Kuma mwatsisaho laja munu imwazema ndi? Nga kuli byakutsa, hamo mukalihula ngweni: ‘Bika bikalingiwa ku munu nga natsi? Kuma tukalimona lalo na banu batwazema baje banatsi ndi?’ Muno mu cilongesa na mu cilongesa cinatako, tuwana bikumbululo bya mu Mbimbiliya bije bituzembeleka.

1. Bika bikalingiwa ku munu nga natsi?

Yesu wesekesele kutsa ku kulala tulo. Munu nga ali mu tulo kasa kuzibuka byuma bili na kulingiwa. Kutsa kunalifu bati na tulo? Nga munu natsi kasa kuziba kubabala. Kesi kuziba buli nameme washakele manene kukala hamo na babusamba na babushoko bwendi. Mbimbiliya ngwayo: “Batsi neci bene bazibuka cahi.”—Tandeni Muka-kwambulula 9:5.

2. Kuzibuka bikalingiwa ku munu nga natsi kutukwasa bati?

Banu babangi bakatewe kutsa, co lalo bakatewe batsi. Oloni kuzibuka biyendeka Mbimbiliya kutuzembeleka. Yesu wendekele ngwendi: “Busunga bukamipatula.” (Yowano 8:32) Mu bulombelo bumo bakalongesa ngwabo nga munu natsi, kuli cuma cimo cikatwalelelaho kuyoya. Oloni ebi keti bikebyo biyendeka Mbimbiliya. Ngeci, wahi akayanda munima ya kutsa. Co lalo batsi kubasa kutubulumuna mwafwa nacimo cahi cibazibuka. Ngeci, kutwapandele kukombelela bakulu nambe kulinga byuma bimo kutewa ngwetu hamo batsi batulubalela.

Banu bamo bakendeka ngwabo basa kusimutwiya na batsi. Oloni wahi asa kulinga ngoco. Ngwe mutunalilongesela, batsi “neci bene bazibuka cahi.” Baje bakasinganyeka ngwabo bakendeka na babushoko bwabo baje batsa, kubesi kwendeka nabo embwe. Oloni bakendeka na bandemone baje basa kutembwinina munu uje natsi. Ngeci, kuzibuka biyendeka Mbimbiliya kutunyungilila ku bandemone. Yehova natubindika kuwana bingila bya kushaka kusimutwiya na batsi mwafwa azibuka ngwendi nga tulikwatasana na bandemone, co basa kutubulumuna.—Tandeni Kwituluka mu Mashiko 18:10-12.

3. Cifwa muka cibalimo batsi?

Banu mu kaye bakulahela byuma bya kuliseza-seza ha byuma bikalingiwa ku munu nga natsi, oloni keti byoshe byapwa bya busunga.

• Bika bibakulahela banu muno mu citingitingi nga munu natsi?

 4. Kuzibuka busunga ha ñanda ya kutsa kutukwasa

Nga tuzibuka mwamubwa byuma bikalingiwa ku munu nga natsi, co kututewe batsi. Tandeni Muka-kwambulula 9:10, na kusimutwiya ha cihula cinatako:

• Kuma batsi basa kutuyandesa ndi?

Busunga bwa mu Mbimbiliya butupatula lalo ku bundungo bwa kulemesa bakulu nambe kulinga byuma bimo mu kushaka kuzibisa batsi kubwaha. Tandeni Isaya 8:19 na Kujombolola 4:11. Kutundaho, simutwiyeni ha cihula cinatako:

• Musinganyeka ngweni Yehova akalizibi bati nga munu akombelela bakulu nambe kulomba bukwasi ku batsi?

5. Kuzibuka busunga ha ñanda ya kutsa kutuzembeleka

Banu babangi bakabalongesa ngwabo nga munu alinga byuma byabibi ha simbu ino, co mwatsa akayanda mwafwa ya bubi bwendi. Oloni kuzibuka busunga kutunyungilila mwafwa tuzibuka ngwetu wahi akayanda munima ya kutsa, nameme baje balingile byuma byabibi manene. Tandeni Loma 6:7, na kusimutwiya ha cihula cinatako:

• Mbimbiliya imwesa ngwayo nga munu natsi, Njambi kamutandela lalo bubi bwendi. Co mumona bati, kuma munu nga natsi, ayandela lalo bubi bwendi ndi?

Kuzibuka mwamubwa Yehova kutukwasa tumone ngwetu kasa kuyandesa batsi. Tandeni Kwituluka mu Mashiko 32:4 na 1 Yowano 4:8. Kutundaho, simutwiyeni ha bihula binatako:

• Kuma Njambi uje ali na bifwa bibanendeka oku ku bisoneka asa kuyandesa batsi ndi?

• Kuma biyendeka Mbimbiliya ha ñanda ya kutsa bimizembeleka ndi? Mwafwa bika?

 SIMPI YAKAMA

Munu mwakatsi, kuyoya kwendi kukahu. Batsi kubesi na kuyanda, co lalo kubasa kutuyandesa.

Kwitulukamo

• Bika bikalingiwa ku munu nga natsi?

• Kuzibuka mwamubwa byuma bikalingiwa ku munu nga natsi kutukwasa bati?

• Kuzibuka obu busunga kutuzembeleka bati?