Satana na vandemona vendi kuvashakele ngwavo mupangele Njambi. Vashaka kutengulula vanu voshe vatunde kuli Njambi ngwe vatha kulinga ngocho. Ngila muka yivakapangetha hakushaka vatengulule vanu? Ngila yimo yivakapangetha yapwa vulombelo vwa makuli. (2 Kolinte 11:13-15) Nga vulombelo kuvulongetha vuthunga vwa mu Mbimbiliya, cho vunapu vwa makuli. Vulombelo vwa makuli vunafu ngwe vimbongo vya makuli. Vimbongo vya makuli vikasholoka ngwe vimbongo vya vuthunga, oloni kuvyethi kupanga. Vyatha kuminenela vukalu vwakama.

Makuli a mu vulombelo kuwatha kuthzivitha kuvwaha Yehova, Njambi wa vuthunga. Ha thimbu Yesu wakele hano hathi, vanu va mu vulombelo vashakele kumuthsiya. Vathinganyekele ngwavo vulombelo vwavo vwapwile vwa vuthunga. Vendekele ngwavo: “Njambi lika ikeye Tatetu.” Yesu wavatavele ndi? Embwe! Wavalekele ngwendi: “Yeni muli na ishweni, Liyavola.” (Yowano 8:41, 44) Vanu vavangi matangwa ano vathinganyeka ngwavo vali nakulemetha Njambi, oloni vali nakupangela Satana na vandemona vendi!—1 Kolinte 10:20.

 Muti wauvi ukemi vushuka vwavuvi, ngechi na vulombelo vwa makuli vwakala na vanu vaka-kulinga vyavivi. Mu kaye mwashulu vukalu mwafwa vanu vali nakulinga vyuma vyavivi. Muli vaka-vukithzi, vaka-kulilwitha, vaka-kwiva, vaka-kulyatelela vakwavo, vaka-kuthsiya vakwavo, vaka-kulala vakwavo mukuvathindiya. Vanu vavangi vaje vakalingi evi vyuma vyavivi vapwa vaka-vulombelo, oloni vulombelo vwavo kuvwethi kuvakwatha kulinga vyavivwa. Kuvatha kupwa vavuthamba va Njambi nga vatwalelela kulinga vyuma vyavivi.—Mateo 7:17, 18.

Vulombelo vwa makuli vukalongetha vanu valombele tumponya. Njambi wavindika kulombela tumponya. Echi chinapandemo vene. Mwatha kuthziva kuvwaha nga munu umo kethi kumyendeketha, oloni akendeketha lika chikupulo cheni ndi? Munu wachifwa echi, natha kupwa kavuthamba keni wa vuthunga ndi? Embwe. Yehova washaka vanu vendeke kuli ikeye, kethi ku chuma chakumunga-munga nambe ku chikupulo, chije kuchethi kuyoya.—Kutuuka 20:4, 5.

Vulombelo vwa makuli vukalongetha ngwavwo kuthsiya vanu ha thimbu ya ndthzita kwapwa kwakuvwa. Yesu wendekele ngwendi vavuthamba va Njambi valithzema umo na mukwavo. Kutwethi kuthsiya vanu vatwathzema. (Yowano 13:35) Nambe kuthsiya vanu vavavi nakwo kwakuvi. Omwo vaka-ñole va Yesu vethzile nakumukuta, katavethele vandongethi vendi kulwitha vaje vanu mangana vamuvingilikiye.—Mateo 26:51, 52.

Vulombelo vwa makuli vwalongetha ngwavwo vanu vavavi vakayandangela mu mbulu ya tuhya. Oloni Mbimbiliya yalongetha ngwayo vuvi vukatwala ku kuthsa. (Loma 6:23) Yehova wapwa Njambi wa chithzemo. Kutala Njambi wa chithzemo atha kuyandetha vanu myaka yoshe ndi? Kethi ngocho! Mu Palandaisi mukakala vulombelo vumo lika vuje vwatavetha Yehova. (Kujombolola 15:4) Vulombelo vwoshe vuje vwalongetha makuli a Satana vukatundako.