Yehova kakatavetha vanu vavavi kuviyitha Palandaisi. Mu Palandaisi mukakala vavuthamba vendi lika. Vika vikalingiwa ku vanu vavavi? Nga tushaka ngwetu tutanekeye, tutandeni muthzimbu wa Nowa. Nowa wayoyele ku myaka ya kuthañulu. Wapwile munu wamuvwa uje walingile chithzango cha Yehova thimbu yoshe. Oloni vanu vakwavo hano hathi valingile vyuma vyavivi. Ngechi Yehova walekele Nowa ngwendi akanena livathzi mangana akanyongethe vanu voshe vavavi. Walekele Nowa ashonge vwato mangana ikeye na nanga yendi kethi vakathse omwo likayija Livathzi.—Kushangumuka 6:9-18.

Nowa na nanga yendi vashongele vwato. Nowa wanangwile vanu vyakwija kwa Livathzi, oloni kuvamutolilile. Vatwaleleleho kulinga vyuma vyavivi. Omwo Nowa wamanethele kushonga vwato, wakovelethelemo tuthitu. Ikeye na nanga yendi navo vakovelele mu vwato. Ngechi Yehova wanyokethele nyondthzi yakama manene. Nyondthzi yanyokele matangwa 40 vuthsiki na mutanya. Hathi hoshe hashulile mema.—Kushangumuka 7:7-12.

 Vanu vavavi vanyongele, oloni Nowa na nanga yendi vovokele. Yehova wovwele Nowa na nanga yendi ku Livathzi nakuvaka mu kaye kakavwa kaje wajelethele ku vyuma vyavivi. (Kushangumuka 7:22, 23) Mbimbiliya yendeka ngwayo thimbu yili nakwija omwo Yehova akanyongetha vaje vali nakuvyana kulinga vyavivwa. Vanu vavavwa kuvakavanyongetha. Vakayoya myaka yoshe mu Palandaisi hano hathi.—2 Petulu 2:5, 6, 9.

Matangwa ano vanu vavangi vali nakulinga vyuma vyavivi. Kaye kanashulu vukalu. Yehova ali nakutuma Vakaleho vendi thimbu na thimbu yoshe ngwendi vanangule vanu, oloni vanu vavangi kuvethi nakutolilila ku majwi a Yehova. Shavoko kuthethza vilinga vyavo vyavivi. Shavoko lalo kukavangeya vyali nakwendeka Njambi ha vyuma vyavivwa na vyavivi. Vika vikalingiwa ku vanu ava? Ava vanu tangwa vakathethza vingila vyavo vyavivi ndi? Vavangi kuvakatenguluka. Thimbu yili nakwija omwo vanu vavavi vakavanyongetha, cho kuvakayoyo lalo.—Myaso 92:7.

Kaye kuvakakanyongetha, oloni vakakatengulula kupwa Palandaisi. Vaje vapwa vavuthamba va Njambi vakayoya myaka yoshe mu Palandaisi hano hathi.—Myaso 37:29.