1. Iya natwana kuyoya?

YEHOVA wapwa “Njambi wa kuyoya.” (Njelemiya 10:10) Ikeye watutangele na kutwana kuyoya. Mbimbiliya ngwayo: “Yobe watangele byuma byoshe, co ku cizango cobe babyanene kuyoya na mwonyo.” (Kujombola 4:11) Yehova washakele ngwendi tuyoye. Kuyoya kunapu bwana bwa kulitila bwanatwana Njambi.—Tandeni Myaso 36:9.

2. Bika bitukwasa tuyoye mwamubwa?

² Yehova ali na kutwana byuma bije bitukwasa tuyoye, bya kufwa ngwe byakulya na mema. (Vilinga 17:28) Ashaka ngwendi tulikuwe kuyoya. (Vilinga 14:15-17) Tunapande kwononoka mashiko a Njambi mangana tuyoye mwamubwa.—Isaya 48:17, 18.

3. Bika byalingile Yehova omwo Kaini watsiile Abele?

³ Mbimbiliya itulongesa ngwayo Yehova wamona kuyoya kwetu noku kwa bakwetu kupwa kwa seho. Cakumwenako, omwo Kaini muna Adama na Eva walubalelele shongo yendi Abele, Yehova wamunangwile ngwendi akwate mbunge. Oloni Kaini kalingile ngoco. Walubalele manene, co “watengulukilile ndolome yendi na kumutsiya.” (Kushangumuka 4:3-8) Yehova wanene Kaini kashitiko mwafwa ya kutsiya Abele. (Kushangumuka 4:9-11) Matoto na cizindo byapwa byabibi, mwafwa byasa kulingisa munu apwe cikenya nambe muka-lwozi. Munu wa cifwa eci, kubakamwana kuyoya kwa myaka yoshe. (Tandeni 1 Yowano 3:15.) Ngeci tuzemeni banu boshe mangana tuzibise Yehova kubwaha.—1 Yowano 3:11, 12.

4. Mashiko aje Njambi wanene Baisalele atukwasa kumona bati kuyoya?

 ⁴ Omwo mwetila myaka yaingi, Yehova wamwesele lalo ngwendi wamona kuyoya kupwa kwa seho mu Mashiko Likumi aje anene kuli Mosesa. Lishiko limo lyendekele ngwalyo: “Keti mukatsiye.” (Kwituluka mu Mashiko 5:17) Munu woshe uje watsiile mukwabo, nendi bamutsiile.

5. Njambi wamona bati kutundisa limo?

⁵ Njambi wamona bati kutundisa limo? Yehova wamona kuyoya kwa mwana uje kanda asemuke kupwa kwa seho. Mu Mashiko aje Yehova wanene Baisalele, wendekele ngwendi nga munu abulumuna munakazi uje ali na limo, co munendi atsa, uje munu banapande kumutsiya. (Tandeni Kutuuka 21:22, 23; Myaso 127:3.) Oku kumwesa ngwabo kutundisa limo kwakubi.—Taleni Biñanda bya Kushongo ha 28.

6, 7. Tumwesa bati Yehova ngwetu twamona kuyoya kupwa kwa seho?

⁶ Tumwesa bati Yehova ngwetu twamona kuyoya kwetu noku kwa bakwetu kupwa kwa seho? Nga kutulingi byuma bije byasa kukobelesa kuyoya kwetu noku kwa bakwetu mu bushonde. Ngeci kutwapandele kusipa makaya, kunwa manene bwala, nambe kupangesa bumbanda mwamubi mwafwa byasa kutubulumuna nambe kututsiya.

⁷ Tupangeseni kuyoya kwetu na mibila yetu ngwe mwashakela Njambi, mwafwa ikeye watwanenebyo. Ngeci tunapande kunyunga mibila yetu mwamubwa. Nga kutulingimo, co tupwa tu ba kujwala ku mesho a Njambi. (Loma 6:19; 12:1; 2 Kolinte 7:1) Nga kutumono kuyoya kupwa kwa seho, co kutwasa kulemesa Yehova uje natwana kuyoya. Kumbila bilinga byabibi kwapwa kwakukalu, oloni Yehova atukwasa nga tulifwita na kumona kuyoya kupwa kwa seho.

8. Bika bitwasa kulinga kutewa tukobelesa kuyoya kwetu noku kwa bakwetu mu bushonde?

 ⁸ Tunalilongesa ngwetu kuyoya kunapu bwana bwa seho. Yehova natukulahela ngwendi tupanga na nzili mangana twonwe kukobelesa kuyoya kwetu noku kwa bakwetu mu bushonde. Tumwesa ngoco nga twendesa mwamubwa bimota byetu, nambe bikinga byetu. Co lalo kutulikobelesa mu bweho buje bwasa kutubulumuna. (Myaso 11:5) Tumona lalo ngwetu ha binjubo byetu hali mwamubwa. Yehova washikile Baisalele ngwendi: “Omo mukatunga njubo yaiha, co mukakako cibumbe cacihi ca kuzengeleka hakamwa ya njubo, kutewa mukakala na mulonga nga munu akandumukaho na kutsa.”—Kwituluka mu Mashiko 22:8.

9. Tunapande kunyunga bati bimuna?

⁹ Tunapande kunyunga bwino bimuna mwafwa bapwa ba seho kuli Yehova. Njambi natutabesa kutsiya bimuna mangana tulye na kuwana buzalo. Natutabesa lalo kutsiya bimuna baje bashaka kutubulumuna. (Kushangumuka 3:21; 9:3; Kutuuka 21:28) Oloni tusitu nambe bimuna kutwapandele kubatsiila senga embwe.—Visimo 12:10.

10. Bika twendekela ngwetu maninga emanena kuyoya?

¹⁰ Yehova wamona maninga kupwa a kujela mwafwa emanena kuyoya. Kaini mwatsiile Abele, Yehova wamulekele ngwendi: “Maninga a ndolome yobe ali na kuteta kuli yange mu libu.” (Kushangumuka 4:10) Yehova wanene Kaini kashitiko omwo watsiile Abele mwafwa maninga a Abele emanenene kuyoya kwendi. Mulyahwile libazi lya Nowa, Yehova wamwesele lalo ngwendi maninga emanena kuyoya. Yehova watabesele Nowa na naanga yendi kulya tusitu. Wabalekele ngwendi: “Tusitu ba kwenda ba kuyoya boshe njinamyanabo kupwa byakulya  byeni. Njinamyanabo boshe ngwe muje munjamyanene bisapasapa.” Oloni kuli cuma cimo cababindikile kulya. Wabashikile ngwendi: “Oloni kumwapandele kulya situ na mwonyo wayo, akewo maninga ayo.”—Kushangumuka 1:29; 9:3, 4, NWT.

11. Lishiko muka lya kukundama ku maninga lije Yehova wanene Baisalele?

¹¹ Omwo mwetile myaka 800 kutunda ha simbu ije Yehova wabindikile Nowa kulya maninga, washikile lalo banu bendi ngwendi: “Kaisalele woshe, nambe muka-kwija uje ali na kukala hakati ka banu, nga aya na kuyomba, co atsiya kasitu nambe kazila wa kulya, co ikeye napande kwitila maninga endi hasi na kwofwelaho libu.” Co wababindikile ngwendi ‘keti balye maninga.’ (Valevi 17:13, 14) Yehova washakele banu bendi bamone maninga kupwa a kujela. Bapandele kulya lika situ, oloni keti maninga. Mubatsiile kasitu wa kulya, bapandele kwitila maninga endi hasi.

12. Baka-Kilistu banapande kumona bati maninga?

¹² Omwo mwetile myaka kutunda ha kutsa kwa Yesu, tupositolo na bakulunu ba cikungulukilo ca baka-Kilistu mu Yelusalema batumbamene hasi mangana bawame mashiko muka ha Mashiko aje abanene Baisalele abapandele kukabangeya baka-Kilistu. (Tandeni Vilinga 15:28, 29; 21:25.) Yehova wabakwasele bamone ngwabo maninga anga apwile a seho kuli ikeye, co nabo bapandele kuwamona ngoco. Baka-Kilistu ba kulibanga kubakele na kulya nambe kunwa maninga, nambe kulya kasitu uje kubabatwile mulibu na kwitisa maninga endi. Kulya maninga nambe kasitu kubetisile maninga kwalifwile na kulemesa tumponya nambe kulinga bupangala. Kutunda ha simbu ije, baka-Kilistu ba busunga kubesi kulya nambe kunwa maninga. Batico ano matangwa? Yehova acishaka ngwendi tumone maninga kupwa a seho.

13. Bika baka-Kilistu banapande kubyana kubaka maninga?

 ¹³ Oku kulumbununa ngwabo baka-Kilistu banapande kubyana kubaka maninga ndi? Eyo. Yehova natushiki ngwendi kutwapandele kulya nambe kunwa maninga. Cakumwenako, nga ndotolo amibindika kunwa bwala, kuma munapande kulitiba nguya ya bwala ndi? Embwe. Mu ngila imolika, lishiko lya kutubindika kulya nambe kunwa maninga linambateselela na kubyana kutwaka maninga mu mubila.—Taleni Biñanda bya Kushongo ha 29.

14, 15. Bika baka-Kilistu banapande kwononokela Yehova na kumona kuyoya kupwa kwa seho?

¹⁴ Tulinga bati nga ndotolo atuleka ngwendi tutsa nga tubyana kutwaka maninga? Munu napande kulyangwila babenya kwononoka lishiko lya Njambi ha maninga indi embwe. Yetu baka-Kilistu twasingimika manene bwana bwa kuyoya bwatwana Njambi. Ngeci twasa kwangula bingila byeka bya kutusakelamo mangana tuyoye. Oloni kututaba kutwaka maninga.

¹⁵ Tulinga mutwasela mwoshe mangana tulikangule, oloni kututaba kutwaka maninga mwafwa Njambi wamona kuyoya kupwa kwa seho. Cacibwa kwononoka Njambi kutubakana kupokola mashiko endi mu kushaka lika kunyunga kuyoya kwetu. Yesu wendekele ngwendi: “Omwo munu woshe ashaka kunyunga mwonyo wendi auzimbalesa, oloni munu uje azimbalesa mwonyo wendi omwo lizina lyange akauwana.” (Mateo 16:25) Tushaka kwononoka Yehova mwafwa twamuzema. Ikeye azibuka byuma bije bitunenela bubwa. Ngeci tumoneni kuyoya kupwa kwa seho ngwe mwacimona Yehova.—Vahevelu 11:6.

16. Mwafwa bika bangamba ba Njambi bashaka kumwononoka?

¹⁶ Bangamba ba Njambi ba kulongwa bashaka kwononoka lishiko lyendi ha maninga. Kubesi kutaba kulya nambe kunwa maninga, co lalo kubesi kutaba kubasaka  kupangesa maninga. * Oloni basa kutaba bingila byeka bya kubasakelamo mangana bayoye. Bakulahela ngwabo Ishamatanga uje watangele kuyoya na maninga azibuka byuma bije bibanenela bubwa. Mutaba ngweni Njambi azibuka byuma bije binenela bubwa ndi?

17. Ngila muka ije Yehova watabesele Baisalele kupangesa maninga?

¹⁷ Mu Mashiko a Mosesa, Yehova wendekele ngwendi: “Omwo mwonyo wa cuma coshe ca kuyoya wakala mu maninga, eci cikeco cashikile Shukulu Kalunga ngeci maninga oshe bawetile ku mutula mu kwambesa [nambe kukonekela] bubi bwa banu. Maninga akewo anapu mwonyo, co akewo akambesa bubi.” (Valevi 17:11) Baisalele mubalingile bubi, bakombelele tusitu na kulomba kapilistu etile maninga amo ha mutula ku tembele. Balingile ngoco mangana Yehova abasambese ku bubi bwabo. Eyi ikeyo lika ngila ije Yehova watabesele Baisalele kupangesa maninga.

18. Ñombelo ya Yesu inatubezikisa bati?

¹⁸ Omwo Yesu wezile hano hasi, lishiko lya kukombelela tusitu lyahwile mwafwa wanene kuyoya kwendi, nambe maninga endi, mangana batusambese ku bubi bwetu. (Mateo 20:28; Vahevelu 10:1) Kuyoya kwa Yesu kwapwile kwa seho manene mwafwa munima ya kumusangula kuli Yehova na kwiluka mwilu, kwalingisile Yehova ane banu kubezika kwa kukayoya myaka yoshe.—Yowano 3:16; Vahevelu 9:11, 12; 1 Petulu 1:18, 19.

19. Bika bitunapande kulinga mangana ‘tujele ku maninga a banu boshe’?

 ¹⁹ Tukandelela kuli Yehova ha bwana bwa kuyoya bwanatwana. Co tushaka kuleka banu ngwetu nga bakulahela Yesu, bakayoya myaka yoshe. Twazema banu, ngeci tupanga na nzili mu kubalongesa mangana bakayoye. (Ezekiyele 3:17-21) Nga tulinga ngoco, tukasa kwendeka ngwe mwendekele kapositolo Paulu ngwendi: “Yange njinajele ku maninga a banu boshe, mwafwa kunjalikelele kumileka mwoshe mwaya biyongola bya Njambi.” (Vilinga 20:26, 27, NWT) Tumwesa ngwetu twasingimika kuyoya na maninga nga tuleka bakwetu bya Yehova nomwo mwamona kuyoya.