CILONGESA 01
Mbimbiliya Imikwasa Bati?
Bwingi bwetu tukashaka kuzibuka bituli na kuyoyela, nebi bituli na kuyandela, nebi bikalingiwa ku munu nga natsi na byuma bikalingiwa kulutwe. Co lalo byuma bya ha litangwa na litangwa bya kufwa ngwe mwakuliyoyesela na mwakupwila ba kubwahelela mu naanga, binasa kutulingisa tulishoshomwene. Oloni banu babangi banalimwena ngwabo Mbimbiliya inakumbulula bihula bibakalihula, co lalo ili na binangulo byabibwa. Cili bene, Mbimbiliya yasa kukwasa banu boshe.
1. Mbimbiliya inakumbulula bihula muka?
Mbimbiliya inakumbulula bihula bya kufwa ngwe: Kuyoya kwashangumukile bati? Bika bituli na kuyoyela? Bika bituli na kuyandela? Bika bikalingiwa kuli munu nga natsi? Mwafwa bika kuli binzita nga banu boshe bashaka kukala mu kwoloka? Lifuti-libu likafwa bati kulutwe? Kulihula ebi bihula kukwabihile. Banu babangi banalimwena ngwabo bikumbululo bili mu Mbimbiliya binabakwasa manene.
2. Mbimbiliya yasa kutukwasa bati ha litangwa na litangwa?
Mbimbiliya ili na binangulo byabibwa. Cakumwenako, yasa kukwasa naanga ipwe ya kubwahelela. Co lalo itukwasa nga tuli mu bishoti na kutukwasa tupange mwamubwa bipangi byetu. Omwo tutwalelelaho kulilongesa Mbimbiliya, tuziba biyendeka ha biñanda ebi na biñanda bikwabo. Mulimwena ngweni “bisoneka byoshe [byoshe bili mu Mbimbiliya] . . . bili na seho.”—2 Timateo 3:16.
Eli libulu kulyengile Mbimbiliya. Linapu lika lya kupangesa mu kulilongesa Mbimbiliya. Ngeci, cibwaha manene nga mutanda bisoneka na kumona mubinalitombwela na byuma bimuli na kulilongesa.
TONDESESENI
Mbimbiliya inakwasa bati banu babangi? Bika bimikwasa mangana mulikuwe kuitanda? Bakweni basa kumikwasa bati mangana muizibisise mwamubwa?
3. Mbimbiliya yasa kututwamenena
Mbimbiliya inapu ngwe ceke. Yasa kutukwasa kwangula mwamubwa bya kulinga na kutukwasa tuzibuke byuma bikalingiwa kulutwe.
Tandeni Myaso 119:105, na kusimutwiya ha bihula binatako:
-
Muka-kusoneka ou mukanda wamwene bati Mbimbiliya?
-
Yenico mwamona bati Mbimbiliya?
4. Mbimbiliya inakumbulula bihula bitukalihula
Munakazi umo walimwenenene omwo Mbimbiliya yakumbulwilile bihula byakele nabyo ha myaka yaingi. Kengeni VIDIO na kusimutwiya ha bihula binatako.
-
Kwesekesa na vidio, bihula bya kufwa bati byakele nabyo uje munakazi?
-
Kulilongesa Mbimbiliya kwamukwasele bati?
Mbimbiliya kuyatubindikile kwihula bihula. Tandeni Mateo 7:7, na kusimutwiya ha cihula cinatako:
-
Bihula muka bimuli nabyo mangana tumone muinakumbulwila Mbimbiliya?
5. Mwasa kulikuwa kutanda Mbimbiliya
Banu babangi bakalikuu kutanda Mbimbiliya, co bali na kulimwena bubwa buli mu kulinga ngoco. Kengeni VIDIO na kusimutwiya ha bihula binatako.
-
Kwesekesa na vidio, baje bakwenje na bambanda bamona bati kutanda mabulu?
-
Indi bamona bati kutanda Mbimbiliya?
Mu Mbimbiliya muli biñanda bije byasa kutuzembeleka na kutukwasa tulabelele byuma bija kulutwe. Tandeni Loma 15:4, na kusimutwiya ha cihula cinatako:
-
Mukalizibi bati mumukazibi byuma byanatukulahesa Njambi mu Mbimbiliya?
6. Bakwetu basa kutukwasa tuzibisise Mbimbiliya
Nameme banu babangi bakalitandela Mbimbiliya bakebo babenya, oloni banalimwena ngwabo banazibisisa mwamubwa Mbimbiliya mwafwa bakwabo banabakwasa. Tandeni Vilinga 8:26-31, na kusimutwiya ha cihula cinatako:
-
Bika bitukwasa tuzibisise Mbimbiliya?—Taleni vesi 30 na 31.
Munalume wa Kaisopya watondele ngwendi munu umo amukwase kuzibisisa Bisoneka. Banu babangi ano matangwa nabo banalimwena ngwabo banazibisisa mwamubwa Mbimbiliya mwafwa bakwabo banabakwasa
BAMO BAKENDEKA NGWABO: “Kulilongesa Mbimbiliya kunapu kubiisa lika simbu.”
-
Yenico mumona bati? Mwafwa bika?
SIMPI YAKAMA
Mbimbiliya ili na binangulo bitukwasa ha litangwa na litangwa. Inakumbulula bihula bibakalihula banu, co lalo ili na biñanda bije byasa kutuzembeleka na kutukwasa tulabelele byuma bija kulutwe.
Kwitulukamo
-
Binangulo muka bitwasa kuwana mu Mbimbiliya?
-
Mbimbiliya inakumbulula bihula muka bibakalihula banu?
-
Biñanda muka bimushaka ngweni Mbimbiliya imikwase kuzibisisa?
WANENI BIKWABO
Moneni mubyasa kutukwasela binangulo bya mu Mbimbiliya.
“Bilongesa bya mu Mbimbiliya Bikatwana Mana Simbu Yoshe” (Kaposhi ka Kukengela ka Na. 1 2018)
Moneni omwo Mbimbiliya yakwaselelemo munalume umo uje walifwitile na bishoti kushwa ku bwanike bwendi.
Binangulo muka bya mu Mbimbiliya byasa kukwasa naanga?
“Byuma 12 Bikwasa Naanga Ikale Mwamubwa” (Toneni! ya Na. 2 2018)
Zibeni biyendeka Mbimbiliya ha munu ali na kuyula kano kaye.
Bika Bimunapande Kulilongesela Mbimbiliya?—Vidio Yamutunu (3:14)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
