Njambi ashaka ngwendi mupwe kavuthamba kendi. Mwathinganyekaho laja ngweni mwatha kupwa kavuthamba ka Munu wakulema manene mwilu na hathi ndi? Avilahama, uje wayoyele kuthañulu, vamutumbwile ngwavo kavuthamba ka Njambi. (Yakomba 2:23) Mu Mbimbiliya mwakala vanu veka lalo vaje vapwile vavuthamba va Njambi, cho Njambi wavavethzikithile manene. Matangwa ano, vanu vavangi mu kaye koshe vanapu vavuthamba va Njambi. Neni mwatha kupwa kavuthamba ka Njambi.

Kupwa kavuthamba ka Njambi kwakuvwa kutuvakana kupwa kavuthamba ka munu. Njambi kethi kuthzivitha shwamwa vavuthamba vendi vakulongwa, embwe. (Myaso 18:25) Kupwa kavuthamba ka Njambi kwakuvwa kutuvakana kukala na vufuko. Nga munu wa vufuko nathsi, vimbongo vyendi vakavili ku vanu veka. Oloni vaje valikwata vuthamba na Njambi vakala na vufuko vuje kuvatha kwiva ku munu.—Mateo 6:19.

Vanu vamo vatha kumivindika kulilongetha vya Njambi. Nambe vene vavushoko vweni na vavuthamba veni vatha kumivindika kulilongetha vya Njambi. (Mateo 10:36, 37) Nga vanu vamo vamijola nambe kumithzivitha lyova, lihuleni ngweni, ‘Iya njapande kuthzivitha kuvwaha ku mbunge, vanu indi Njambi?’ Thinganyekeni ha chihula echi: Nga munu amileka ngwendi mulikele kulya, mwatha kumutolilila ndi? Kumwatha kulinga ngocho! Munapande kulya mangana muyoye. Oloni Njambi atha kumikwatha muyoye myaka yoshe! Ngechi kethi mutavethe munu amivindike kulilongetha mwakupwila kavuthamba ka Njambi.—Yowano 17:3.