CILONGESA 28
Kandeleleni Yehova na Yesu ha Byuma Bibanamilingila
Muliziba bati nga kabusamba keni amyana bwana bwabubwa? Tukulahela mukandelela kuli kabusamba keni ha bwana bwanamyana. Yehova na Yesu banatwana bwana bwabubwa manene. Bwana muka bene obwo? Twasa kumwesa bati ngwetu twakandelela ha kutwana obu bwana?
1. Ngila muka itwasa kumweselamo ngwetu twakandelela kuli Njambi na Kilistu ha byuma bibanatulingila?
Mbimbiliya ngwayo ‘woshe akulahela Yesu’ akayoya myaka yoshe. (Yowano 3:16) Twasa kumwesa bati ngwetu twakulahela Yesu? Kutwapandele kwendeka lika ha kanwa ngwetu twamukulahela. Byuma bitwangula kulinga binapande kumwesa indi tuli na likulahelo. (Yakomba 2:17) Nga byuma bitwendeka nebi bitulinga bimwesa ngwabyo tuli na likulahelo, co busamba bwetu na Yesu hamolika na Ishe, Yehova bukanyama.—Tandeni Yowano 14:21.
2. Cilika muka ca kulitila cije cikatukwasa tumwese kukandelela kuli Yehova na Yesu ha byuma bibanatulingila?
Mangwezi a kutwala ku butsiki bwa kwinduka litangwa lyatsile, Yesu wamwesele bandongesi bendi ngila ikwabo ya kumweselamo kukandelela ku ndando ya kupatula. Washangumukile cilika ca kulitila cije cibatumbula mu Mbimbiliya ngwabo “Kulya kwa Mwene kwa Mangwezi” nambe ngwetu Canukiso ca kutsa kwa Kilistu. (1 Kolinte 11:20, NWT) Yesu mwalingile eci cilika, washakele ngwendi tupositolo na baka-Kilistu boshe baija munima, banuke-anuke ngwabo Yesu wabatsililile. Mukemwo wendekele ngwendi: “Lingeni eci mu kunjanuka.” (Luka 22:19) Nga muwaniwa ku Canukiso, co mumwesa ngweni mwakandelela kuli Yehova na Yesu ha kumimwesa cizemo.
TONDESESENI
Mu bingila muka lalo mumwasa kumwesela ngweni mwakandelela kuli Yehova na Yesu ha kumimwesa cizemo cakama? Bika bikwapwila kwa seho kwanuka kutsa kwa Yesu?
3. Twasa kumwesa bati kukandelela?
Acilingeni ngwe munakala na kunwa malya mu ndonga, co munu umo akumijabulamo. Kuma mukatuka lika na kuya na kukandelela kuli owo munu kwahi ndi?
Yehova natwobola. Tandeni 1 Yowano 4:8-10, na kusimutwiya ha bihula binatako:
-
Mwafwa bika ndando ya kupatula ya Yesu yapwa bwana bwa kulitila?
-
Byuma byanamilingila Yehova na Yesu bimizibisa bati ku mbunge?
Twasa kumwesa bati ngwetu twakandelela kuli Yehova na Yesu ha byuma bibanatulingila? Tandeni 2 Kolinte 5:15 na 1 Yowano 4:11; 5:3. Mumumanesa kutanda cisoneka na cisoneka, co musimutwiya ha cihula cinatako:
-
Kwesekesa nou mukanda, twasa kumwesa bati ngwetu twakandelela?
4. Tembwinineni Yesu
Ngila ikwabo itwasa kumweselamo ngwetu twakandelela inapu kutembwinina Yesu. Tandeni 1 Petulu 2:21, na kusimutwiya ha cihula cinatako:
-
Mwasa kukabangeya bati mu myanja ya Yesu?
Yesu wazemene Lijwi lya Njambi, co lalo wambulwile muzimbu waubwa na kukwasa bakwabo
5. Kaleni ku Canukiso ca kutsa kwa Kilistu
Tandeni Luka 22:14, 19, 20, mangana mumone byalingiwile ha Kulya kwa Mwene kwa Mangwezi kwa kulibanga. Kutundaho, simutwiyeni ha bihula binatako:
-
Bika byalingiwile ha Kulya kwa Mwene kwa Mangwezi?
-
Likende na binyu bimanena bika?—Taleni vesi 19 na 20.
Yesu washikile bandongesi bendi ngwendi balinge cilika ca Kulya kwa Mwene kwa Mangwezi mwaka na mwaka ha litangwa lyatsile. Ngeci, Bakaleho ba Yehova bakakunguluka lumo ha mwaka mu kwanuka kutsa kwa Kilistu ngwe mwashikilile. Kengeni ei VIDIO mangana mumone bikalingiwako. Kutundaho, simutwiyeni ha cihula cinatako.
-
Bika bikalingiwa ha Canukiso?
Likende na binyu byapwa bifwisa. Likende limanena mubila wa Yesu wa kulumbunuka uje wanene omwo watutsililile. Binyu bimanena maninga endi
BAMO BAKENDEKA NGWABO: “Nga munu atambula lika Yesu, co akoboka.”
-
Mwasa kupangesa bati mukanda wa Yowano 3:16 na Yakomba 2:17, mangana mumwese munu ngweni kukulahela kukwapandele kupwa lika kwa ha kanwa?
SIMPI YAKAMA
Tumwesa kukandelela ku byuma byanatulingila Yesu nga tumukulahela na kukala ku Canukiso ca kutsa kwendi.
Kwitulukamo
-
Kukulahela Yesu kulumbununa bika?
-
Yeni mwasa kumwesa bati ngweni mwakandelela kuli Yehova na Yesu ha byuma bibanamilingila?
-
Bika bitunapande kuila ku Canukiso ca kutsa kwa Kilistu?
WANENI BIKWABO
Kutsa kwa Kilistu kutushongangeya tulinge bika?
Tandeni biñanda bikwabo bije bilumbununa likulahelo nomu mumwasa kumwesela ngweni muli nalyo.
“Kulaheleni Byuma Byanamikulahesa Yehova” (Kaposhi ka Kukengela ka October 2016)
Futisi ya munakazi umo yatengulukile mwazibukile seho ya ndando ya kupatula. Tandeni ou muzimbu: “Njiliziba Ngwange Njajele, Njili na Kuyoya, Co Lalo Njashubuluka.”
“Mbimbiliya Ikatengulula Buyoye bwa Banu” (Kaposhi ka Kukengela ka August 1, 2011)
Mwafwa bika banu babandondo lika bakali bifwisa ha Canukiso?
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
