1, 2. Bika bitunapande kulinga mangana tukale mu cizemo ca Njambi?

 TUBABOSHE tushaka kupwa ba kukanyama na kulikangula ku mubila. Ngeci tunapande kulya byakulya byabibwa, kweha bweho buje bukanyamesa mubila na kulinyungilila mwamubwa. Tunapande kulifwita kulinga byuma ebi mwafwa hakeho hanemana bukangule bwa mubila. Oloni lalo tunapande kupwa ba kukanyama na kulikangula mu ngila ikwabo.

² Tunalingi mwamubwa kuzibuka Yehova, oloni tunapande kutwalelelelaho kukanyamesa busamba bwetu na Yehova. Yunda kalekele lika baka-Kilisitu ngwendi ‘bakale mu cizemo ca Njambi’ embwe, oloni wabalekele mubanapande kulingila ngoco. Wabalekele ngwendi: “Koleseni mu kukulahela kweni kwa kujela.” (Yunda 20, 21) Ngeci, twasa bati kukanyamesa likulahelo lyetu?

3-5. (a) Satana ashaka ngwendi tusinganyeke bika ha mashiko a Yehova? (b) Tunapande kumona bati mashiko a Yehova na binangulo byendi?

³ Tulinga mwamubwa nga tutaba ngwetu mashiko a Yehova anapu a seho manene. Satana ashaka tusinganyeke  ngwetu mashiko a Njambi amakalu kuwakabangeya, co tubwahelela nga tulyangwila yetu babenya byuma byabibwa nebi byabibi. Satana nongumuna banu basinganyeke ngoco kushwa bene mu lihya lya Endeni. (Kushangumuka 3:1-6) Nameme mu simbu ino, anga acili na kubongumuna.

⁴ Kuma mashiko a Yehova akatwonowesa kulinga byuma ndi? Embwe. Cakumwenako, lingeni ngwe muli na kupashala mu citungu cimo cacibwa manene. Co mutulukwa mwela umo banausitila cipatanga cacilaha. Hamo musinganyeka ngwendi cije cipatanga cinamyonowesa kumona bili mukati. Oloni ha simbu oyo, muziba ndumba abuluma muje mu cipatanga. Musinganyeka ngweni cije cipatanga cinamyonowesa ndi? Embwe. Mukandelela ngweni cipatanga cinaminyungilila mwafwa ngwe munaliwa ku ndumba. Binangulo bya Yehova binapu ngwe cije cipatanga, co Liyabolo napu ngwe uje ndumba. Mbimbiliya itunangula ngwayo: “Pweni baka-kukengelela. Citozi ceni Liyabolo ali na kwendangana na kwanena ngwe ndumba ashakezeka umo ngeci amusanyozole.”​—1 Petulu 5:8.

⁵ Yehova ashaka ngwendi tuyoye mwamubwa. Kashaka ngwendi Satana atungumune. Mukemwo natwana mashiko na binangulo mangana bitunyungulile na kutuzibisa kubwaha. (Efeso 6:11) Yakomba wasonekele ngwendi: ‘Woshe uje akengesesa mu mashiko a kujela aje akapatula banu na kuwapangesa, . . Njambi akamubezikisa mu byuma byoshe bije alinga.’​—Yakomba 1:25.

6. Bika bitulingisa tutabe ngwetu mashiko a Yehova apwa amabwa manene?

⁶ Nga tulinga byuma byatuleka Yehova, tuyoya mwamubwa, co busamba ngwetu nendi lalo bukanyama. Cakumwenako, Yehova natuleke ngwendi tulombele kuli  ikeye simbu yoshe. Nga tulingamo, co tubezika. (Mateo 6:5-8; 1 Tesalonika 5:17) Yehova natuleke ngwendi tulikungulule mu kumulemesa na kulishongangeya umo na mukwabo. Natuleke lalo ngwendi tuye mu kwambulula muzimbu waubwa na kulongesa banu. Ngeci, tubwahelela nga twononoka awa mashiko endi. (Mateo 28:19, 20; Ngalatiya 6:2; Vahevelu 10:24, 25) Nga tunanguka ngwetu kulinga ebi byuma kunakanyamesa likulahelo lyetu, kutulingisa tutabe ngwetu mashiko a Yehova apwa amabwa manene.

7, 8. Bika bitukwasa twonwe kushota mbunge ha bukalu buje bwasa kutuwana kulutwe?

⁷ Tunasa kushota mbunge ngwetu hamo kulutwe tukaliwana na byeseko bije bikatwonowesa kunyunga likulahelo lyetu. Nga tuliziba ngoco, co twanukeni ano majwi a Yehova. Wendekele ngwendi: “Yange Yehova, yange Njambi  yeni, uje ali na kumilongesa mangana mumone bubwa, uje ali na kumitwamenena mu ngila imunapande kuya. Nga mutolilila ku mashiko ange, co kwoloka kweni kufwa ngwe ndonga, busunga bweni bufwa ngwe mankimba a kalunga-ndonga.”​—Isaiah 48:17, 18, NWT.

⁸ Nga twononoka Yehova, co kwoloka kwetu kufwa ngwe ndonga ije kuyesi kuma mema. Co busunga bwetu bufwa ngwe mankima a kalunga-ndonga aje atwalelelaho kulyasha ha nunda. Nameme tuliwana na bukalu bwakama, oloni tupwa ba kulongwa kuli ikeye. Mbimbiliya ngwayo: “Kundika tuyando twobe kuli Shukulu Kalunga, co ikeye akakukwasa, ikeye kakataba muka-busunga ngeci bamufungulule embwe.”​—Myaso 55:22.

9, 10. Kukola ku sipilitu kulumbununa bika?

⁹ Nga tukanyamesa busamba bwetu na Yehova, co ‘tuya kulutwe,’ nambe ngwetu tukola ku sipilitu. (Vahevelu 6:1) Kukola ku sipilitu kulumbununa bika?

¹⁰ Bukulunu bwa myaka keti bukebwo butulingisa tupwe baka-Kilisitu ba kuhya embwe. Tukola ku sipilitu nga tukala mu busamba bwabubwa na Yehova na kumona byuma ngwe mwabimwenamo ikeye. (Yowano 4:23) Paulu wasonekele ngwendi: “Omwo baje banapu baka-busitu bayongola byuma bya busitu, oloni baje banapu ba munzinzime bayongola byuma bya munzinzime.” (Loma 8:5) Munu wa kuhya ku sipilitu kesi kwaka mbunge ha byuma bya senga nambe bya ku mubila. Oloni washaka kupangela Yehova na kwangula byuma byabibwa mu buyoye. (Visimo 27:11; tandeni Yakomba 1:2, 3.) Munu wa kuhya ku sipilitu kesi kushungwiya kulinga bubi. Oloni azibuka byuma byabibwa, co akashungwiya kubilinga.

11, 12. (a) Bika byendekele Paulu ha ‘cashu ca kwilula byuma’ cibakala naco baka-Kilisitu? (b) Kupwa muka-Kilisitu wa kuhya banacesekesa bati kuli muka-kweha mu butongwe?

 ¹¹ Munu napande kulifwita asina akole ku sipilitu. Kapositolo Paulu wasonekele ngwendi: “Oloni byakulya bya kukola byapwa bya bakulunu baje bali na cashu ca kwilula byuma, cashu cije cibanalongesa laja mwafwa ya kucipangesa mangana bangunune bubwa na bubi.” (Vahevelu 5:14, NWT) Lijwi lya ‘kulongesa,’ hamo litwanukisa munu uje alilongesa mwakwehela bweho bumo.

¹² Nga tumona munu eha bweho bumo mu butongwe, tuzibuka ngwetu nambatele simbu yailaha ya kulilongesa mangana ehe mwamubwa. Owo munu kasemukile na cashu ca kweha embwe. Nga mbututu nasemuka, kesi kuzibuka mwakupangesela bwino maboko na mendi endi. Oloni mu kwita kwa simbu, alilongesa mwakukwatela byuma na mwakwendela. Nga mumulongesa bweho bumo, asa kupwa muka-kweha wamubwa. Mu cifwa cimo lika, tukambata simbu yailaha ya kulilongesa mangana tupwe baka-Kilisitu ba kuhya.

13. Bika bitukwasa tusinganyeke ngwe mwakasinganyekela Yehova?

¹³ Muno mu libulu, tunasimutwiya mutwasa kumwenamo byuma ngwe mwabimona Yehova. Tunalilongesa lalo ngwetu tunapande kukandelela ku mashiko anatwama Yehova na kuwazema. Omwo twangula byakulinga, tulihuleni ngwetu: ‘Mashiko muka a mu Mbimbiliya nameme binangulo bije binendeka ha byuma binjishaka kulinga? Njasa kubipangesa bati? Yehova ashaka ngwendi njilinge bati?’​—Tandeni Visimo 3:5, 6; Yakomba 1:5.

14. Bika bitunapande kulinga mangana tukanyamese likulahelo lyetu?

¹⁴ Tutwalelelaho kukanyamesa likulahelo lyetu kuli Yehova.  Kulya byakulya bije bitukwasa ku mubila, kulingisa mibila yetu ikanyame. Ngeci, kulilongesa bya Yehova kutukwasa tukanyamese likulahelo lyetu. Mutwashangumukile kulilongesa Mbimbiliya, twalilongesele lika busunga bwa helu helu hali Yehova na bingila byendi. Oloni mu kwita kwa simbu, twashangumukile kulilongesa byuma bya kuloba. Mukemwo Paulu wendekele ngwendi: “Byakulya bya kukola byapwa bya bakulunu.” Nga tupangesa byuma bitulilongesa, co tukala na mana. Mbimbiliya ituleka ngwayo: “Mana apwa a seho manene.”​—Visimo 4:5-7, NWT; 1 Petulu 2:2.

15. Bika kunapwila kwa seho kuzema Yehova na bandolome na bandokazi betu?

¹⁵ Munu asa kukanyama na kupwa wa kulikangula, oloni napande kutwalelelaho kulinyunga mangana mubila wendi ukale mwamubwa. Mu ngila imo lika, munu wa kuhya ku sipilitu azibuka ngwendi napande kulifwita mangana akanyamese busamba bwendi na Yehova. Paulu natuleke ngwendi: “Lyesekeni yeni babenya na kulilula nga munapu baka-kukulahela.” (2 Kolinte 13:5) Oloni kutwapandele kukala lika na likulahelo lya kukola embwe. Tunapande kutwalelelaho lalo kuzema Yehova na bandolome na bandokazi betu. Paulu wendekele ngwendi: “Nga njili na kukulahela kwoshe ngeci njase kushwenyesa minkinda, oloni nga kunjesi na cizemo njinapu wangoco.”​—1 Kolinte 13:1-3.

16. Satana ashaka ngwendi tulizibe bati?

¹⁶ Satana ashaka tusinganyeke ngwetu kutwasa kuzibisa Yehova kubwaha. Ashaka ngwendi tuzeye na kusinganyeka ngwetu wahi asa kumanesa bukalu bwetu. Kashaka ngwendi tukulahele bakwetu baka-Kilisitu, co lalo kashaka ngwendi tubwahelele. (Efeso 2:2) Satana azibuka  ngwendi nga tukala nebi bisinganyeka byabibi, co tuzeya na kutsiya busamba bwetu na Yehova. Oloni Yehova natwama lilabelelo, co litukwasa tuhyane bisinganyeka byabibi.

17. Bika lilabelelo lyapwila lya seho?

¹⁷ Ku 1 Tesalonika 5:8, Mbimbiliya inesekesa lilabelelo lyetu ku tepa ya cikubo ije ikanyungilila mutwe wa liswalale mu nzita. Ije tepa banaitumbula ngwabo ‘lilabelelo lya kwobola.’ Kulabelela byuma byanatukulahesa Yehova kutunyungilila na kutukwasa tubyane bisinganyeka byabibi.

18, 19. Lilabelelo lyakanyamesele bati Yesu?

¹⁸ Lilabelelo lyakele nalyo Yesu lyamutakamesele. Yesu wetile mu bukalu bwabungi ha butsiki bwa mamaneselelo bwa kuyoya kwendi hano hasi. Kabusamba kendi wa ha mbunge wamwendele bungungu. Kabusamba kendi mukwabo wamubyanene ngwendi kamuzibuka. Beka lalo batewele na kumuseza. Banu bayoyele nabo bamutengulukilile  na kulomba ngwabo bamushukike ha citi. Bika byamukwasale mangana akolese? Mbimbiliya ngwayo: “Mwafwa ya kubwahelela kubamutumbikilile kulutwe, wakolesele ha citi ca kuyandesela, kazibile shwamwa, co natumbama ku cilyo ca litanda lya Njambi.”​—Vahevelu 12:2, NWT.

¹⁹ Yesu wazibukile ngwendi nga apwa wa kulongwa, co anena bumpau kuli Ishe na kumwesa ngwendi Satana wapwa muka-makuli. Eli lilabelelo lyalingisile Yesu abwahelele manene. Wazibukile lalo ngwendi ololo aliwana na Ishe mwilu. Eli lilabelelo lyamukwasele mangana akolese. Netu tunapande kusinganyeka ha lilabelelo lyetu ngwe mwalingile Yesu. Oku kutukwasa tukolese mu bukalu bwoshe bwoshe.

20. Bika bitukwasa tukale na bisinganyeka byabibwa?

²⁰ Yehova azibuka ngwendi tunamukulahela, co lalo tunakolesa. (Isaya 30:18; tandeni Malakiya 3:10.) Yehova natukulahesa ngwendi ‘akatwana bije bitushaka.’  (Myaso 37:4) Ngeci, tusinganyekeni ha lilabelelo lyetu. Satana ashaka ngwendi tuzeye na kuliziba ngwetu Yehova kakatwana byuma byanatukulahesa. Oloni keti tutabe bisinganyeka byabibi bituzeyese. Tulombeni kuli Yehova nga tumona ngwetu lilabelelo lyetu lishangumuka kuhwa. Twanukeni majwi ali ku Filipu 4:6, 7. Endeka ngwawo: “Kesi mushote mbunge ha cuma cimo, oloni mu malombelo eni oshe lombeni Njambi ha bije munajeneka, simbu yoshe mulombeni na mbunge ya kukandelela. Co kwoloka kwa Njambi, kuje munu naumo wahi asa kuzibisisa, kukanyunga bimbunge byeni mwamubwa muli Kilisitu Yesu.”

21, 22. (a) Yehova ashaka ngwendi hano hasi hakafwe bati? (b) Bika bimushaka kulinga?

²¹ Singanyekeseseni ha byuma bimukalikuwa kulutwe. Ololo banu boshe baje bakasala hano hasi bakalemesa Yehova mu kushula. (Kujombolola 7:9, 14) Acisinganyekeni mubukafwa buyoye mu kaye kakaha. Buyoye bukabwaha manene. Satana na bandemone bendi kubakakalako. Co na bubi bwoshe bakabutundisako. Kutukabinji, co lalo kutukatsi. Ha litangwa na litangwa, tukenduka na mibila ya kulikangula na kulikuwa buyoye. Tubaboshe tukapangela hamo mu kutengulula kano kaye kupwa palandaisi. Banu boshe bakakala na byakulya byabibwa na binjubo byabibwa. Banu kubakakala lalo na bukenya nambe lwozi, oloni bakalizema umo na mukwabo. Mu kwita kwa simbu, banu boshe hano hasi bakalikuwa “bumpau bwa kupatuka kwa bana ba Njambi.”​—Loma 8:21.

²² Yehova ashaka ngwendi mumuzibuke mwamubwa na kulikuta nendi busamba. Ngeci lifwiteni mangana mumwononoke na kushwenya kuli ikeye ha litangwa na litangwa. Tubaboshe tutwaleleleniho kuzema Yehova ku myaka yoshe.​—Yunda 21.