CILONGESA 05
Njambi Ali na Kwendeka Netu Kwitila mu Mbimbiliya
Yehova natwana Mbimbiliya. Mu Mbimbiliya muli mikanda 66, co yapwa bwana bwabubwa bwanatwana Yehova. Oloni hamo mwasa kulihula ngweni: ‘Mbimbiliya yezile bati hano hasi?’ Tusimutwiyeni muyezilile Mbimbiliya kuli yetu mangana tuwane bikumbululo ku bihula ebi.
1. Nga banu bakebo basonekele Mbimbiliya, co Njambi napu bati babenyayo?
Banu ba kweta ku 40 bakebo basonekele Mbimbiliya. Baisonekele mu myaka ya kweta ku 1,600, kushangumuka mu 1513 B.C.E a kweta mu mwaka ukokela ku 98 C.E. Banu basonekele Mbimbiliya bapwile banu ba kuliseza-seza. Cakumwenako, bamo bapwile tunyungi, bakwabo bapwile baka-kutsiya bisi, beka bapwile bimyene. Nameme ngoco, bibasonekele byalitombola. Bika binalingisa bilitombole? Mwafwa Njambi ikeye Babenya Mbimbiliya. (Tandeni 1 Tesalonika 2:13.) Baka-kusoneka kubasonekele bisinganyeka byabo. Oloni, ‘sipilitu ya kujela yabatwamenenene omwo bambulwile lijwi lije lyatundile kuli Njambi.’ b (2 Petulu 1:21) Njambi wabahwiminine sipilitu ya kujela mangana basoneke biyongola byendi.—2 Timateo 3:16.
2. Mbimbiliya ikwasa beya?
Muzimbu waubwa wa mu Mbimbiliya wasa kukwasa banu ba ‘ku mafuti oshe, ku miyati yoshe, ku bindaka byoshe na banu boshe.’ (Tandeni Kujombolola 14:6.) Njambi ashaka ngwendi Mbimbiliya bainungulule mu bindaka byabingi. Ano matangwa, Mbimbiliya ili mu bindaka byabingi kutubakana libulu lyoshe-lyoshe. Ngeci, bwingi bwa banu basa kutanda nambe kutolilila ku Lijwi lya Njambi mu ndaka ibaziba.
3. Yehova nanyungilila bati Mbimbiliya?
Mbimbiliya baisonekele ha byuma bya kujeneka kukola bya kufwa ngwe matebe na byuma bikwabo. Oloni baje bazemene Mbimbiliya bakele na kuisononona mu kusungama. Nameme baka-kuyula na bantwama bamo ba bulombelo bashakele kunyongesa Mbimbiliya, oloni banu bamo bakele buyoye bwabo mu bushonde mangana bainyungilile. Yehova katabesele munu woshe-woshe nambe cuma coshe-coshe cimwonowese kusimutwiya netu. Mbimbiliya ngwayo: “Lijwi lya Njambi yetu likakala simbu yoshe.”—Isaya 40:8.
TONDESESENI
Njambi watwamenenene bati banu mangana basoneke Mbimbiliya? Co wainyungililile bati na kulingisa banu ba miyati ya kuliseza-seza bakale nayo?
4. Mbimbiliya inendeka Babenyayo
Kengeni VIDIO. Kutundaho, tandeni 2 Timateo 3:16, na kusimutwiya ha bihula binatako.
-
Nga banu bakebo basonekele Mbimbiliya, co bika bibakaitumbwila ngwabo Lijwi lya Njambi?
-
Mumona bati, kuma Njambi uje wakala mwilu asa kuleka banu baje bakala hasi basoneke biyongola byendi ndi?
Munu ibanana cipangi ca kusoneka nasa kusoneka biñanda bibamuleka, oloni obyo biñanda keti byendi. Mu ngila imolika, banu bakebo basonekele Mbimbiliya, oloni biñanda bibasonekele byatundile kuli Njambi
5. Banu bamo bashakele kunyongesa Mbimbiliya
Njambi nanyungilila Mbimbiliya mwafwa yatunda kuli Ikeye. Baka-kuyula bashakele kunyongesa Mbimbiliya. Bantwama ba bulombelo nabo bakele na kubindika banu ngwabo keti bakale nayo. Nameme ngoco, banu bamo balingile mwoshe mubaselele mangana banyungilile Mbimbiliya nameme bakele na kubalwisa na kubajujwisa ngwabo babatsiya. Kengeni VIDIO ije imwesa munu umo uje washakele kunyungilila Mbimbiliya. Kutundaho, simutwiyeni ha bihula binatako.
-
Munamono mubalyanenene banu bamo mangana banyungilile Mbimbiliya. Kuma kumushaka kuitanda ndi? Mwafwa bika?
Tandeni Myaso 119:97, na kusimutwiya ha cihula cinatako:
-
Bika byalingisile banu babangi banungulule Mbimbiliya na kuyana ku banu nameme kulinga ngoco kwakele buyoye bwabo mu bushonde?
6. Libulu lya banu boshe
Mbimbiliya banainungulula mu bindaka byabingi kutubakana libulu lyoshe-lyoshe, co lalo banu babangi bali nayo. Tandeni Vilinga 10:34, 35, na kusimutwiya ha bihula binatako:
-
Mwafwa bika Njambi ashaka ngwendi Lijwi lyendi balinungulule mu bindaka byabingi?
-
Bika bimwazemena Mbimbiliya?
Banu ba kukokela ku
100%
mu kaye koshe
bali na Mbimbiliya
mu ndaka ibasa kuzibisisa
Ili mu bindaka bya kutubakana
3,000
ipwe ya mutunu nambe mutamba wayo
Bimbimbiliya bibanapulinta binete ku
5,000,000,000
co kukwesi libulu libanapulinta mu bwingi ngwe Mbimbiliya
BAMO BAKENDEKA NGWABO: “Mbimbiliya yapwa lika libulu lya kusañulu libasonekele banu.”
-
Yeni mumona bati?
-
Bukaleho muka bumwesa ngwabwo Mbimbiliya yapwa Lijwi lya Njambi?
SIMPI YAKAMA
Mbimbiliya yapwa Lijwi lya Njambi, co Njambi nalingisa banu babangi bakale nayo.
Kwitulukamo
-
Tukalumbununa bika mutukendeka ngwetu Njambi wahwimininine banu mangana basoneke Mbimbiliya?
-
Bika bitunasimutwiya muno mu cilongesa bije binamizibisa kubwaha ha Mbimbiliya?
-
Kumona Njambi mwananyungilila Mbimbiliya mangana asimutwiye neni kunamilingisa mulizibe bati?
WANENI BIKWABO
Tandeni biñanda bimwesa mubananungulwila Mbimbiliya ano matangwa kuitundisa mu mabulu a kusañulu abasonekele na maboko.
Tandeni biñanda bimwesa muinobokela Mbimbiliya ku byuma bitatu.
“Biñanda Bije Bimwesa Muinobokelelemo Mbimbiliya ” (Kaposhi ka Kukengela ka July 2016)
Kengeni ei vidio mangana mumone bukalu bubaliwanene nabwo baje banungulwile Mbimbiliya.
Mbimbiliya banaisononona na kuinungulula ha bisimbu byabingi. Bika bitulingisa tukulahele ngwetu biñanda bibasonekele mu Mbimbiliya ha kulibanga kubyatengulukile?
“Kuma Biñanda Bili mu Mbimbiliya Byatenguluka Ndi?” (Ñanda ya ha webusaiti)
a B.C.E imwesa simbu kanda Yesu asemuke. C.E imwesa ngwayo Yesu te nasemuka laja.
b Ngwe mutumwena mu Cilongesa 07, sipilitu ya kujela yapwa nzili ya Njambi.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
