Nga mushaka kupwa kavuthamba ka Njambi, munapande kulilongetha vya Njambi. Kutala vavuthamba veni vathzivuka lithzina lyeni nakulipangetha ndi? Mukemwo vene. Na Njambi ashaka muthzivuke lithzina lyendi nakulipangetha. Lithzina lya Njambi ikeye Yehova. (Myaso 83:18, NW; Mateo 6:9) Munapande lalo kutanekeya vyuma vyashaka na vije kashakele. Munapande kutanekeya vavuthamba vendi na vaka-ñole vendi. Kutanekeya munu kukambata thimbu yayilaja. Mbimbiliya yendeka ngwayo chapwa chachivwa nga tukala na thimbu yakulilongetha vya Yehova.—Efeso 5:15, 16.

Vavuthamba va Njambi vakalingi vyuma vije vimuthzivitha kuvwaha ku mbunge. Achithinganyekeni hali vavuthamba veni. Nga muvalinga mwamuvi nakulinga vyuma vivathzinda, vatha kutwalelelaho kupwa vavuthamba veni ndi? Embwe! Ngechi, nga mushaka kupwa kavuthamba ka Njambi, munapande kulinga vyuma vije vimuthzivitha kuvwaha ku mbunge.—Yowano 4:24.

Kethi vulombelo vwoshe-vwoshe vwatha kumikwatha kupwa kavuthamba ka Njambi. Yesu, kavuthamba wakama wa Njambi, wendekele ha vingila vivali. Ngila yimo yinapu yakujanjavala nambe ngwetu yakama, cho lalo vanu vavangi vali nakwendamo. Eyi ngila yitwala vanu kukunyonga. Ngila yikwavo yinapu yakulishwata, cho lalo vanu vavandondo vali nakwendamo. Eyi ngila yitwala vanu ku mwonyo wa myaka yoshe. Ngechi, nga mushaka kupwa kavuthamba ka Njambi, munapande kutanekeya ngila yayivwa yakumulemethelamo.—Mateo 7:13, 14.