VUTHUNGA vwa vyuma muka? Vuthunga vuje vwendeka ha vihula vimo vyakulema vivakehula vanu. Mpamo mwalihulaho laja vihula vino vili mwithi:

• Njambi watwaka mbunge ndi?

• Ndthzita na kuyanda vikahwa ndi?

• Vika vikalingiwa kuli yetu nga tunathsi?

• Vanu vaje vathsa tukavamona lalo ndi?

• Njatha kulomba vati mangana Njambi anjithzive?

• Njatha kupwa vati wakuvwahelela mu kuyoya?

Kuli kumunatha kuwana vikumbululo vyevi vihula? Nga muya mu vinjuvo vyakutulikila nakulandethela mavulu, munatha kuwana mwakushula mwa mavulu aje vamona vanu ngwavo anatha kukumbulula evi vihula. Oloni awa mavulu alipyakana. Amo asholoka kupwa akulema, oloni kuwethi kwishwala myaka yayingi, ngechi vakawathononona lalo, nambe kwingithamo eka.

Oloni kwakala livulu limo lije lyakumbulula vwino evi vihula. Eli livulu lyendeka vuthunga. Yesu Kilisitu walombele kuli Njambi ngwendi: “Lijwi lyove lyapwa vushunga.” (Yowano 17:17) Matangwa ano, eli Lijwi lya Njambi twalitanekeya kupwa likelyo Mbimbiliya ya Kujela. Hamitamba ya mapapelo anakavangeyaho, muwanaho muyakumbulwila Mbimbiliya evi vihula vili helu mungila yayivwa, cho lalo ya vuthunga.

OVYO VANU VAKEHWILA CHIHULA ECHI: Tuli nakuyoyela mu kaye ka vanu va vukenya, va vilinga vyakuhenga. Vulombelo vwavungi vukalongetha ngwavwo Njambi ikeye wanena tuyando tuli nakumona.

VYUMA VIYALONGETHA MBIMBILIYA: Njambi kethi ikeye wanena vyuma vyavivi. Mukanda wa Yombi 34:10 wendeka ngwawo: “Njambi kesi kulinga vuvi nambe kamandondo, co Muka-nzili yoshe kesi kulinga vuvi embwe.” Njambi washaka kulingila vanu vyuma vyavivwa. Ngechi Yesu watulekele tulombe ngwetu: “Tatetu uli mwilu, . . . Vumwene vwove vwije, cizango cove vacilinge ano asi, ngwe omwo vakacilingi mwilu.” (Mateo 6:9, 10) Njambi watwaka mbunge manene, ngechi walingile chuma chakama mangana ashulithile chithzango chendi.—Yowano 3:16.

Taleni lalo Kushangumuka 1:26-28; Yakomba 1:13; na 1 Petulu 5:6, 7.

OVYO VANU VAKEHWILA CHIHULA ECHI: Ndthzita yili nakunyongetha myonyo ya vanu vavangi manene. Tuvavoshe tukathzivi kuvihya ku vimbunge ha tuyando vali nakumona vanu.

VYUMA VIYALONGETHA MBIMBILIYA: Njambi wendekele chimweja ngwendi akanena kwoloka mu kaye koshe. Mu Vumwene vwendi, vuje vwapwa fulumende ya mwilu, vanu “kuvakalivwaesela lalo kulwa nzita embwe.” Oloni “vakafula mikwale yavo kuyipwisa matemo.” (Isaya 2:4) Njambi akamanetha vilinga vyakuhenga na tuyando twoshe. Mbimbiliya yatukulahetha ngwayo: “[Njambi] akasikumuna misozi yoshe ku mesho avo. Co kukukakala kutsa nambe vusiwa nambe kulila nambe kukemanga. Omwo vyuma vyalaja [kwakelako na vilinga vyakuhenga na tuyando twa matangwa ano] vineti.”—Kujombolola 21:3, 4.

Taleni lalo Myaso 37:10, 11; 46:9; na Mika 4:1-4.

OVYO VANU VAKEHWILA CHIHULA ECHI: Vulombelo vwavungi mu kaye vukalongetha ngwavwo kwakala chuma chimo mukati ka muvila wa munu chije chikatwalelelaho kuyoya nga munu nathsi. Vulombelo vumo vwalongetha ngwavwo vathsi vatha kunenela vanu vakuyoya vukalu. Cho lalo ngwavwo Njambi akathzangametha vaka-kulinga vuvi hakuvombila mu mbulu ya tuhya nakuvayandetha myaka yoshe.

VYUMA VIYALONGETHA MBIMBILIYA: Nga munu nathsi, kethi kuya nakuyoyela lalo kweka, embwe. Mukanda wa Muka-kwambulula 9:5 wendeka ngwawo: “Vatsi neci vene vazivuka cai.” Hakuwana ngwe vathsi kuvatha kuthzivuka vyuma vimo, nambe kuthziva, nambe kumona, ngechi kuvatha kunenela vanu vakuyoya vukalu, nambe kuvakwatha, embwe.—Myaso 146:3, 4.

Taleni lalo Kushangumuka 3:19; na Muka-kwambulula 9:6, 10.

OVYO VANU VAKEHWILA CHIHULA ECHI: Twashaka kuyoya, cho lalo twashaka kuyoya na vanu vaje vatwathzema. Ngechi twakala na lishungu lyakushaka kukamona lalo vanu vetu vatwathzema vaje vathsa.

VYUMA VIYALONGETHA MBIMBILIYA: Vanu vavangi vaje vathsa vakathanguka. Yesu watukulahetha ngwendi “vatsi voshe . . . vakatuuka mu vimbumbo vyavo.” (Yowano 5:28, 29) Kwetheketha na viyongola vya Njambi vyakulivanga, vanu vaje vavakathangula vakayoya lalo mu Palandaisi hano hathi. (Luka 23:43) Kwetheketha na likulahetho eli, vanu vakwononoka vakakala na mivila ya kulikangula, cho vakayoya lalo myaka yoshe. Mbimbiliya yendeka ngwayo: “Vaka-vushunga vakakala mu lifuti, co vakayoyelamo ku myaka yoshe.”—Myaso 37:29.

Taleni lalo Yombi 14:14, 15; Luka 7:11-17; na Vilinga 24:15.

OVYO VANU VAKEHWILA CHIHULA ECHI: Vanu mu vulombelo vwavungi vakalombo. Oloni vavangi vathinganyeka ngwavo malombelo avo kuvethi kuwakumbulula.

VYUMA VIYALONGETHA MBIMBILIYA: Yesu watulongetha ngwendi kutwapandele kwilukila majwi amo lika mu malombelo etu. Wendekele ngwendi: “Mukulomba kweni, kesi mutumise manene majwi amangi akujeneka seo.” (Mateo 6:7) Nga tushaka ngwetu Njambi atolilile ku malombelo etu, tunapande kulomba mu ngila yije yashaka. Ngechi tunapande kutanekeya chithzango cha Njambi nakulomba mwaya chithzango chendi. Mukanda wa 1 Yowano 5:14 wendeka ngwawo: “[Njambi] atuziva nga tumulomba cuma cimo ngwe ku cizango cendi.”

Taleni lalo Myaso 65:2; Yowano 14:6, 14; na 1 Yowano 3:22.

OVYO VANU VAKEHWILA CHIHULA ECHI: Vanu vavangi vakulahela ngwavo vimbongo, na luthsimo, nambe kuvwaha ku chihanga, vinatha kuvalingitha vavwahelele. Ngechi vashaka kutondatonda evi vyuma, oloni kuvethi kupwa vakuvwahelela.

VYUMA VIYALONGETHA MBIMBILIYA: Yesu walumbunwine vyuma vikalingitha munu kupwa wakuvwahelela. Wendekele ngwendi: “Vanavezika vaka-kuutwa [ku sipilitu].” (Mateo 5:3) Twatha kupwa vakuvwahelela manene mu kuyoya kwetu nga tulya vyakulya vya ku sipilitu, nambe ngwetu kulilongetha vuthunga vwa Njambi na viyongola vyendi. Ovu vuthunga vwakala mu Mbimbiliya. Nga tuthzivuka ovu vuthunga, cho twatha kuthzivuka vyuma vyakulema nevi vyakujeneka kulema. Nga tutava Mbimbiliya yitutwamenene mu vyuma vitulinga, cho tupwa vakuvwahelela.—Luka 11:28.

Taleni lalo Visimo 3:5, 6, 13-18; na 1 Timateo 6:9, 10.

 Tunathimutwiya lika mukavatu muyakumbulwila Mbimbiliya evi vihula 6. Mushaka kuthzivuka vyuma vikwavo ndi? Nga neni muli ha vanu vaje ‘vautwa ku sipilitu,’ cho tunakulahela ngwetu mushaka kuthzivuka vyavingi. Mpamo mwalihulaho laja vihula vikwavo vino: ‘Nga Njambi watwaka mbunge, mwafwa vika wechelela vyuma vyavivi na tuyando vitwaleleho lika? Vika vinjinapande kulinga mangana nanga yange yivwahelele?’ Mbimbiliya yakumbulula vwino evi vihula na vihula vyeka lalo.

Oloni vanu vavangi matangwa ano kuvashakele kutanda Mbimbiliya. Vamona ngwavo eli livulu lyapwa lyakama manene, ngechi kuvatha kulithzivithitha. Mushaka kumikwatha muwane muyakumbulwila Mbimbiliya evi vihula ndi? Vakaleho va Yehova vakala na vyuma vivali vije vyatha kumikwatha.

Chuma chakulivanga chinapu livulu lya Uno Chikupu Mbimbiliya Yanangula Vyuma Muka? mu Luvale, nambe Bibele I Lutañi Luli? mu Silozi. Eli livulu valithonekela kukwatha vanu vaje vathzethzama na vipangi mangana vayongole vihula vyakulema vije Mbimbiliya yakumbulula mungila yayathi. Chuma chamuchivali chinapu chilongetha cha Mbimbiliya chakujeneka kufwetela. Munu umo athzivuka manene Mbimbiliya uje wakala muyehi neni, natha kwija ha njuvo yeni, nambe ku mwela weka umushaka yeni vavenya mangana muthimutwiye vya mu Mbimbiliya mu thimbu yayindondo chalumingo na chalumingo. Vanu vavangi mu kaye koshe vanavakwatha manene kwitila mu chilongetha echi. Cho vavangi vanatava ngwavo: “Njinawana vuthunga!”

Vyuma vitwathimutwiya vinapu vya kulema manene. Vuthunga vwa mu Mbimbiliya vwatupatula ku vyuma vya kupanda, na ku vyuma vyakututanganetha, na ku lyova lya vanu. Vwatukwatha lalo kukala na lilavelelo, na kupwa vakuvwahelela, nakuthzivuka vyuma vyakulema vije tunapande kulinga mu kuyoya kwetu. Yesu wendekele ngwendi: “Mukazivuka vushunga, co vushunga vukamipatula.”—Yowano 8:32.