CILONGESA 07
Yehova Wafwa Bati?
Mumukasinganyeka hali Yehova Njambi, mukasinganyeka ngweni wafwa bati? Kuma mukasinganyeka ngweni wapwa wa bulemu manene, co kutwasa kulikuta nendi busamba ndi? Indi mukasinganyeka ngweni wapwa cuma ca nzili manene ngwe nyonzi yakama ya mihyato? Yehova wafwa bati? Mu Mbimbiliya, Yehova natuleke bifwa byendi byabibwa, co lalo namwesa ngwendi watwaka mbunge.
1. Mwafwa bika kutwasa kumona Njambi?
‘Njambi wapwa Sipilitu.’ (Yowano 4:24) Yehova kakele na mubila wa situ. Wapwa Sipilitu, co wakala mwilu muje kutwasa kumona.
2. Bifwa muka bimo byakala nabyo Yehova?
Nameme kutwasa kumona Yehova, oloni wapwa ngwe munu uje itwasa kuzibuka na kuzema mwafwa wakala na bifwa byabibwa. Mbimbiliya ngwayo: “[Yehova] wazema bije byabibwa, ikeye kesi kuseza banu bendi baje bamukulahela.” (Myaso 37:28) Co lalo wapwa “muka-kutetela na mema ku mbunge,” maneneni kuli baje bali na kuyanda. (Yakomba 5:11) ‘Yehova ali muyehi na baje banazeye mu bimbunge, ikeye amena baje banazeye.’ (Myaso 34:18) Kuma bilinga byetu byasa kuzibisa Yehova kubwaha nambe kumulubalesa ndi? Munu uje alinga byuma byabibi alubalesa Yehova nambe kumuzibisa kubabala ku mbunge. (Myaso 78:40, 41) Oloni munu uje alinga byuma byabibwa amuzibisa kubwaha.—Tandeni Visimo 27:11.
3. Yehova namwesa bati ngwendi watuzema?
Cizemo cikeco cifwa cakama cakala naco Yehova. Mbimbiliya ngwayo “Njambi wapwa cizemo.” (1 Yowano 4:8) Biñanda bili mu Mbimbiliya na byuma bya kutanga bimwesa ngwabyo Yehova wakala na cizemo. (Tandeni Vilinga 14:17.) Cakumwenako, acisinganyekeni lika mwatutangelele. Natutanga na cashu ca kwasa kumona mibala na kulikuwa myaso na byakulya byabibwa. Ashaka ngwendi tulikuwe kuyoya.
TONDESESENI
Bika byakapangesa Yehova mu kulinga byuma? Bifwa muka byabibwa byakala nabyo Yehova, co nabimwesa bati?
4. Sipilitu ya kujela yapwa nzili ya Njambi
Yehova akapangesa sipilitu yendi ya kujela ngwe mutukapangesela maboko. Mbimbiliya ngwayo sipilitu ya kujela kuyapwile munu, oloni yapwa nzili yakapangesa Njambi mu kulinga byuma. Tandeni Luka 11:13 na Vilinga 2:17, na kusimutwiya ha bihula binatako:
-
Mumona bati, nga Njambi asa kwitila sipilitu ya kujela hali baje bamulombayo, kuma sipilitu ya kujela yapwa munu indi yapwa nzili ya Njambi? Bika bimwendekela ngoco?
Yehova akapangesa sipilitu ya kujela mu kulinga byuma byabingi bya kukomokesa. Tandeni Kutuuka 31:3 na 2 Petulu 1:20, 21. Kutundaho, simutwiyeni ha cihula cinatako:
-
Yehova napangesa sipilitu yendi ya kujela mu bingila muka?
5. Yehova wakala na bifwa byabibwa
Mosesa wapwile ngamba ya Njambi. Nameme ngoco, washakele kuzibuka mwamubwa Ishamatanga. Mosesa walombele Njambi ngwendi: ‘Njileke biyongola byobe ngeci njikuzibuke.’ (Kutuuka 33:13) Ngeci, Yehova washolwele bifwa byendi kuli Mosesa. Tandeni Kutuuka 34:4-6, na kusimutwiya ha bihula binatako:
-
Bifwa muka byakala nabyo Yehova bije byalekele Mosesa?
-
Cifwa muka cimwashaka manene ku bifwa bya Yehova?
6. Yehova watwaka mbunge
Yehova walizibile bati mwamwene Bahebelu baje bapwile banu bendi bayanda mu Ingito? Tolilileni ku MAJWI A KUREKODA aje ali ku mukanda wa Kutuuka 3:1-10, nambe kuwatanda mu Mbimbiliya. Kutundaho, simutwiyeni ha bihula binatako.
-
Ei ñanda imwesa ngwayo Yehova akalizibi bati nga banu baliwana na tuyando?—Taleni vesi 7 na 8.
-
Mumona bati, kuma Yehova washaka kukwasa banu ndi? Kuma ali na nzili ya kulinga ngoco ndi? Bika bimwendekela ngoco?
7. Byuma bya kutanga bimwesa bifwa byakala nabyo Yehova
Byuma byanatanga Yehova bimwesa bifwa byabibwa byakala nabyo. Kengeni VIDIO. Kutundaho, tandeni Loma 1:20, na kusimutwiya ha cihula cinatako.
-
Byuma byanatanga Yehova bitukwasa tumone ngwetu wakala na bifwa muka?
BAMO BAKENDEKA NGWABO: “Njambi wakala mu mbunge ya munu, kapwile ngwe munu hendi.”
-
Yeni mumona bati?
-
Mwafwa bika?
SIMPI YAKAMA
Kutwasa kumona Yehova. Nameme ngoco, Yehova wakala na bifwa byabibwa bya kufwa ngwe cizemo.
Kwitulukamo
-
Mwafwa bika kutwasa kumona Yehova?
-
Sipilitu ya kujela yapwa bika?
-
Bifwa muka bimo byakala nabyo Yehova?
WANENI BIKWABO
Tandeni biñanda bije bimwesa bifwa byakama biwana byakala nabyo Yehova.
“Bifwa Muka Byakala Nabyo Njambi?” (Kaposhi ka Kukengela ka Na. 1 2019)
Tandeni biñanda bije bimwesa ngwabyo Yehova kakele kwoshe-kwoshe.
“Kuma Njambi Wakala Kwoshe-Kwoshe Ndi?” (Ñanda ya ha webusaiti)
Mwafwa bika Mbimbiliya inendeka ngwayo sipilitu ya kujela yapwa ngwe maboko a Njambi?
Munalume umo wa kapuputwa kakulahelele ngwendi Njambi wamwaka mbunge. Tandeni byuma byamukwasele atengulule biyongola byendi.
“Hano Njiliziba Ngwange Njasa Kukwasa Bakwetu” (Kaposhi ka Kukengela ka October 1, 2015)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
