1, 2. Bika twendekela ngwetu lilombelo lyapwa bwana bwa kulitila? Bika tunapande kuzibukila biinendeka Mbimbiliya ha lilombelo?

LIFUTI-LIBU lyapwa lyalindondo manene ha kulyesekesa ku byuma bibatanga mwilu. Yehova wamona banu boshe hano hasi kupwa ngwe limbase lya mema lije lindweka mu lilonga. (Myaso 115:15; Isaya 40:15) Twapwa tubabandondo ha kutwesekesa ku byuma bibatanga mwilu. Nameme ngoco, ku Myaso 145:18, 19 ngwabo Yehova “ali muyehi na banu baje boshe batambeka kuli ikeye, banu baje batambeka kuli ikeye mu busunga. Ikeye akutisa bizango bya baje bamukomoka, aziba mitambi yabo, co abamena.” Oku kunapu kubezika kwakama. Yehova, Ishamatanga wa nzili yoshe ashaka kulikuta busamba netu, co ashaka lalo kutolilila ku malombelo etu. Lilombelo linapu bwana bwa kulitila bwanana Yehova ku munu na munu.

² Oloni Yehova asa lika kututolilila nga tusimutwiya nendi mu ngila yaibwa. Twasa kulinga bati ngoco? Tumoneni biinendeka Mbimbiliya ha lilombelo.

3. Mwafwa bika munapande kulombela kuli Yehova?

³ Yehova ashaka ngwendi mulombele kuli ikeye. Bika twendekela ngoco? Tandeni Filipu 4:6, 7. Acisinganyekeni ha majwi ali mu cisoneka eci. Muka-kuyula mwilu na hasi wamyaka mbunge, co ashaka ngwendi mumuleke bukalu bweni, nomwo mumuli na kulizibila.

4. Kulombela kuli Yehova simbu yoshe kukanyamesa bati busamba bweni?

 ⁴ Lilombelo litulingisa tulikute busamba na Yehova. Nga munu na kabusamba kendi balileka biyongola byabo simbu yoshe, nomwo mubalizibila, busamba bwabo bukanyama. Mukemwo mukwapwa na kulombela kuli Yehova. Mu Mbimbiliya, Yehova namileka bisinganyeka byendi na byuma byashaka kukalinga kulutwe. Neni mwasa kumuleka byuma bili ku mbunge yeni ha kusimutwiya nendi simbu yoshe. Nga mulinga ngoco, co busamba bweni na Yehova bukanyama.—Yakomba 4:8.

5. Bika twendekela ngwetu Yehova kesi kutolilila ku malombelo oshe?

⁵ Yehova ali na kutolilila ku malombelo oshe ndi? Embwe. Mu simbu yayoyele kapolofweto Isaya, Yehova walekele Baisalele ngwendi: “Nambe mulombela malombelo amangimangi, kunjikamizibi, omwo maboko eni anashulu na maninga.” (Isaya 1:15) Nga kutunyanyama,  twasa kulinga byuma bije bitwangununa kuli Yehova na kwonowesa malombelo etu kweta kuli ikeye.

6. Mwafwa bika kukulahela kwapwa kwa seho? Mumwesa bati ngweni muli na likulahelo?

⁶ Tunapande kukulahela Yehova nga tushaka ngwetu atolilile ku malombelo etu. (Mako 11:24) Kapositolo Paulu wendekele ngwendi: “Co lalo nga likulahelo lyahi, kutwasa kuzibisa Njambi kubwaha, mwafwa woshe ashwenya kuli Njambi napande kutaba ngwendi kwali, co lalo ngwendi ikeye muka-kwana cikandelela kuli baje bamushakezeka manene.” (Vahevelu 11:6, NWT) Oloni tunapande kulingako bimo, keti kwendeka lika ngwetu twakulahela. Tunapande kwononoka Yehova ha litangwa na litangwa mangana tumwese ngwetu twamukulahela.—Tandeni Yakomba 2:26.

7. (a) Bika bitunapande kulikehesela na kumwesa kasingimiko nga tulombela kuli Yehova? (b) Tumwesa bati ngwetu tuli na kulombela kutundilila kwisi ya mbunge yetu?

⁷ Nga tulombela kuli Yehova, tunapande kulikehesa na kumwesa kasingimiko. Mwafwa bika? Nga batulanya kwendeka na mwene, nambe na ntwama wa lifuti, tumwendekesa mu kasingimiko. Ngeci tunapande kulikehesa na kumwesa manene kasingimiko omwo twendeka na Yehova mwafwa wapwa Njambi Muka-nzili Yoshe. (Kushangumuka 17:1; Myaso 138:6) Tunapande lalo kulombela kuli Yehova kutundilila kwisi ya mbunge yetu. Kutwapandele kwilukila majwi a kulifwa mu malombelo etu.—Mateo 6:7, 8.

8. Bika bitunapande kulinga nga tulomba byuma bimo?

⁸ Cikwabo lalo, nga tulomba byuma bimo kuli Yehova, tunapande kupangela ha byuma bitunalombo. Cakumwenako, nga tulomba ngwetu Yehova atwane byuma bya kulikwasa nabyo mu buyoye, co kutwapandele kutumbama lika na kubandamena ngwetu atwane bitunalombo. Tunapande kupanga na nzili na kupanga bipangi byoshe biliko.  (Mateo 6:11; 2 Tesalonika 3:10) Nga tulomba ngwetu Yehova atukwase mangana tumbile bilinga bimo byabibi, co tunapande kubyana byuma bije bitukobelesa mu ceseko. (Kolose 3:5) Tusimutwiyeni ha bihula bimo bibali na kwihula banu ha ñanda ya kulombela.

9. Tunapande kulombela kuli iya? Ku Yowano 14:6 batulongesa bika ha lilombelo?

⁹ Tunapande kulombela kuli iya? Yesu walongesele bandongesi bendi balombe kuli ‘Tate yetu wa mwilu.’ (Mateo 6:9) Wendekele lalo ngwendi: “Yange ngila, na busunga, na mwonyo, naumo wahi aya kuli Tate kubanga hali yange.” (Yowano 14:6) Ngeci tunapande kulombela lika kuli Yehova kwitila muli Yesu. Kulombela kwitila muli Yesu kulumbununa bika? Nga tushaka ngwetu Yehova azibe malombelo etu, tunapande kusingimika cipangi ca kulitila cije Yehova wanene Yesu. Twalilongesele ngwetu Yesu wezile hasi kwa kutupatula ku bubi na ku kutsa. (Yowano 3:16; Loma 5:12) Yehova nangula lalo Yesu kupwa Kapilistu Wakama na Lyako.—Yowano 5:22; Vahevelu 6:20.

10. Kuma tunapande kutumbama, kutsikama nambe kwimana ha kulombela ndi? Lumbununeni.

¹⁰ Kuma tunapande kutumbama, kutsikama nambe kwimana ha kulombela ndi? Embwe, Yehova katulekele ngwendi tutumbame, nambe kutsikama nambe kwimana ha kulombela. Mbimbiliya inatuleka ngwayo twasa kulombela kuli Yehova mu ngila yoshe yoshe ya kasingimiko. (1 Mizimbu 17:16; Nehemiya 8:6; Ndanyele 6:10; Mako 11:25) Kutsikama, kutumbama nambe kwimana kucesi na bukalu kuli Yehova. Ashaka lika ngwendi tulombele kuli ikeye na mbunge yaibwa. Twasa kulomba na lijwi lya kutambekela, nambe kulombela mu mbunge yetu kwoshe kwoshe kutuli, nambe butsiki nambe mutanya.  Nga tulombela kuli Yehova, tunapande kukulahela ngwetu atutolilila.—Nehemiya 2:1-6.

11. Byuma muka bimo bitwasa kulomba kuli Yehova?

¹¹ Bika bitwasa kulomba? Twasa kulomba byoshe byoshe bije asa kutabesa Yehova. Mbimbiliya ngwayo: “Ikeye atuziba nga tumulomba cuma cimo ngwe ku cizango cendi.” (1 Yowano 5:14) Kuma twasa kulomba byuma bya ha kapandi ndi? Eyo. Tunapande kulomba kuli Yehova ngwe muje munu endeka na kabusamba kendi. Twasa kuleka Yehova byoshe bije bili ku mbunge yetu. (Myaso 62:8) Twasa kumulomba atwane sipilitu yendi ya kujela mangana itukwase kulinga byabibwa. (Luka 11:13) Twasa kulomba Yehova atwane mana aje atukwasa kwangula byuma byabibwa. Twasa lalo kumulomba atwane nzili ya kulifwita na bukalu. (Yakomba 1:5) Tunapande kulomba Yehova asambese bubi bwetu. (Efeso 1:3, 7) Tunapande lalo kulombelela bakwetu, babushoko bwetu, bandolome na bandokazi betu mu cikungulukilo.—Vilinga 12:5; Kolose 4:12.

12. Byuma muka byakama bitunapande kutumbula mu malombelo etu?

¹² Byuma muka byakama bitunapande kutumbula mu malombelo etu? Tunapande kutumbula Yehova na cizango cendi. Tunapande kumukandelela ha byuma byoshe byanatulingila. (1 Mizimbu 29:10-13) Tuzibuka ngoco mwafwa Yesu mwakele hano hasi walongesele bandongesi bendi mwakulombelela. (Tandeni Mateo 6:9-13.) Wabalekele ngwendi banapande tahi kulomba ngwabo lizina lya Njambi balilemese, kulumbununa ngwabo balimone kupwa lya kujela. Kutundaho, Yesu wamwesele ngwendi tunapande kulomba Bumwene bwa Njambi ngwetu bwije, na kulomba ngwetu cizango ca Yehova cilingiwe hano hasi. Yesu wamwesele ngwendi tunapande tahi kutumbula ebi byuma byakama mu malombelo etu asina tulomba byuma bitushaka. Nga tulibanga kutumbula Yehova na cizango  cendi mu malombeolo etu, co tumwesa byuma bitwamona kupwa bya seho mu kuyoya kwetu.

13. Malombelo etu anapande kupwa amalaha bati?

¹³ Malombelo etu anapande kupwa amalaha bati? Mbimbiliya kuyatulekele bulaha bwa malombelo etu. Malombelo etu asa kupwa amalaha nambe amehi kwesekesa na byuma bitulomba. Cakumwenako, twasa kwihisa lilombelo lyetu nga tushaka kulya, oloni twasa kulahesa lilombelo lyetu nga tukandelela Yehova, nambe kumuleka bishoti byetu. (1 Samwele 1:12, 15) Kutwapandele  kulombela malombelo amalaha mangana tuzibise banu kubwaha ngwe mubalingile banu bamo mu matangwa a Yesu. (Luka 20:46, 47) Yehova wazinda malombelo a cifwa eci. Yehova ashaka ngwendi tumulombe kutunda kwisi ya mbunge yetu.

14. Tunapande kulombela lungahi, co eci citulongesa bika hali Yehova?

¹⁴ Tunapande kulombela lungahi? Yehova natulanya ngwendi tusimutwiye nendi simbu yoshe. Mbimbiliya ngwayo tunapande ‘kulomba simbu yoshe.’ (Efeso 6:18; 1 Tesalonika 5:17) Yehova atutolilila simbu yoshe. Twasa kumukandelela ha litangwa na litangwa mwafwa wakala na cizemo, co lalo wapwa muka-kwana. Twasa lalo kumulomba atutwamenene, atukanyamese na kutuzembeleka. Nga tuzibuka ngwetu kulombela kuli Yehova kwapwa kwa seho, co tuwana simbu ya kusimutwiya nendi.

15. Bika bitunapande kwendekela ngwetu “ameni” ku mamaneselelo a lilombelo?

 ¹⁵ Bika bitunapande kwendekela ngwetu “ameni” ku mamaneselelo a lilombelo? Lijwi lya “ameni” lilumbununa ngwalyo “mukemwo bene” nambe “cifwe bene ngoco.” Inapu ngila imo ya kumwesa ngwetu tunalombela kutunda kwisi ya mbunge yetu. (Myaso 41:13) Mbimbiliya inamwesa lalo ngwayo kwapwa kwakubwa kutaba mu mbunge yetu, nambe kutambekela ngwetu “ameni” ku mamaneselelo a lilombelo libalomba mu mbunga mangana tumwese ngwetu twataba bibanalombela.—1 Mizimbu 16:36; 1 Kolinte 14:16.

16. Kuma Yehova ali na kutolilila ku malombelo etu ndi? Lumbununeni.

¹⁶ Kuma Yehova ali na kukumbulula malombelo etu ndi? Eyo. Mbimbiliya ngwayo wapwa ‘muka-kukumbulula malombelo’ etu. (Myaso 65:2) Yehova ali na kutolilila ku malombelo a banu babangi na kuwambulula. Co ali na kulinga ngoco mu bingila bya kulisezaseza.

17. Yehova ali na kupangesa bati tungelo na bangamba bendi ba hano hasi mu kukumbulula malombelo etu?

¹⁷ Yehova ali na kupangesa tungelo na bangamba bendi ba hano hasi mu kukumbulula malombelo etu. (Vahevelu 1:13, 14) Cakumwenako, kuli banu babangi baje balombele kuli Yehova ngwabo abakwase bazibisise Mbimbiliya, co munima lika ya kulombela, Bakaleho ba Yehova babendelele. Mbimbiliya inamwesa ngwayo tungelo nabo bali na kukundwiya cipangi ca kwambulula “biñanda byabibwa” mu kaye koshe. (Tandeni Kujombolola 14:6.) Bungi bwetu lalo twalombaho laja kuli Yehova ngwetu atukwase mu bukalu bwetu, co twatambwile bukwasi kuli ndolome nambe ndokazi yetu muka-Kilistu.—Visimo 12:25; Yakomba 2:16.

18. Yehova ali na kupangesa bati sipilitu yendi ya kujela na Mbimbiliya mu kukumbulula malombelo etu?

 ¹⁸ Yehova ali na kupangesa sipilitu yendi ya kujela mu kukumbulula malombelo etu. Nga tumulomba ngwetu atukwase mangana tulifwite na bukalu, asa kutwana sipilitu yendi ya kujela itutwamenene na kutwana nzili. (2 Kolinte 4:7) Yehova ali na kupangesa lalo Mbimbiliya mu kukumbulula malombelo etu na kutukwasa kwangula mwamubwa byakulinga. Nga tutanda Mbimbiliya, tunasa kuwana bisoneka bije bitukwasa. Yehova asa kushongangeya munu umo ha ciwano mangana endeke simpi ije itukwasa. Asa lalo kushongangeya mukulunu mu cikungulukilo atuleke simpi imo ya mu Mbimbiliya.—Ngalatiya 6:1.

19. Mwafwa bika tunasa kusinganyeka ngwetu Yehova kakumbulwile malombelo etu?

¹⁹ Oloni bisimbu bimo tunasa kushota mbunge ngwetu, ‘Mwafwa bika Yehova kakumbulwile bwasi lilombelo lyange?’ Anukeni ngweni Yehova azibuka simbu ya kukumbulula malombelo etu, nomwo mwakuwakumbulwila. Ikeye azibuka bitutonda. Simbu imo asa kutwecelela tutwaleleleho kulomba mangana tumwese ngwetu tushaka bitulomba, na kumwesa ngwetu twamukulahela. (Luka 11:5-10) Bisimbu bikwabo Yehova ali na kukumbulula malombelo etu mu ngila ije kutuzibuka. Cakumwenako, twasa kumulomba ngwetu atutundise mu bukalu bumo. Oloni mu cifwa ca kulinga ngoco, ikeye atwana nzili ya kulifwita na bukalu bwetu.—Tandeni Filipu 4:13.

20. Mwafwa bika tunapande kulombela kuli Yehova simbu yoshe?

²⁰ Yehova natubezikisa manene mwafwa natutabesa tulombele kuli ikeye. Twasa kukulahela ngwetu atutolilila. (Myaso 145:18) Nga tulombela simbu yoshe kuli Yehova kutundilila kwisi ya mbunge yetu, co busamba bwetu bukanyama.