilinga 4:12) Mu Capita 5 ya lino libulu, twalilongesele ngwetu Yehova watumine Yesu kwakwana mwonyo wendi kupwa ndando ya kupatula banu ba kwononoka. (Mateo 20:28) Yehova nangula Yesu kupwa Mwene uje akayula hano hasi. Mukemwo Mbimbiliya inatuleka ngwayo tunapande kwononoka Yesu nga tushaka kukayoya myaka yoshe.—Tandeni Yowano 3:36.

12. Bika kutwesi kulikobelesela mu bupolitiki?

¹² Kutwapandele kulikobelesa mu bupolitiki. Yesu kalikobelesele mu bupolitiki. Omwo Yesu bamusompele, walekele Pilato ntwama wa Baloma ngwendi: “Bumwene bwange keti bwa hano ha kaye embwe.” (Tandeni Yowano 18:36.) Netu twalyononwesa ku Bumwene bwa mwilu ngwe mwalingile Yesu. Ngeci kutwesi kulikobelesa mu bupolitiki. Nambe ngoco, Mbimbiliya inatushiki “kwononoka kuli baka-kuswana,” nameme ku bifulumende. (Loma 13:1) Tunapande kwononoka mashiko a mu lifuti mutwakala. Oloni nga mashiko abo kuwendelela na mashiko a Njambi, co tutembwinineni tupositolo baje bendekele ngwabo: “Tunapande kwononoka Njambi, keti banu.”—Vilinga 5:29; Mako 12:17.

13. Bika bituli na kwambulula kukundama ku Bumwene bwa Njambi?

 ¹³ Twakulahela ngwetu Bumwene bwa Njambi bukebwo lika bukamanesa bukalu mu kaye. Yesu wendekele ngwendi “biñanda byabibwa bya Bumwene” bakabyambulula mu kaye mwoshe. (Tandeni Mateo 24:14.) Bifulumende bya banu kubyasa kutulingila byuma bibukatulingila Bumwene bwa Njambi. (Myaso 146:3) Yesu watulongesele mwakulombela Bumwene bwa Njambi. Wendekele ngwendi: “Bumwene bwobe bwije, cizango cobe bacilinge hano hasi, ngwe omwo bakacilingi mwilu.” (Mateo 6:10) Mbimbiliya inatuleka ngwayo Bumwene bwa Njambi bukanyongesa bifulumende byoshe bya banu, co ‘bukebwo bukakalako myaka yoshe.’—Ndanyele 2:44.

14. Beya bamumona ngweni bali na kulemesa Njambi mu ngila yaibwa?

¹⁴ Kwesekesa nebi bisimpi bitunasimutwiya, lihuleni ngweni: ‘Beya bali na kulongesa byuma biinendeka Mbimbiliya? Beya bali na kuleka bakwabo lizina lya Njambi? Beya balizema manene umo na mukwabo na kukulahela ngwabo Njambi watumine Yesu mangana akutwobole? Beya baje kubesi na kulikobelesa mu bupolitiki? Beya bali na kulongesa ngwabo Bumwene bwa Njambi bukebwo lika bukamanesa bukalu bwa banu? Bakaleho ba Yehova lika ngu.—Isaya 43:10-12.

15. Bika bitunapande kulinga mangana tulemese Njambi mu ngila yaibwa?

¹⁵ Kumwapandele kukulahela lika ngweni Njambi kwali. Nameme bandemone bakulahela ngoco, oloni kubesi kwononoka Njambi. (Yakomba 2:19) Nga tushaka kulemesa Njambi mu ngila yaibwa, kutwapandele kukulahela lika ngwetu kwali embwe. Oloni tunapande kulinga byuma byatuleka.

16. Bika bitunapande kubyanena bulombelo bwa makuli?

 ¹⁶ Nga tushaka ngwetu tulemese Njambi mu ngila yaibwa, co tunapande kutunda mu bulombelo bwa makuli. Kapolofweto Isaya wendekele ngwendi: ‘Tundeni mu Mbambilone, lijeleseni.’ (Isaya 52:11; 2 Kolinte 6:17) Tunapande kubyana byuma byoshe bije binakundama ku bulombelo bwa makuli.

17, 18. “Mbambilone Wakama” cuma muka? Bika bimunapande kutundilamo hano bene?

¹⁷ Bulombelo bwa makuli bwapwa buka? Bwapwa bulombelo bwoshe buje kubwesi na kulongesa banu mwakulemesela Njambi. Mbimbiliya inatumbula bulombelo bwoshe bwa makuli ngwayo “Mbambilone Wakama.” (Kujombolola 17:5) Mwafwa bika? Munima ya Libazi lya Nowa, bilongesa byabingi bya makuli byashangumukilile mu nganda ya Mbambilone. Ebi bilongesa bya makuli byatumine hasi hoshe. Cakumwenako, banu ba mu Mbambilone balemesele binjambi batatu. Ano matangwa lalo, mu bulombelo bwabungi bali na kulongesa ngwabo kwakala binjambi batatu. Oloni Mbimbiliya ngwayo kwakala Njambi umolika wa busunga, Yehova, co Yesu wapwa Munendi. (Yowano 17:3) Banu ba mu Mbambilone bakulahelele ngwabo nga munu natsi, kuli cuma cimo cikatundu kuli ikeye na kutwalelelaho kuyoya, co oco cuma basa kucinyanyamesa mu mbulu ya tuhya. Ebi bilongesa binapu bya makuli.—Taleni Biñanda bya Kushongo ha 14, 17 na 18.

¹⁸ Njambi wendekele laja ngwendi ololo anyongesa bulombelo bwoshe bwa makuli. (Kujombolola 18:8) Munamono bimunapande kutundila bwasi bwasi mu bulombelo bwa makuli ndi? Yehova ashaka ngwendi mutundemo hano bene.—Kujombolola 18:4.

19. Yehova amikwasa bati nga mwangula kumupangela?

 ¹⁹ Omwo mwangula kutunda mu bulombelo bwa makuli na kushangumuka kupangela Yehova, babusamba beni na babushoko bweni bamo kubazibisisa bimutundilamo, co basa kumilwisa. Oloni Yehova kamyumbila kuti embwe. Mukala mu naanga ya banu babangi baje balizema manene umo na mukwabo. Co lalo mukala na lilabelelo lya kukayoya myaka yoshe mu kaye kakaha ka Njambi. (Mako 10:28-30) Babusamba beni na babushoko bweni baje bamilwisa mwafwa ya kupangela Yehova, hamo kulutwe bakataba kulilongesa Mbimbiliya.

20. Bika bimunapande kulemesela Njambi mu ngila yaibwa?

²⁰ Ololo Njambi atundisako bubi bwoshe, co Bumwene bwendi bukayula hasi hoshe. (2 Petulu 3:9, 13) Eyi ikapwa simbu yaibwa manene. Banu boshe bakalemesa Yehova ngwe mwashaka kumulemeselamo. Ngeci munapande kulingako bimo ino bene simbu mangana mulemese Njambi mu ngila yaibwa.