Nga mushaka kupwa kavuthamba ka Njambi, munapande kukala mu vulombelo vuje vwatavetha Njambi. Yesu wendekele ngwendi vaka-kulemetha Njambi va vuthunga, vakalemetha Njambi “mu vusunga.” (Yowano 4:23, 24) Kuli ngila yimo lika ya vuthunga yakulemethelamo Njambi. (Efeso 4:4-6) Vulombelo vwa vuthunga vutwala vanu kukuyoya kwa myaka yoshe, oloni vulombelo vwa makuli vutwala vanu kukunyonga.—Mateo 7:13, 14.

Mwatha kuthzivuka vulombelo vwa vuthunga hakutala vanu vaje vakalamo. Vaka-kulemetha Yehova va vuthunga vanapande kupwa vanu vavavwa, mwafwa Yehova wapwa wamuvwa. Muti wa malalanja wauvwa ukemi malalanja akutovala, ngechi na vulombelo vwa vuthunga vwakala na vanu vavavwa.—Mateo 7:15-20.

Vavuthamba va Yehova vathingimika manene Mbimbiliya. Vatanekeya ngwavo Mbimbiliya yatunda kuli Njambi. Vatava ngechi Mbimbiliya yivatwamenene mu kuyoya kwavo, nakuvaleka mwakumanethela vukalu vwavo, nakuvakwatha kulilongetha vya Njambi. (2 Timoteo 3:16) Vakakavangeya vyuma vivakalongetha.

 Vavuthamba va Yehova valithzema umo na mukwavo. Yesu wathzemene vanu hakuvalongetha vya Njambi, nakukangula vaka-kuvinja. Vaje vakala mu vulombelo vwa vuthunga, vathzema lalo vakwavo. Kuvethi kuyengula vihutu nambe vanu va ku miyati yeka, embwe, mwafwa na Yesu kalingile ngocho. Yesu wendekele ngwendi vandongethi vendi vakavathzivukila hakulithzema na vakwavo.—Yowano 13:35.

Vavuthamba va Njambi vathingimika lithzina lya Njambi, Yehova. Nga munu avyana kupangetha lithzina lyeni, kutala atha kupwa kavuthamba keni wakama ndi? Embwe! Nga tuli na kavuthamba ketu, tukapangetha lithzina lyendi, nakwendeka lalo vyuma vyavivwa hali ikeye ku vanu veka. Ngechi vaje vashaka kupwa vavuthamba va Njambi vanapande kupangetha lithzina lyendi nakwendeka hali ikeye ku vanu veka. Yehova ashaka ngwendi tulinge ngocho.—Mateo 6:9; Loma 10:13, 14.

Vavuthamba va Njambi vakalongetha vanu vya Vumwene vwa Njambi, ngwe omwo walingile Yesu. Vumwene vwa Njambi vwapwa fulumende ya mwilu yije yikatengulula kaye kupwa Palandaisi. Vavuthamba va Njambi vakaleke vakwavo viñanda vyavivwa vya Vumwene vwa Njambi.—Mateo 24:14.

Vakaleho va Yehova vapwa vavuthamba va Njambi. Vakathingimika Mbimbiliya, cho valithzema lalo umo na mukwavo. Vakapangetha lithzina lya Njambi nakulithingimika, cho vakalongetha vakwavo vya Vumwene vwa Njambi. Vakaleho va Yehova vakevo vakala mu vulombelo vwa vuthunga hano hathi mu thimbu yino.