CILONGESA 30
Banu Bamwazema Baje Banatsi Basa Kukayoya Lalo!
Kutsa kukatupokola bimbunge na kutunenela busiwa. Mukemwo Mbimbiliya inatumbula kutsa ngwayo citozi. (1 Kolinte 15:26) Mu Cilongesa 27, tunamwene ngwetu Yehova akanyongesa ou citozi. Oloni bati oni baje batsa laja? Muno mu cilongesa, tusimutwiya byuma bikwabo lalo byabibwa byakalinga Yehova. Akasangula banu babangi baje banatsi mangana bakalikuwe kuyoya myaka yoshe. Ebi byuma bikalingiwa bene ndi? Mubakasanguka, bakayoya mwilu, indi bakayoya hano hasi?
1. Yehova akalinga bika kuli babusamba na babushoko bwetu baje banatsi?
Yehova nashungwiya kusangula banu baje banatsi. Munalume wa kulongwa Yombi wakulahelele ngwendi nga atsa, Njambi kakamwibala. Walekele Njambi ngwendi: “Ukanjisana, co njikakutaba [kutundilila mu Cihilo].”—Tandeni Yombi 14:13-15.
2. Tuzibuka bati ngwetu batsi bakasanguka?
Yesu mwakele hano hasi, Njambi wamwanene nzili ya kusangula batsi. Yesu wasangwile mumbanda wa myaka 12 na muna fwile wa mukwenje. (Mako 5:41, 42; Luka 7:12-15) Mu kwita kwa simbu, Lazalu kabusamba ka Yesu nendi watsile. Nameme Lazalu wakele mu mbumbo matangwa awana, oloni Yesu wamusangwile. Yesu walombelele kuli Njambi, co watambekele ngwendi: “Lazalu, tuhukamo!” Co Lazalu “watuhukilemo” oku ayoya. (Yowano 11:43, 44) Acisinganyekeni kubwaha kubazibile babusamba na babushoko bwa Lazalu!
3. Twabandamena ngwetu babushoko na babusamba betu baje banatsi bakasanguka
Mbimbiliya ngwayo: ‘Batsi bakasanguka.’ (Vilinga 24:15) Banu basangwile Yesu kubaile mwilu. (Yowano 3:13) Bayoyele lalo hano bene hasi, co babwahelelele. Ngwe mwalingile kunima, ololo Yesu asangula banu babangi-bangi baje banatsi mangana balikuwe kuyoya mu paradaisi hano hasi. Yesu wendekele ngwendi banu boshe baje bali mu bisinganyeka bya Njambi bakasanguka, nameme baje babanebala banu.—Yowano 5:28, 29.
TONDESESENI
Bukaleho muka butuwana mu Mbimbiliya buje bumwesa ngwabwo batsi bakasanguka? Kuzibuka ngwetu batsi bakasanguka kutuzembeleka bati na kutulingisa tukale na lilabelelo?
4. Yesu wamwesele ngwendi asa kusangula batsi
Zibeni mu kushula byuma byalingile Yesu mwatsile kabusamba kendi Lazalu. Tandeni Yowano 11:14, 38-44, na kusimutwiya ha bihula binatako:
-
Tuzibuka bati ngwetu Lazalu watsile bene?—Taleni vesi 39.
-
Ngwe Lazalu mwatsile waile mwilu, kuma Yesu ngwe wamusangwile ngwendi akuyoye lalo hano hasi ndi?
5. Banu babangi bakasanguka!
Tandeni Myaso 37:29, na kusimutwiya ha cihula cinatako:
-
Banu babangi-bangi baje bakasanguka bakayoya kuli?
Yesu akasangula banu babangi kwambateselela na baje kubalemesele Yehova. Tandeni Vilinga 24:15, na kusimutwiya ha cihula cinatako:
-
Beya bamunabandamena kukamona mubakasanguka?
Yesu asa kusangula munu uje natsi ngwe cisemi mwanasa kwindwila munendi uje nalala tulo
6. Kusanguka kwa batsi kutuzembeleka na kutulingisa tukale na lilabelelo
Ñanda ya mu Mbimbiliya ya muna Njailosi wa mumbanda ikazembeleka na kutakamesa banu babangi baje bali mu busiwa. Tandeni Luka 8:40-42, 49-56, mangana muzibe byalingiwile.
Simbu kanda asangule muna Njailosi wa mumbanda, Yesu walekele Njailosi ngwendi: “Keti uzibe lyoba, kulahela lika.” (Taleni vesi 50.) Kuzibuka ngweni batsi bakasanguka kumikwasa bati . . .
-
nga kuli munu umo imwazema natoko?
-
nga muli mu bushonde?
Kengeni VIDIO na kusimutwiya ha cihula cinatako.
-
Lilabelelo lya kusanguka linakwasele bati bisemi ba Phelicity bakolese?
BAMO BAKENDEKA NGWABO: “Na batsi bene kubakasanguka.”
-
Yeni mumona bati?
-
Cisoneka muka cimwasa kuleka munu cije cimwesa ngwaco batsi bakasanguka?
SIMPI YAKAMA
Mbimbiliya inamwesa ngwayo banu babangi-bangi baje banatsi bakasanguka. Yehova ashaka ngwendi bayoye lalo, co nana Yesu nzili ya kubasangula.
Kwitulukamo
-
Kuma Yehova na Yesu bashaka kusangula batsi ndi?
-
Banu babangi baje bakasanguka bakakala mwilu, indi hano hasi? Bika bimwendekela ngoco?
-
Bika bimilingisa mukulahele ngweni batsi bakasanguka?
WANENI BIKWABO
Bika byasa kumikwasa nga muli mu busiwa?
Kuma binangulo bya mu Mbimbiliya byasa kukwasa munu uje ali mu busiwa ndi?
Bika byasa kukwasa banike nga banatsisa kabusamba nambe kabushoko?
Kuma kuli bamo bali na kusanguka na kuya mwilu ndi? Beya kubakasanguka?
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
