NGA MUTANDA lipapelo lya mizimbu, kutala TV, nambe kutolilila ku cisanzi, muziba na kumona mizimbu ya bukenya, binzita na bimonde. Neni hamo muli na kuyandako mu ngila imo. Hamo muli na kubinja, indi hamo munatsisa munu imwazema manene.

Lihuleni ngweni:

• Kuma Njambi ashaka ngwendi yange na baka-naanga yange tuyande ndi?

• Kuli kunjiwana bukwasi mangana njikolese mu bukalu bwange?

• Hano hasi hakakala kwoloka ndi?

Mbimbiliya inakumbulula mwamubwa ebi bihula.

• Banu kubakabinji, nambe kukulubala, nambe kutsa.—Kujombolola 21:4

• “Bilema bakajombozoka na kukina.”—Isaya 35:6

• “Tupuputwa bakamona.”—Isaya 35:5

•  Batsi bakasanguka.—Yowano 5:28, 29

• Naumo wahi akabinja.—Isaya 33:24

• Banu boshe bakakala na byakulya byabingi.—Myaso 72:16

Munasa kusinganyeka ngweni byuma bimunatanda ha maputa a kulibanga omu mu libulu kubikalingiwa. Oloni Njambi nakulahesa ngwendi akabilinga, co lalo Mbimbiliya inalumbununa mwakabilingilamo.

Mbimbiliya inatuleka lalo byuma bikwabo. Inatuleka byuma bitunapande kulinga mangana tupwe ba kubwahelela na kuyoya bwino ino simbu. Acisinganyekeni ha bukalu bweni buje buli na kuminenela bishoti. Bunasa kupwa bukalu bwa kuwana bimbongo, bukalu bwa mu naanga, indi hamo mishongo, nambe kutsisa munu imwazema. Mbimbiliya imikwasa mulifwite nobu bukalu. Co lalo ikumbulula ebi mu ngila ije yasa kumizembeleka:

• Bika bituli na kuyandela?

• Twasa kulifwita bati na bukalu bwetu?

• Naanga yetu yasa kupwa ya kubwahelela ndi?

• Bika bikalingiwa ku munu nga tunatsi?

• Banu batwazema baje banatsi tukabamona lalo ndi?

• Bika tukulahelela ngwetu Njambi akalinga byuma byoshe byanakulahesa?

 Ha kuwana ngwe muli na kutanda eli libulu, munamwesa ngweni mushaka kulilongesa Mbimbiliya. Eli libulu limikwasa. Mapalagilafu alimo ali na bihula bije bimikwasa kuzibisisa mwamubwa Mbimbiliya. Banu babangi banalikuu kusimutwiya biñanda bya mu Mbimbiliya na Bakaleho ba Yehova. Twakulahela ngwetu neni mulikuwa. Tulombela ngwetu Njambi amibezikise mangana muzibuke byuma biilongesa Mbimbiliya.