CAPITA 15
Bwaheleleni na Bipangi Bimuli ba Kupanga
‘Bwaheleleni mu bipangi bije muli na kulinga.’—MUKA-KWAMBULULA 3:13.
1-3. (a) Banu babangi bakalizibi bati kupanga bipangi byabo? (b) Bihula muka bitusimutwiya muno mu capita?
BANU mu kaye koshe bali na kupanga na nzili mangana bawane mwakuliyoyesela na kuyoyesa binaanga byabo. Babangi kubashakele bipangi bibakapanga. Co bakwabo bakazibi lyoba kuya ku bipangi ha litangwa na litangwa. Nga neni mukemwo mumukalizibi, co bika bimunapande kulinga mangana mubwahelele na bipangi byeni? Mwasa bati kushubuluka mu bipangi byeni?
2 Yehova natuleke ngwendi: “Bwana bwa Njambi ku banu bunapu kubwahelela kuje tuwana mu kulya na mu kunwa na kubwahelela lalo kuje tuwana mu bipangi bije tuli na kulinga.” (Muka-kwambulula 3:13) Yehova watutangele na lishungu lya kushaka kupanga. Ashaka ngwendi tubwahelele mu bipangi byetu.—Tandeni Muka-kwambulula 2:24; 5:18.
3 Bika bitukwasa tubwahelele mu bipangi byetu? Bipangi muka bije kubapandele kupanga baka-Kilisitu? Twasa bati kupanga mwamubwa bipangi bya ku mubila oku tulemesa Yehova? Cipangi muka ca seho manene citunapande kulinga?
BAKA-KUPANGA BA KUKOMOKESA BABALI
4, 5. Yehova wamona bati kupanga?
4 Yehova wazema kupanga. Ku Kushangumuka 1:1 ngwabo: “Ha kulibanga Njambi watangele lilu na kaye.” Omwo Njambi wamanesele kutanga lifuti-libu na byuma byakalaho, wamwene ngwendi “binabwaha manene.” (Kushangumuka 1:31) Ishamatanga yetu wabwahelelele na byuma byatangele.—1 Timateo 1:11, NWT.
5 Yehova kesi kulikela kupanga. Yesu wendekele ngwendi: “Tate ali na kupanga simbu yoshe.” (Yowano 5:17) Kutwasa kuzibuka byuma byoshe byanapanga Yehova, oloni bimo tubizibuka. Nangula baje bakayula na Munendi, Yesu Kilisitu, mu Bumwene bwa mwilu. (2 Kolinte 5:17) Yehova ali lalo na kutwamenena banu na kubanyungilila. Cipangi ca kwambulula cinakwasa banu babangi mu kaye koshe bazibuke Yehova, co banalabelela kukayoya myaka yoshe mu palandaisi hano hasi.—Yowano 6:44; Loma 6:23.
6, 7. Yesu wapangele bati na nzili?
6 Yesu nendi wazema kupanga ngeci mwa Ishe. Simbu kanda Yesu aije hano hasi, wapwile ngangula mu kupanga. Wapangelele hamo na Ishe mu kutanga byuma bya mwilu na hasi. (Visimo 8:22-31; Kolose 1:15-17) Omwo wezile hano hasi, watwaleleleho kupanga na nzili. Yesu walilongesele cipangi ca kushonga, co twakulahela ngwetu washongele mashoko, mapito, bimesa na bitumbamo. Yesu wazibukile mwamubwa cipangi cendi mukemwo bamutumbwile ngwabo “muka-kushonga.”—Mako 6:3.
7 Oloni cipangi cakama calingile Yesu hano hasi capwile ca kwambulula muzimbu waubwa na kulongesa banu bya Yehova. Yesu wakele lika na myaka itatu na hafu mangana amanese cipangi cendi, co wapangele na nzili kushwa mutondo kutwala na butsiki. (Luka 21:37, 38; Yowano 3:2) Yesu wakele na kwenda mangenzi amalaha mu bingila bya likungu mu kuya na kwambulula muzimbu waubwa ku banu.—Luka 8:1.
8, 9. Bika byalingisile Yesu abwahelele mu bipangi byendi?
8 Yesu wazemene manene kupanga cipangi ca Njambi. Capwile ngwe kulya kwendi. Eci cipangi camwanene nzili. Bisimbu bimo, wazezamene manene, co kakele na simbu ya kulya byakulya. (Yowano 4:31-38) Wapangesele simbu yendi yoshe mu kukwasa banu balilongese bya Ishe. Mukemwo wendekele kuli Yehova ngwendi: “Njinasholola bumpau bwobe hano hasi, co njinamanesa bipangi bije biwanjanene ngeci njibilinge.”—Yowano 17:4.
9 Ngwe mutunamono, Yehova na Yesu bakapanga na nzili, co bakazibi kubwaha na kushubuluka mu bipangi byabo. Ngeci, tushaka kutembwinina Njambi, co tushaka lalo kukabangeya mu myanja ya Yesu. (Efeso 5:1; 1 Petulu 2:21) Ebi bikebyo bikatulingisa tupange na nzili na kwaka mbunge ku bipangi byoshe bitupanga.
TUNAPANDE KUMONA BATI BIPANGI?
10, 11. Bika bitukwasa tumone bipangi byetu mu ngila yaibwa?
10 Yetu banu ba Yehova, tukapanga na nzili mangana tuliyoyese yetu babenya na binaanga byetu. Tushaka ngwetu tubwahelele mu kupanga bipangi byetu. Oloni bisimbu bimo kutwesi kubwahelela. Bika bitunapande kulinga mangana tulikuwe kupanga bipangi byetu?
Kukala na mbunge yaibwa kutulingisa tubwahelele na cipangi coshe coshe
11 Kaleni na mbunge yaibwa. Hamo kutwasa kutengulula bukalu bwa cipangi cetu, oloni twasa kumwesa mbunge yaibwa. Nga tuzibisisa obyo byashakela Yehova ngwendi tupange na nzili, kutukwasa manene. Cakumwenako, Yehova ashaka ngwendi munalume apange na nzili mangana awanene naanga yendi byuma bya ku mubila. Mbimbiliya ngwayo woshe onwa kuwanena naanga yendi bije bitondeka, “nabihya kutubakana uje kesi muka-kukulahela.” (1 Timateo 5:8) Nga muli na kulela naanga, co munapande kupanga na nzili mangana muwanene naanga yeni byuma bya ku mubila. Nga mulinga ngoco, muzibisa Yehova kubwaha. Co kunanguka eyi simpi, kumilingisa mubwahelele na cipangi cimuli naco nameme kumwacishakele.
12. Bubwa muka buli mu kupanga na nzili na kukala na citakutaku cacibwa?
12 Pangeni na nzili na kukala na busunga. Oku kutulingisa tubwahelele na bipangi byetu. (Visimo 12:24; 22:29) Ca kulibanga, bakulunu ba bipangi basa kutukulahela. Bakulunu babipangi bashaka banu baje bali na busunga mwafwa kubesi kwiba bimbongo, bikwata, nambe simbu ya ku bipangi. (Efeso 4:28) Ca mu cibali, Yehova azibuka nga tupanga na nzili na kukala na busunga. Ngeci, tukala na “citakutaku cacibwa” mwafwa tuzibuka ngwetu tuli na kuzibisa kubwaha Njambi uje itwazema.—Vahevelu 13:18; Kolose 3:22-24.
13. Bubwa muka bukwabo bwasa kutunda mu kumwesa bilinga byabibwa ku bipangi?
13 Anukeni ngweni bilinga byeni ku bipangi bizumbangeyesa Yehova. Eyi simpi inapande kumilingisa mubwahelele na bipangi byeni. (Tito 2:9, 10) Bilinga byetu byabibwa byasa kulingisa bakwetu batwapanga nabo balilongese Mbimbiliya.—Tandeni Visimo 27:11; 1 Petulu 2:12.
BIPANGI MUKA BINJINAPANDE KWANGULA?
14-16. Bika bitunapande kusinganyekesesa omwo twangula bipangi?
14 Mbimbiliya kuyatulekele bipangi bya ku mubila byanapande kupanga muka-Kilisitu, nebi kapandele kupanga. Oloni ili na binangulo bije bitukwasa twangule mwamubwa bipangi. (Visimo 2:6) Tusinganyekeni ha binangulo bya mu Mbimbiliya omwo tulihula bino bihula:
Anguleni cipangi cije kucilipyakana na mashiko a Yehova
15 Eci cipangi citondeka kulinga byuma bije byanendeka Yehova ngwendi byabibi ndi? Tunalilongesa ngwetu Yehova wazinda bifwa bya kufwa ngwe kwiba na makuli. (Kutuuka 20:4; Vilinga 15:29; Efeso 4:28; Kujombolola 21:8) Ngeci, kutushaka kupanga bipangi bije kubilitabasana na mashiko a Yehova.—Tandeni 1 Yowano 5:3.
16 Kupanga eci cipangi kunjilingisa njikundwiye bilinga bije byazinda Yehova ndi? Cakumwenako, mulinga bati nga bamyana cipangi ca kukumbulula bifoni na kutambula bangenzi ku cipatela ca kutundisa memo? Kukumbululula bifoni na kutambula bangenzi kukwabihile. Oloni muzibuka ngweni Yehova wazinda kutundisa memo. Nameme keti yeni mutundisa banu memo, oloni kumusinganyeka ngweni neni muli na kukundwiya cipangi ca kutundisa banu memo ndi?—Kutuuka 21:22-24.
17. Bika bitukwasa twangule byuma bije bizibisa Njambi kubwaha?
17 Nga tupangesa binangulo bya bunjambi, co tupwa ngwe banu babanendeka ku Vahevelu 5:14, NWT. Aba banu “bali na cashu ca kwilula byuma, cashu cije cibanalongesa laja mwafwa ya kucipangesa mangana bangunune bubwa na bubi.” Lihuleni ngweni: ‘Njasa kutanwisa bakwetu nga njipanga eci cipangi ndi? Eci cipangi citondeka kuseza muka-limbo lyange na bana bange na kuya ku lifuti lyeka ndi? Bukalu muka bubasa kumona nga njibaseza?’
‘ANGULENI BYUMA BYABIBWA’
18. Bika kwapwila kwakukalu kutwameka kulutwe cipangi ca kulemesa Yehova?
18 Kunasa kukaluwa kutwameka cipangi ca kulemesa Yehova mu ‘matangwa ano a kukotoka, amakulu.’ (2 Timateo 3:1) Co lalo kwakukalu kuwana bipangi bya ku mubila na kwishwala ha bipangi byaco. Tushaka kunyunga mwamuwa binaanga byetu, oloni tuzibuka lalo ngwetu tunapande kwaka kulutwe cipangi ca kulemesa Yehova. Kutushaka kulikobelesa mu kushakezeka bufuko. (1 Timateo 6:9, 10) Ngeci, twasa bati ‘kwangula byuma byabibwa’ oku tutondela naanga yetu byuma bya ku mubila?—Filipu 1:10.
19. Kukulahela Yehova kutukwasa bati tupange bipangi byetu mu ngila yaibwa?
19 Kulaheleni manene Yehova. (Tandeni Visimo 3:5, 6.) Tuzibuka ngwetu Njambi atanekeya mwamubwa bitushaka, co lalo watwaka mbunge. (Myaso 37:25; 1 Petulu 5:7) Mbimbiliya ngwayo: “Kesi mukakateye mu cizemo ca bimbongo, pweni baka-kujauka na byuma bije muli nabyo. Omwo Njambi nendeka ngwendi: ‘Kunjikamiseze na lumo lwahi, nambe kumibyana.’” (Vahevelu 13:5) Yehova ali na kutuleka ngwendi keti tulishoshomwene simbu yoshe mwakunyungila naanga yetu. Namwesa ha bisimbu byabingi ngwendi wapwa muka-kwana banu bendi byuma bibatonda. (Mateo 6:25-32) Coshe coshe cipangi cituli naco, tunapande kulilongesa Lijwi lya Njambi, kwambulula muzimbu waubwa na kuya ku biwano simbu yoshe.—Mateo 24:14; Vahevelu 10:24, 25.
20. Twasa kwasiwisa bati buyoye bwetu?
20 Kaleni na lisho lyalibwa. (Tandeni Mateo 6:22, 23.) Oku kulumbununa ngwabo tunapande kwasiwisa buyoye bwetu mangana tupangele Yehova. Tulinga bulema nga tushakezeka bimbongo, kuyoya kwa buhando, nambe makina amaha, kutubakana kukanyamesa busamba bwetu na Njambi. Bika bitukwasa twake kulutwe byuma bya seho? Tubyaneni kulikobelesa mu mikuli. Nga tuli na mikuli, co tupangeni na nzili mangana tuitepulule, nambe kuifweta yoshe. Nga kutunyanyama, byuma bya ku mubila bitubiisila simbu yetu na nzili yetu, co kutukala na simbu ya kulombela, kulilongesa nambe kwambulula. Keti tukaluwise buyoye bwetu mu kushakezeka byuma bya ku mubila, oloni tujaukeni na “byakulya na buzalo” butuli nabwo. (1 Timateo 6:8) Mwoshe mwoshe mubili byuma, tulinga mwamubwa kulilula yetu babenya mangana tuwane mutwasa kupangela Yehova mu kushula.
21. Bika bitunapande kwangwila byuma bya seho mu buyoye bwetu?
21 Akeni tahi kulutwe byuma bya seho. Tunapande kupangesa mwamubwa simbu yetu, nzili yetu na byuma byetu bya ku mubila. Nga kutunyanyama, co byuma bya kufwa ngwe kuya ku masikola a helu nambe bimbongo, bitubiisila simbu yetu. Yesu wendekele ngwendi: “Ha kulibanga shakezekeni Bumwene bwendi.” (Mateo 6:33) Byuma bitwangula kulinga, yoyesi yetu na bilengo byetu, bimwesa byuma bitwamona kupwa bya seho manene.
CIPANGI CAKAMA CITWASA KUPANGA
22, 23. (a) Cipangi muka cakama cituli naco yetu baka-Kilisitu? (b) Bika bitukwasa tubwahelele na bipangi byetu?
22 Tuli na cipangi cakama ca kupangela Yehova na kwambulula muzimbu waubwa ku banu. (Mateo 24:14; 28:19, 20) Tushaka kupanga na nzili eci cipangi ngwe mwalingile Yesu. Bamo banai na kupangela kuje kuli bujene bwa baka-kwambulula. Bakwabo bali na kulilongesa ndaka yeka mangana bambulwile baje bakendeka oyo ndaka. Simutwiyeni na baje banalingi ebi byuma mangana mulizibile mu tunwa twabo. Basa kumileka ngwabo eci cipangi cinabalingisa bapwe ba kubwahelela na kupwa ba kushubuluka mu kuyoya kwabo.—Tandeni Visimo 10:22.
Kupangela Yehova cikeco cipangi cakama citwasa kulinga tubaboshe
23 Bungi bwetu tukambata simbu yailaha kupanga cipangi cimo, indi hamo bipangi byabingibingi mangana tuwanene naanga yetu byuma bya ku mubila. Yehova namono mumuli na kulifwitila, co akazibi kubwaha omwo muli na kunyunga naanga yeni. Ngeci, tutwaleleleniho kutembwinina Yehova na Yesu mu kupanga na nzili cipangi coshe coshe cituli naco. Twanukeni ngwetu tuli na cipangi cakama ca kupangela Yehova na kwambulula muzimbu waubwa wa Bumwene bwendi. Kupanga eci cipangi kutunenela kubwahelela kwakama.