Kupwa kavuthamba ka Njambi chikecho chuma chachivwa manene chimwatha kulinga. Njambi amilongetha mwakupwila vakuvwahelela nakuyoya vwino. Njambi amithzitula ku vikulahelo na ku vilinga vyavivi. Atolilila ku malombelo eni. Cho amikwatha lalo mupwe va kwoloka nakumukulahela. (Myaso 71:5; 73:28) Njambi amikwatha nga muli mu vukalu. (Myaso 18:18) Akamyana lalo vwana vwa mwonyo wa myaka yoshe.—Loma 6:23.

Nga mushwena kuli Njambi, cho mushwena lalo kuli vavuthamba va Njambi. Vavuthamba va Njambi navo vapwa vavuthamba veni. Vapwa ngwe vandolome na vandokathzi veni. Ngechi vavwahelela manene kumilongetha vya Njambi, cho lalo vamikwatha nakumikanyametha.

Kutwapwile hamo na Njambi. Omu muli nakushaka Njambi apwe kavuthamba keni, munapande kuthzivithitha nimbu yino yakulema. Kupwa kavuthamba ka Njambi kuchilumbununa ngwavo munapu hamo nendi, embwe. Njambi natumbama myaka yayingi manene, cho wakala na mana na ndthzili kutuvakana yetu. Ikeye wapwa Muka-kutuyula. Ngechi nga tushaka kupwa vavuthamba vendi, tunapande kutolilila kuli ikeye nakulinga vyuma vyatuleka kulinga. Nga tulinga ngocho, cho tuvethzika mu vyuma vyoshe vitulinga.—Isaya 48:18.