CILONGESA 11
Mwasa Kutanda Bati Mbimbiliya mu Ngila Ije Imikwasa?
Kuma kwakele simbu imwashakele kupanga cipangi cimo oloni mwamwene ngweni cacikalu manene ndi? Hamo mwalingile kukwatako mutamba umo na kuumanesa, co kukwata lalo ukwabo na kuumanesa. Ebi bikebyo bitunasa kulinga nga tushaka kutanda Mbimbiliya. Hamo munasa kulihula ngweni, ‘Njishangumukila hali?’ Muno mu cilongesa tusimutwiya byuma bitunapande kulinga mangana tulikuwe kutanda na kulilongesa Mbimbiliya.
1. Bika bitunapande kutandela Mbimbiliya simbu yoshe?
Munu uje atanda Mbimbiliya nambe ngwetu “lishiko lya Shukulu Kalunga,” apwa wa kubwahelela, co abezika mu byoshe byalinga. (Tandeni Myaso 1:1-3.) Mu kushangumuka, tandeni Mbimbiliya ha litangwa na litangwa mu simbu yaindondo lika. Nga mulizilisa kutanda Mbimbiliya, co mulikuwa kuitanda.
2. Mwasa kutanda bati Mbimbiliya mu ngila ije imikwasa?
Nga tushaka kuzibisisa mwamubwa bitutanda mu Mbimbiliya, tunapande kutanda na kusinganyekesesa ha byuma bitutanda. Kutwapandele kutanda lika lijwi lya Njambi, oloni tunapande kulitanda na “kulilongesalyo” nambe ngwetu kusinganyekesesaho. (Yoshwa 1:8) Omwo mutanda, lihuleni bihula bya kufwa ngwe: ‘Ei ñanda injilongesa bika hali Yehova Njambi? Njasa kupangesa bati ebi biñanda mu kuyoya kwange? Njasa kupangesa bati ebi biñanda mu kukwasa bakwetu?’
3. Mwasa kuwana bati simbu ya kutanda-tanda Mbimbiliya?
Kuma kukamikaluwila kuwana simbu ya kutanda Mbimbiliya ndi? Bwingi bwetu kukatukaluwila. “Pangeseni mwamubwa bisimbu bije muli nabyo.” (Efeso 5:16) Mwasa kulinga ngoco nga mulyakela simbu imutanda-tanda Mbimbiliya ha litangwa na litangwa. Bamo bakatanda Mbimbiliya mutondo-tondo. Bamoco bakalingi ngoco mutanya ha simbu ya kuhwima. Bakwaboco bakatanda Mbimbiliya mangwezi simbu kanda baye na kulala. Yenico simbu muka imumona ngweni mwasa kutanda mwamubwa Mbimbiliya?
TONDESESENI
Bika bimikwasa mangana mulikuwe kutanda Mbimbiliya? Mwasa kulibwahesela bati mangana eci cilongesa ca Mbimbiliya cimikwase?
Tukezilila byakulya na kulikuwabyo, mu ngila imolika, twasa kwizilila kutanda Mbimbiliya na kulikuwayo
4. Likuweni kutanda Mbimbiliya
Kushangumuka kutanda Mbimbiliya kunasa kumoneka kukaluwa. Nameme ngoco, twasa ‘kukala na lihwila’ lya kutanda Mbimbiliya. Twasa kwizilila kuitanda ngwe mutukezilila kulya byakulya bije kutwezililile. Tandeni 1 Petulu 2:2, na kusimutwiya ha cihula cinatako:
-
Mumona bati, kuma kutanda Mbimbiliya ha litangwa na litangwa kumilingisa mushake manene kuitanda ndi?
Kengeni VIDIO ije imwesa banu bamo mubashangumukilile kulikuwa kutanda Mbimbiliya. Kutundaho, simutwiyeni ha bihula binatako.
-
Kwesekesa na vidio, bukalu muka bubaliwanene nabwo baje bakwenje na bambanda?
-
Bika byabakwasele mangana bashulisilile cilengo cabo ca kutanda Mbimbiliya simbu yoshe?
-
Bika bibalingile mangana balikuwe kutanda Mbimbiliya?
Byuma byasa kumikwasa:
-
Pangeseni Mbimbiliya ibananungulula mwamubwa, ije imuzibisisa bwasi. Mwasa kupangesa Mbimbiliya ya Bisoneka bya Kaye Kakaha nga ili mu ndaka yeni nambe mu ndaka yoshe-yoshe imuzibisisa.
-
Shangumukileni kutanda mikanda imwashaka. Taleni cinoneko ca “Tandeni Mbimbiliya.”
-
Sonekeni hamwendela. Pangeseni cinoneko ca “Moneni Hamwendela mu Kutanda Mbimbiliya” cije cili muno mu libulu.
-
Pangeseni JW Library®. Mwasa kuyaka ha foni nambe ha kompyuta na kutandelaho Mbimbiliya nambe kuitolilila.
-
Pangeseni biñanda bya kushongo mu Mbimbiliya ya Toloko ya Lifasi Lelinca. Ebi biñanda bili na bimapu, bicati na majwi abanalumbununa aje amikwasa mulikuwe kutanda Mbimbiliya.
5. Waneni simbu ya kulibwahesela cilongesa ca Mbimbiliya
Tandeni Myaso 119:34, na kusimutwiya ha cihula cinatako:
-
Bika bikwapwila kwa seho kulombela simbu kanda munu atande Mbimbiliya nambe kulibwahesela cilongesa ca Mbimbiliya?
Bika bimikwasa kuzibisisa mwamubwa bimulilongesa? Simbu yoshe imulibwahesela cilongesa, mwasa kulinga byuma binatako:
-
Tandeni mapalagilafu a kulibanga.
-
Tandeni mikanda ibanamwesa na kumona muinalikwatasanena na cilongesa.
-
Fundikeni bisimpi byakama bije bikumbulula cihula. Kulinga ngoco kumikwasa muwane bwasi bikumbululo ha simbu imulilongesa.
Muzibuka ndi?
Yetu Bakaleho ba Yehova tunapangesa Bimbimbiliya bya kuliseza-seza. Oloni twashaka kupangesa Mbimbiliya ya Bisoneka bya Kaye Kakaha mwafwa banainungulula bwino, yayasi kuizibisisa, co lalo muli lizina lya Njambi.—Taleni ñanda ya ha webusaiti ya “Bakaleho ba Yehova Bakala na Mbimbiliya Yabo Ndi?”
BAMO BAKENDEKA NGWABO: “Mbimbiliya yaikalu kuitanda, kunjesi na simbu ya kuitanda.”
-
Yenico mumona bati?
SIMPI YAKAMA
Nga mushaka kuzibisisa mwamubwa Mbimbiliya, munapande kulyakela simbu ya kuitanda, na kulombela kuli Njambi mangana amyane mana a kuzibisisa bimutanda. Co lalo munapande kulibwahesela cilongesa ca Mbimbiliya.
Kwitulukamo
-
Bika bimikwasa kuzibisisa mwamubwa Mbimbiliya?
-
Simbu muka imwasa kutanda Mbimbiliya na kulilongesayo?
-
Mwafwa bika kulibwahesela cilongesa ca Mbimbiliya kwapwa kwa seho?
WANENI BIKWABO
Itulukeni mu byuma bije bimikwasa kuzibisisa mwamubwa Mbimbiliya omwo muitanda.
“Mwakuwanena Bukwasi mu Kutanda Mbimbiliya” (Kaposhi ka Kukengela ka Na. 1 2017)
Tandeni biñanda bije bimwesa bingila bitatu bya mwakutandela Mbimbiliya.
“Mbimbiliya Yasa Kunjikwasa Bati?—Mutamba 1: Zibukeni Mbimbiliya Yeni” (Ñanda ya ha webusaiti)
Tandeni biñanda bije bimwesa mumwasa kulikuwila kutanda Mbimbiliya.
“Mbimbiliya Yasa Kunjikwasa Bati?—Mutamba 2: Likuweni Kutanda Mbimbiliya” (Ñanda ya ha webusaiti)
Lilongeseniko bimo ku banu baje bashwile laja kutanda Mbimbiliya.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
