CILONGESA 15
Yesu Ikeye Iya?
Yesu napu umo wa banu banatsimana manene mu kaye. Oloni banu babangi kubazibuka byuma byabingi hali Yesu. Bamo bazibuka lika lizina lyendi. Bakwaboco na kumuzibuka kubamuzibuka. Mbimbiliya yendeka bika hali Yesu?
1. Yesu ikeye iya?
Yesu wapwa kangelo wa nzili, co wakala mwilu. Yehova Njambi washangumukilile kutanga ikeye simbu kanda atange byuma byoshe. Mukemwo bakamutumbula ngwabo “ikeye mwana wa ntwatwa, mutwe wa byuma byoshe bya kutanga.” (Kolose 1:15) Mbimbiliya inendeka ngwayo Yesu ikeye ‘Muna Njambi umolika’ mwafwa ikeye lika yatangele Yehova babenya. (Yowano 3:16) Yesu wapangelele hamo na Ishe, Yehova, mu kutanga byuma byoshe. (Tandeni Visimo 8:30.) Co natwalelelaho kulikwatasana nendi. Yesu wapwa “Lijwi” mwafwa akendekelako Njambi. Aketesa mizimbu na mashiko a Njambi ku tungelo na banu.—Yowano 1:14.
2. Yesu wezilile bika hano hasi?
Myaka ya kweta ku 2,000 kunima, Yehova wapangesele sipilitu yendi ya kujela mu kulinga cikomokeso. Wanungulwile kuyoya ca Yesu kutunda mwilu na kucaka mwimo lya mumbanda wa lizina lya Maliya, uje te kanda alilaleho na munalume. Co Yesu wasemukile na kupwa munu. (Tandeni Luka 1:34, 35.) Yesu wezile hano hasi mangana akupwe Mesiya nambe Kilistu na kwobola banu. a Bupolofweto bwoshe bwa mu Mbimbiliya buje bwendekele bya Mesiya bwalishulisilile. Co banu bazibukile ngwabo Yesu ikeye ‘Kilistu, Muna Njambi wa kuyoya.’—Mateo 16:16.
3. Yesu ali kuli hano?
Yesu mwatsile, Njambi wamusangwile, co wapwile lalo kangelo. Kutundaho, welukile mwilu. Co ‘Njambi wamwakele ha mwela wa hakamwa.’ (Filipu 2:9) Hano Yesu banamwana nzili yakama, wahi weka lalo amutubakana kubanga Yehova lika.
TONDESESENI
Yesu wapwa iya? Co bika bimunapande kulilongesela byendi?
4. Yesu kapwile Njambi Muka-nzili Yoshe
Mbimbiliya imwesa ngwayo Yesu wapwa kangelo wa nzili, oloni ali mwisi ya Ishe, Yehova, uje wapwa lalo Njambi yendi. Bika bitwendekela ngoco? Kengeni VIDIO ije imwesa biyendeka Mbimbiliya ha kuliseza kuli mukati ka Yesu na Njambi Muka-nzili Yoshe.
Mikanda inatako itumwesa kuliseza kuli mukati ka Yehova na Yesu. Tandeni ei mikanda na kusimutwiya ha bihula bili mwisi.
Tandeni Luka 1:30-32.
-
Kangelo wamwesele bati kuliseza kuli mukati ka Yesu na Yehova Njambi, “Wahakamwa ya Byoshe”?
Tandeni Mateo 3:16, 17.
-
Bika bilyendekele lijwi lyatundile mwilu ha simbu ibambwitikile Yesu?
-
Musinganyeka ngweni eli lijwi lyapwile lyeya?
Tandeni Yowano 14:28.
-
Hakati ka mwana na ishe, iya mukulunu? Iya ali na moko nambe nzili kutubakana mukwabo?
-
Yesu wasanene Yehova ngwendi Ishe. Bika bitulilongesako?
Tandeni Yowano 12:49.
-
Mumona bati, kuma Yesu wamona ngwendi ikeye na Ishe bapwa munu umolika ndi?
5. Bika byamwesele ngwabyo Yesu ikeye Mesiya?
Mu Mbimbiliya muli bupolofweto bwabwingi buje bwakwasele banu bazibuke Mesiya, uje yanangula Njambi mangana obole banu. Kengeni VIDIO ije imwesa bupolofweto bumo bwalishulisilile, Yesu mwezile hano hasi.
Tandeni obu bupolofweto bwa mu Mbimbiliya na kusimutwiya ha bihula binatako:
Tandeni Mika 5:2, mangana muzibe kubendekele ngwabo kukekwo kwakasemukila Mesiya. b
-
Kuma kusemuka kwa Yesu kwashulisilile obu bupolofweto ndi?—Mateo 2:1.
Tandeni Myaso 34:20 na Zakaliya 12:10, mangana mumone bupolofweto buje bwendekele bya kutsa kwa Mesiya.
-
Obu bupolofweto bwalishulisilile ndi?—Yowano 19:33-37.
-
Kuma Yesu walingileko bimo mangana obu bupolofweto bulishulisilile ndi?
-
Ebi biñanda bimwesa ngwabyo Yesu ikeye iya?
6. Bubwa muka buli mu kulilongesa bya Yesu?
Mbimbiliya inamwesa ngwayo kunapu kwa seho kulilongesa bya Yesu na cipangi cendi. Tandeni Yowano 14:6 na 17:3, na kusimutwiya ha cihula cinatako:
-
Bika bitunapande kulilongesela bya Yesu?
Yesu natushokolwela ngila mangana tupwe babusamba ba Njambi. Walongesele busunga hali Yehova, co lalo kwitila muli ikeye, twasa kuyoya myaka yoshe
BAMO BAKENDEKA NGWABO: “Bakaleho ba Yehova kubakulahelele Yesu.”
-
Yeni mumona bati?
SIMPI YAKAMA
Yesu wapwa kangelo wa nzili. Wapwa Muna Njambi, co lalo ikeye Mesiya.
Kwitulukamo
-
Bika bibakatumbwila Yesu ngwabo “mwana wa ntwatwa, mutwe wa byuma byoshe bya kutanga”?
-
Cipangi muka cakele naco Yesu simbu kanda aije hano hasi?
-
Tuzibuka bati ngwetu Yesu ikeye Mesiya?
WANENI BIKWABO
Tandeni biñanda bimwesa ngwabyo Yesu ikeye Mesiya.
Kuma Mbimbiliya imwesa ngwayo Njambi wakitile Yesu ngwe banu mubakakitila bana ndi?
“Bika Bibakatumbwila Yesu Ngwabo Muna Njambi?” (Ñanda ya ha webusaiti)
Tandeni biñanda bije bimwesa ngwabyo cilongesa ca Binjambi Batatu kucatundile mu Mbimbiliya.
“Yesu Wapwa Njambi Ndi?” (Kaposhi ka Kukengela ka April 1, 2009)
Tandeni biñanda bije bimwesa mubwatengulukilile buyoye bwa munakazi umo mwazibukile biyendeka Mbimbiliya hali Yesu.
a Mu cilongesa 26 na 27, tukasimutwiya bitutondela kutupatula nomu mwatupatwilile Yesu.
b Taleni Biñanda bya Kushongo 2 bije bimwesa bupolofweto buje bwendekele simbu yasholokele Mesiya hano hasi.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
