CILONGESA 09
Kulombela Kukanyamesa Busamba Bweni na Njambi
Kulombela kumikwasa mu bingila byabingi. Cakumwenako, kulombela kumikwasa nga mushaka kumitwamenena mu kuyoya nambe nga muli na bihula bimo byakama. Co lalo kumikwasa nga mutonda kumizembeleka nambe kumitakamesa. Kulombela kumikwasa lalo mukanyamese busamba bweni na Yehova. Oloni hamo mwasa kulihula ngweni, ‘Njinapande kulombela bati? Bika binjinapande kulinga mangana Njambi atolilile ku malombelo ange?’ Tukumbululeni ebi bihula.
1. Tunapande kulombela kuli iya, co bika bitunasa kwendeka mu lilombelo lyetu?
Yesu washikile ngwendi tunapande kulombela lika kuli Tate yetu wa mwilu. Yesu nendi wakele na kulombela kuli Yehova. Wendekele ngwendi: ‘Omu mukemwo mu munapande kulomba, ngweni, “Tate yetu uli mwilu . . . ”’ (Mateo 6:9) Nga tulombela kuli Yehova, co busamba bwetu nendi bukanyama.
Twasa kulombela kuli Njambi ha cuma coshe-coshe. Nameme ngoco, Njambi asa lika kukumbulula malombelo etu nga analitombola na cizango cendi. Mbimbiliya ngwayo: ‘Njambi atuziba nga tumulomba cuma cimo ngwe ku cizango cendi.’ (1 Yowano 5:14) Yesu wendekeleko byuma bimo bitunasa kwendeka mu lilombelo. (Tandeni Mateo 6:9-13.) Kutwapandele kulombela lika ha byuma bitutonda, tunapande lalo kukandelela kuli Njambi mwafwa ya byuma byanatulingila na kumulomba ngwetu akwase bakwetu.
2. Tunapande kulombela bati?
Mbimbiliya imwesa ngwayo ‘twasa kuleka Njambi bukalu bwetu bwoshe.’ (Myaso 62:8) Ngeci, tunapande kulombela kutundilila kwisi ya mbunge. Twasa kulombelela mu mbunge nambe kutuhula lijwi. Co lalo twasa kwimana nambe kutumama nambe kukala mu ngila yoshe-yoshe ije imwesa kasingimiko kuli Njambi. Twasa kulombela simbu yoshe-yoshe, kwoshe-kwoshe kutuli.
3. Njambi akakumbulula bati malombelo etu?
Akalingi ngoco mu bingila bya kuliseza-seza. Yehova natwana Lijwi lyendi Mbimbiliya ije yasa kukumbulula bihula byetu. Kutanda Mbimbiliya kwana “mana kuli baje banawajeneka.” (Myaso 19:7; tandeni Yakomba 1:5.) Njambi asa kututakamesa nga tuli mu bukalu. Co lalo asa kulingisa bangamba bendi batukwase nga tuli mu bukalu.
TONDESESENI
Mwasa kulombela bati mu ngila ije izibisa Njambi kubwaha? Bubwa muka butunda mu kulinga ngoco?
4. Njambi akatolilila ku malombelo a kufwa bati?
Bika byasa kulingisa Njambi atolilile ku malombelo etu nambe kujeneka kuwatolilila? Kengeni VIDIO.
Yehova ashaka ngwendi tulombele kuli ikeye. Tandeni Myaso 65:2, na kusimutwiya ha bihula binatako:
-
Mumona bati, kuma Njambi uje ‘akakumbulula malombelo’ ashaka ngwendi mulombele kuli ikeye ndi? Mwafwa bika?
Tunapande kwononoka mashiko a Njambi nga tushaka ngwetu atolilile ku malombelo etu. Tandeni Mika 3:4 na 1 Petulu 3:12, na kusimutwiya ha cihula cinatako:
-
Bika bitunapande kulinga mangana Yehova atolilile ku malombelo etu?
Nga kuli nzita, baje balilwisa boshe banasa kulombela kuli Njambi ngwabo bahyane. Kuma Njambi asa kukumbulula malombelo a cifwoco ndi?
5. Tunapande kulombela kutundilila kwisi ya mbunge yetu
Banu bamo bakabalongesa ngwabo belukile-elukile kulombela malombelo a kulifwa. Kuma mukemwo mwashakela Njambi ngwendi tulombele kuli ikeye ngoco ndi? Tandeni Mateo 6:7, na kusimutwiya ha cihula cinatako:
-
Mwasa kulombela bati kwa kujeneka kwilukila-ilukila byuma bya kulifwa mu malombelo eni?
Ha litangwa na litangwa, mwasa kuwanako cuma cimo canamilingila Yehova na kukandelela kuli ikeye mu lilombelo. Nga mulinga ngoco ha litangwa na litangwa, mulombela ha byuma 7 mu calumingo ca mutunu kwa kujeneka kwilukila-ilukila byuma bya kulifwa.
Cisemi wamubwa akazibi kubwaha nga munendi amuleka bili ku mbunge yendi. Yehova nendi ashaka ngwendi tulombele kuli ikeye kutundilila kwisi ya mbunge yetu
6. Lilombelo lyapwa bwana bwa kutunda kuli Njambi
Kulombela kutukwasa bati maneneni nga tuli mu bukalu? Kengeni VIDIO.
Mbimbiliya ngwayo kulombela kutukwasa tujeneke kulishoshomwena manene. Tandeni Filipu 4:6, 7, na kusimutwiya ha bihula binatako:
-
Kulombela kukatukwasa bati nameme simbu imo bukalu bwetu kubwesi kuhwa?
-
Yeni mushaka kulombela ha byuma muka?
Muzibuka ndi?
Lijwi lya “ameni” lilumbununa ngwabo “cifwe bene ngoco” nambe “mukemwo bene.” Kushwa lika kusañulu, lijwi lya “ameni” bakalyendeka ku mamaneselelo a lilombelo.—1 Mizimbu 16:36.
7. Waneni simbu ya kulombela
Simbu imo tunasa kuzezama manene, co hamo tunasa kwibala kulombela. Kuma Yesu wamwene kulombela kupwa kwa seho ndi? Tandeni Mateo 14:23 na Mako 1:35. Kutundaho, simutwiyeni ha bihula binatako:
-
Yesu wakele na kulinga bika mangana awane simbu ya kulombela?
-
Simbu muka imwasa kulombela?
BAMO BAKENDEKA NGWABO: “Kulombela kunapu kubiisa lika simbu, na seho bene yahi?”
-
Yeni mumona bati?
SIMPI YAKAMA
Kulombela kutundilila kwisi ya mbunge kukanyamesa busamba bwetu na Yehova, co lalo kututakamesa na kutwana nzili ya kulinga cizango cendi.
Kwitulukamo
-
Tunapande kulombela kuli iya?
-
Tunapande kulombela bati?
-
Kulombela kutukwasa bati?
WANENI BIKWABO
Tandeni ebi biñanda mangana mumone mubanakumbulwila bihula bimo kutalesa ku lilombelo.
“Byuma 7 Bimunapande Kuzibuka Kutalesa ku Lilombelo” (Kaposhi ka Kukengela ka October 1, 2010)
Tandeni ei ñanda mangana muzibe seho ya kulombela nomu mumwasa kulombelela mwamubwa.
“Kuma Kulombela Kwapwa kwa Seho Ndi?” (Ñanda ya ha webusaiti)
Tunapande kulombela kuli iya? Tandeni ei ñanda mangana muzibe biyendeka Mbimbiliya.
“Kuma Tunapande Kulombela ku Banu Baje Babamona Kupwa ba Kujela Ndi?” (Ñanda ya ha webusaiti)
Kuma kuli kumo kutunapande kukala asina twasa kulombela ndi? Kuli simbu itunapande kulombela ndi? Waneni bikumbululo omwo mukenga ei vidio ya mwaso.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
