Yesu wendekele ngwendi baka-Kilistu boshe banapande kubambwitika. (Tandeni Mateo 28:19, 20.) Cimbwitiko capwa cika? Co bika byanapande kulinga munu mangana bamumbwitike?

1. Cimbwitiko capwa cika?

Lijwi libananungulula ngwabo “kumbwitika” lyatunda ha lijwi lya Cigriki lije lilumbununa “kuzimika” mu mema. Yesu mubamumbwitikile, bamuzimikile mu ndonga ya Yondau, co “watundile mu mema.” (Mako 1:9, 10) Ngeci, muka-Kilistu wa busunga banapande kumumbwitika nambe kumuzimika mu mema.

2. Cimbwitiko cimwesa bika?

Nga munu bamumbwitika, co amwesa ku banu ngwendi nalikundika kuli Yehova Njambi. Munu asa kulikundika bati kuli Njambi? Simbu kanda bamumbwitike, alombela kuli Yehova na kumuleka ngwendi amupangela mu kuyoya kwendi kwoshe. Owo munu akulahesa Yehova ngwendi alemesa lika ikeye na kutwameka cizango cendi mu kuyoya kwendi kwoshe. Alyangwila ‘kulibyana ikeye babenya na kukabangeya’ bilongesa bya Yesu na mwanja wendi. (Mateo 16:24) Kulikundika kuli Njambi na kumumbwitika kumukwasa alikute busamba bwa kukanyama na Yehova hamolika na bangamba bendi.

3. Bika byanapande kulinga munu mangana bamumbwitike?

Simbu kanda bamimbwitike, munapande kulilongesa bya Yehova na kukanyamesa likulahelo lyeni kuli ikeye. (Tandeni Vahevelu 11:6.) Kukanyamesa likulahelo lyeni kumilingisa muzeme manene Yehova. Co lalo kumilingisa mulekeko bakweni byendi na kukabangeya mashiko na binangulo byendi. (2 Timateo 4:2; 1 Yowano 5:3) Nga munu ayoya kwesekesa na ‘cizango ca Yehova,’ co asa kulikundika kuli ikeye na kumumbwitika.—Kolose 1:9, 10. a

 TONDESESENI

4. Bika bitulilongesa ku cimbwitiko ca Yesu?

Tandeni Mateo 3:13-17 mangana mumone mubambwitikilile Yesu. Kutundaho, simutwiyeni ha bihula binatako:

• Kuma Yesu wapwile mbututu mubamumbwitikile ndi?

• Yesu bamumbwitikile bati? Kuma bambwitikile lika minye mu mema na kumukwata ha luholo nambe kumwitila lika mema ha mutwe ndi?

Yesu mubamumbwitikile, washangumukile kulinga cipangi camutuminine Njambi hano hasi. Tandeni Luka 3:21-23 na Yowano 6:38. Kutundaho, simutwiyeni ha cihula cinatako:

• Cipangi muka capwile ca seho manene kuli Yesu mubamumbwitikile?

5. Mwasa kulyakela cilengo ca kumimbwitika

Kulikundika kuli Njambi na kumimbwitika kunasa kumoneka ngwe kwakukalu. Oloni omwo mutwalelelaho kulilongesa, co mulikundika kuli Njambi na kumimbwitika. Kengeni VIDIO mangana mumone bamo banalingi ngoco.

Tandeni Yowano 17:3 na Yakomba 1:5. Kutundaho, simutwiyeni ha cihula cinatako:

• Bika byanapande kulinga munu mangana bamumbwitike?

1. Tulikundika kuli Yehova nga tulombela kuli ikeye na kumuleka ngwetu tushaka kumupangela mu kuyoya kwetu kwoshe

2. Nga batumbwitika, co tumwesa ku banu ngwetu twalikundika kuli Njambi

 6. Kumimbwitika kumilingisa mukale mu naanga ya Yehova

Munu mubakamumbwitika akaija mu naanga ya Yehova. Tubaboshe twakulahela byuma bya kulifwa nameme twatunda ku miyati na bisemwa bya kuliseza-seza. Tandeni Myaso 25:14 na 1 Petulu 2:17. Kutundaho, simutwiyeni ha bihula binatako:

• Busamba bwa munu na Yehova bufwa bati nga bamumbwitika? Bika bilingiwa mukati kendi na bangamba ba Yehova bakwabo?

 SIMPI YAKAMA

Yesu wendekele ngwendi baka-Kilistu banapande kubambwitika. Simbu kanda munu bamumbwitike, napande kukulahela Yehova, kukabangeya mashiko endi na kulikundika kuli ikeye.

Kwitulukamo

• Cimbwitiko capwa cika? Mwafwa bika baka-Kilistu banapande kubambwitika?

• Kuliseza muka kuli mu kulikundika kuli Njambi na cimbwitiko?

• Bika byanapande kulinga munu mangana alikundike kuli Njambi na kumumbwitika?