Kuthsa kwalyangununa na kuyoya. Kuthsa kwapwa ngwe kulala tulo twakama manene. (Yowano 11:11-14) Vathsi kuvethi kuthziva, nambe kumona, nambe kwendeka, nambe kuthinganyeka vimo. (Muka-kwambulula 9:5, 10) Vulombelo vwa makuli vwalongetha ngwavwo vathsi vakayi kweka nakuyoyako na vakukulwila vavo. Mbimbiliya kuyethi kulongetha ngocho.

Vathsi kuvatha kutukwatha, nambe kutunenela vushonde. Vanu vavangi vakalingi vilika vimo nakukombelela, mwafwa ngwavo kulinga ngocho kwatha kuthzivitha kuvwaha vathsi. Evi vilika vyapwa vyavivi ku mesho a Njambi mwafwa vyapwa makuli a Satana. Cho kuvyethi kuthzivitha lalo vathsi kuvwaha, mwafwa kuvethi nakuyoya. Kutwapandele kutewa vathsi nambe kuvalemetha. Tunapande kulemetha lika Njambi.—Mateo 4:10.

Vathsi vakayoya lalo. Yehova akathangula vathsi vakayoye mu Palandaisi hano hathi. Thimbu yakavathangula kanda yete. (Yowano 5:28, 29; Vilinga 24:15) Njambi atha kwindula vathsi ngwe omwo mwatha kwindula munu ku tulo.—Mako 5:22, 23, 41, 42.

Longethi yakwendeka ngwavo kutwethi kuthsa yapwa makuli a Satana Liyavolo. Satana na vandemona vendi valingitha vanu vathinganyeke ngwavo vakulu vakatwalelelaho kuyoya, cho vakanenela vanu mishongo na vukalu vwakulithethza-thethza. Vithimbu vimo, Satana akakwitha vanu kupangetha vilota nambe vimona. Yehova wathzinda vanu vaje vashaka kwendeka na vathsi.—Kwituluka mu Mashiko 18:10-12.