Yehova Njambi akalingi byuma mu ngila inapande. (1 Kolinte 14:33, 40) Ngeci, banu bendi nabo banapande kulinga mwamubwa byuma mu cikungulukilo. Byuma bikende bati mu cikungulukilo? Bika bitwasa kulinga mangana byuma byende mwamubwa mu cikungulukilo?

1. Iya mutwe wa cikungulukilo?

Kilistu ikeye mutwe wa cikungulukilo. (Efeso 5:23) Ikeye ali na kutwamenena cipangi cibali na kulinga banu ba Yehova mu kaye koshe. Yesu nangula ‘ndungo wa kulongwa na kunyanyama.’ Ou ndungo napu cibunga ca bakulunu baje baneshwala mu cikungulukilo, baje batukatumbula lalo ngwetu Cibunga ca Kutwamenena. (Tandeni Mateo 24:45-47.) Ngwe mubakele na kulingila tupositolo na bakulunu mu Yelusalema, Cibunga ca Kutwamenena cili na kutwamenena cikungulukilo ca Njambi mu kaye koshe. (Vilinga 15:2) Aba banalume keti bakebo bantwama ba munga ya Njambi embwe. Bakatondesesa mu Mbimbiliya mangana bazibuke cizango ca Yehova. Bakalyaka kwisi ya Yesu, mutwe wa cikungulukilo.

2. Cipangi muka cibakala naco bakulunu mu cikungulukilo?

Bakulunu banapu banalume baje banapangela Yehova mu kulongwa ha simbu yailaha. Bakapangesa Mbimbiliya mu kulongesa banu ba Yehova na kubanyunga. Bakabatakamesa na kubakwasa. Kubesi kubafweta embwe. Bakapanga cipangi cabo ‘ngwe mwanashaka Njambi, keti ngwe kubasindiya nambe mwafwa ya fweto embwe, oloni na cizango cacibwa ca kupanga.’ (1 Petulu 5:1, 2) Baka-kupangela mu cikungulukilo bakakwasa bakulunu. Co mu kwita kwa simbu, nabo banasa kupwa bakulunu.

Cibunga ca Kutwamenena cikangula bakulunu bamo mangana bapwe tunyungi ba kuzenguluka. Aba tunyungi ba kuzenguluka bakendela bikungulukilo mangana baye na kutakamesa bandolome na bandokazi. Bakapangesa bisoneka mubakangula baje banapwisamo bitondeka mangana bapwe bakulunu nambe baka-kupangela.—1 Timateo 3:1-10, 12; Tito 1:5-9.

3. Bika bitunapande kulinga tubaboshe?

Tubaboshe ‘tukashangazala Yehova’ ha kulinga byuma bya kuliseza-seza mu cikungulukilo na kulinga cipangi ca kwambulula.—Tandeni Myaso 148:12, 13.

 TONDESESENI

4. Yesu wapwa ntwama wa ngozi

Yesu natulanya. Tandeni Mateo 11:28-30, na kusimutwiya ha cihula cinatako:

• Yesu wapwa ntwama wa kufwa bati, co ashaka ngwendi tulizibe bati?

5. Bakulunu bakatumwesa mwanja waubwa

1. Bakulunu bakakanyamesa busamba bwabo na Njambi na kukwasa binaanga byabo nabyo bilinge ngoco

2. Bakulunu baka mbunge boshe mu cikungulukilo

3.   Bakulunu bakambulula simbu yoshe

4. Bakulunu bapwa balongesi. Co lalo bakakwasa mu kujelesa na mu bipangi bikwabo

6. Tunapande kulikwatasana na bakulunu mu cikungulukilo

Mbimbiliya inendeka bitunapande kulikwatasanena na bakulunu mu cikungulukilo. Tandeni Vahevelu 13:17, na kusimutwiya ha cihula cinatako:

• Mwafwa bika Mbimbiliya itushongangeya ngwayo twononoke baje bali na kututwamenena na kulikwatasana nabo?

Tandeni Luka 16:10, na kusimutiya ha cihula cinatako:

• Bika bitunapande kwononokela bakulunu mu cikungulukilo na kulikwatasana nabo nameme mu byuma bije bimoneka ngwe byabindondo?

 SIMPI YAKAMA

Yesu ikeye mutwe wa cikungulukilo. Tukalikwatasana na bakulunu baje bali mwisi yendi mwafwa bakatutakamesa na kutumwesa mwanja waubwa.

Kwitulukamo

• Iya mutwe wa cikungulukilo?

• Bakulunu bakakwasa bati cikungulukilo?

• Bika byanapande kulinga umo na umo wa bangamba ba Yehova?