CILONGESA 19
Kuma Bakaleho ba Yehova Bapwa Baka-Kilistu ba Busunga Ndi?
Yetu Bakaleho ba Yehova twakulahela ngwetu twapwa tu baka-Kilistu ba busunga. Mwafwa bika? Byuma bitwakulahela byemana haka? Bika bitukalitumbwila ngwetu tu Bakaleho ba Yehova? Tukamwesa bati ngwetu twalizema umo na mukwabo?
1. Byuma bitwakulahela byemana haka?
Yesu wendekele ngwendi: ‘Lijwi lya Njambi lyapwa busunga.’ (Yowano 17:17) Ngwe mwa Yesu uje wakulahelele Lijwi lya Njambi, byuma bibakulahela Bakaleho ba Yehova nabyo byemana ha Lijwi lya Njambi. Tucisimutwiyeni bibakele na kulinga Bakaleho ba Yehova te bacibatumbula ngwabo baka-kulilongesa Mbimbiliya. Mu myaka ya ma 1870, eci cibunga catondesesele bilongesa bya mu Mbimbiliya. Co bibakulahelele byemanene ha Mbimbiliya, nameme byalisezele nebi bibalongesele mu maceci amangi. Co bakele na kulekako bakwabo byuma bibakele na kulilongesa mu Mbimbiliya. a
2. Bika bitukalitumbwila ngwetu tu Bakaleho ba Yehova?
Yehova akatumbula baka-kumulemesa ngwendi bakaleho bendi mwafwa bakambulula busunga hali ikeye. (Vahevelu 11:4–12:1) Cakumwenako, Njambi walekele banu bendi kusañulu ngwendi: “Mu bakaleho bange.” (Tandeni Isaya 43:10.) Yesu nendi wapwa “Mukaleho wa busunga.” (Kujombolola 1:5) Ngeci, mu 1931 twashangumukile kulisana ngwetu tu Bakaleho ba Yehova. Twabwahelela manene kupwa Bakaleho bendi.
3. Bakaleho ba Yehova bali na kutembwinina bati cizemo ca Yesu?
Yesu wazemene manene bandongesi bendi, co wabamwene ngwe baka-naanga yendi. (Tandeni Mako 3:35.) Mu ngila imolika, Bakaleho ba Yehova bapwa naanga imolika mu kaye koshe. Mukemwo tukalisana ngwetu tu bandolome na bandokazi. (Filimoni 1, 2) Co lalo tukapangesa eci cinangulo cendeka ngwaco: ‘Zemeni babusamba beni baka-kukulahela.’ (1 Petulu 2:17) Bakaleho ba Yehova balizema umo na mukwabo. Cakumwenako, bakakwasa bakwabo baje bali mu bukalu mu kaye koshe.
TONDESESENI
Tondeseseni biñanda bya Bakaleho ba Yehova bya kunima. Bukaleho muka bumwesa ngwabwo twapwa baka-Kilistu ba busunga?
Byuma bibakulahela baka-Kilistu ba busunga byemana ha Mbimbiliya, co lalo bakalekeko bakwabo busunga bwa mu Mbimbiliya
4. Byuma bitwakulahela byemana ha Mbimbiliya
Yehova wamwesele ngwendi banu bendi kulutwe bakazibisisa mwamubwa busunga bwa mu Mbimbiliya. Tandeni 2 Kolinte 4:6, na kusimutwiya ha cihula cinatako:
-
Ceke ca Njambi cinakwasa banu bendi bazibisise bika?
Charles Russell na bakwabo baka-kulilongesa Mbimbiliya bakele na kulilongesa bati Lijwi lya Njambi? Kengeni VIDIO na kusimutwiya ha cihula cinatako.
-
Kwesekesa na vidio, Charles Russell na bakwabo baka-kulilongesa Mbimbiliya bakele na kulilongesa bati Mbimbiliya?
Muzibuka ndi?
Bisimbu bimo tunatengulula ku kuzibisisa kwetu. Mwafwa bika? Mukukai na kukya, byuma bikamoneka bwino. Njambi nendi akakwasa banu bendi bazibisise bwino Lijwi lyendi kamandondo-kamandondo. (Tandeni Visimo 4:18.) Nameme busunga bwa mu Mbimbiliya kubwesi kutenguluka, tukatengulula byuma bitwakulahela mutukazibisisa mwamubwa Mbimbiliya.
5. Tukalingi byuma byendelela na lizina lyetu
Bika bitwalilukilile ngwetu tu Bakaleho ba Yehova? Kengeni VIDIO na kusimutwiya ha cihula cinatako.
-
Mwafwa bika eli lizina linafwila?
Yehova nangwila bika banu ngwendi bapwe bakaleho bendi? Mangana bamwimanene ngwabo napu Njambi wa busunga, mwafwa banamukutiiya biñanda byabingi bya makuli. Tucisimutwiyeni ha biñanda bibali bibanakutiiya Njambi.
Bulombelo bumo bukalongesa ngwabwo Njambi ashaka ngwendi banu bapangese tumponya mu kumulemesa. Tandeni Valevi 26:1, na kusimutwiya ha bihula binatako:
-
Mbimbiliya inendeka bika? Yehova akalizibi bati mwakamono banu bapangesa tumponya?
Mu bulombelo bumo bakalongesa ngwabo Yesu ikeye bene Njambi. Tandeni Yowano 20:17, na kusimutwiya ha bihula binatako:
-
Mbimbiliya inendeka bika? Kuma Yesu ikeye bene Njambi ndi?
-
Yehova natumu Bakaleho bendi mangana bambulule busunga hali ikeye na hali Munendi. Kuzibuka ei ñanda kumizibisa bati?
6. Twalizema umo na mukwabo
Mbimbiliya inesekesa baka-Kilistu ku bilyo bya kuliseza-seza bya mubila. Tandeni 1 Kolinte 12:25, 26, na kusimutwiya ha bihula binatako:
-
Baka-Kilistu ba busunga banapande kulinga bika nga bakwabo baka-Kilistu bali na kuyanda?
-
Mumona bati, kuma Bakaleho ba Yehova balizema umo na mukwabo ndi?
Bakaleho ba Yehova mubakakala mu bukalu ku mutambela umo wa kaye, bakwabo bakabakwasa bwasi-bwasi. Cakumwenako, kengeni ei VIDIO. Kutundaho, simutwiyeni ha cihula cinatako.
-
Bika bibalingile Bakaleho ba Yehova bije byamwesele ngwabyo balizema umo na mukwabo?
Baka-Kilistu ba busunga bakakwasa bakwabo nga bali mu bukalu
BAMO BAKENDEKA NGWABO: “Bakaleho ba Yehova ololo banashangumuka kukalako, co banapu lika bulombelo bwabuha.”
-
Yehova washwile litangwa muka kusana baka-kumulemesa ngwendi bakaleho bendi?
SIMPI YAKAMA
Bakaleho ba Yehova bapwa baka-Kilistu ba busunga. Twapwa naanga imo ya bangamba ba Njambi mu kaye koshe, co byuma bitwakulahela byemana ha Mbimbiliya. Co lalo tukambulula biñanda bya busunga bya Yehova.
Kwitulukamo
-
Mwafwa bika tukalitumbula ngwetu tu Bakaleho ba Yehova?
-
Tukamwesa bati ngwetu twalizema umo na mukwabo?
-
Kuma Bakaleho ba Yehova bapwa baka-Kilistu ba busunga ndi?
WANENI BIKWABO
Moneni bibaliwanene nabyo Bakaleho ba Yehova.
Bakaleho ba Yehova Bamwesele Likulahelo Lyabo mu Bilinga—Mutamba 1: Kutunda mu Lisusulungu (1:00:53)
Bakaleho ba Yehova banajombolola bati bilongesa bya makuli?
Tandeni mubanakumbulwila bihula bimo bibakehula manene banu ha Bakaleho ba Yehova.
“Bihula Bibakehula Manene Banu ha Bakaleho ba Yehova” (mutamba wa ha webusaiti)
Stephen wazindile banu ba muyati weka, co wakele na kubalwisa. Bika byamukwasele atenguluke mwaliwanene na Bakaleho ba Yehova?
“Futisi Yange Yakele na Kuya Mweka” (Kaposhi ka Kukengela ka July 1, 2015)
a Kushwa mu 1879, magazini ya Kaposhi ka Kukengela inatwalelelaho kwendeka biñanda bya mu Mbimbiliya.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
