CILONGESA 36
Kaleni na Busunga mu Byuma Byoshe
Tubaboshe twashaka ngwetu babusamba betu bakale na busunga. Yehova nendi ashaka ngwendi babusamba bendi bakale na busunga. Oloni kulinga ngoco keti kwakwasi ano matangwa mwafwa banu babangi mu kaye keti baka-busunga. Bubwa muka butundamo nga tulinga byuma byoshe mu busunga?
1. Bika bitunapande kupwila baka-busunga?
Nga tukala na busunga, co tumwesa Yehova ngwetu twamuzema, co lalo twamusingimika. Yehova azibuka byuma byoshe bitukasinganyeka nebi bitukalingi. (Vahevelu 4:13) Akamono nga munu alinga byuma mu busunga, co akabwahelela. Mbimbiliya ngwayo: ‘Shukulu Kalunga wazinda baka-kulinga bubi, wapwa kabusamba ka baka-busunga.’—Visimo 3:32.
2. Twasa kupwa bati baka-busunga ha litangwa na litangwa?
Yehova ashaka ngwendi ‘twendeke busunga kuli umo na mukwabo.’ (Zakaliya 8:16, 17) Oku kulumbununa bika? Kutwapandele kwendeka makuli nga twendeka na baka-naanga yetu, batukapanga nabo, bandolome na bandokazi betu, nambe baka-fulumende. Baka-busunga kubesi kwibila bakwabo nambe kubanyanyamena. (Tandeni Visimo 24:28 na Efeso 4:28.) Co lalo bakafwete mitelo. (Loma 13:5-7) Ngeci, “tushaka kulinga cuma ca busunga simbu yoshe.”—Vahevelu 13:18.
3. Bubwa muka buli mu kukala na busunga?
Nga tukala na busunga, co bakwetu batukulahela. Co lalo tulingisa boshe mu cikungulukilo bashubuluke ngwe baje bali mu naanga imo. Tukala lalo na citakutaku ca kujela. Nga tukala na busunga, co “tumwesa bubwa bwa bilongesa bya Njambi Muyoyesi wetu.” Co lalo tulingisa baje batumona bashake kulikwatasana netu mu kulemesa Njambi.—Tito 2:10.
TONDESESENI
Busamba bweni na Yehova bufwa bati nga mukala na busunga? Mwasa kupwa bati baka-busunga omwo muliwana na byuma bya kuliseza-seza mu kuyoya?
4. Nga mukala na busunga, co muzibisa Yehova kubwaha ku mbunge
Tandeni Myaso 44:21 na Malakiya 3:16. Kutundaho, simutwiyeni ha bihula binatako:
-
Mwafwa bika kutwapandele kusinganyeka ngwetu twasa kushweka byuma byabibi bitunalingi?
-
Musinganyeka ngweni Yehova aliziba bati nga mwendeka busunga nameme nga kulinga ngoco keti kwakwasi?
Nga bana bendeka-endeka busunga, bisemi babo bapwa ba kubwahelela. Netu nga twendeka-endeka busunga, co Yehova apwa wa kubwahelela
5. Kaleni na busunga simbu yoshe
Banu babangi mu kaye kubesi kumona seho ya kulinga byuma mu busunga simbu yoshe. Oloni bika bitunapande kukela na busunga simbu yoshe? Kengeni VIDIO.
Tandeni Vahevelu 13:18, na kusimutwiya mumwasa kumwesela busunga . . .
-
mu naanga.
-
ku bipangi nambe ku sikola.
-
mu byuma byeka.
6. Kukala na busunga kutukwasa
Nameme kwendeka busunga bisimbu bimo kunasa kutukobelesa mu bukalu, oloni kulinga ngoco kwakubwa manene. Tandeni Myaso 34:12-16, na kusimutwiya ha cihula cinatako:
-
Kwendeka busunga kumikwasa bati mu kuyoya kweni?
-
Nga munalume na munakazi wendi bendeka busunga simbu yoshe, co bakanyamesa bulo bwabo
-
Nga mwendeka busunga ku bipangi, co bakulunu ku bipangi bamikulahela
-
Nga mupwa baka-busunga, mukala na lizina lyalibwa ku baka-fulumende
BAMO BAKENDEKA NGWABO: “Kwendeka makuli amandondo kukwabiile.”
-
Mwafwa bika Yehova wazinda makuli oshe?
SIMPI YAKAMA
Yehova ashaka ngwendi babusamba bendi bakale na busunga mu byuma bibendeka nebi bibalinga.
Kwitulukamo
-
Mu byuma muka mutunapande kumwesa busunga?
-
Mwafwa bika kutwapandele kusinganyeka ngwetu twasa kushweka busunga?
-
Bika bimushakela kukala na busunga simbu yoshe?
WANENI BIKWABO
Bisemi basa kulongesa bati bana babo mangana bendeke-endeke busunga?
Bubwa muka butunda mu kulinga bitunakulahesa?
Kuma tunapande kufweta mitelo nameme nga baipangesa mu ngila yaibi ndi?
“Kuma Munapande Kufweta Mitelo Ndi?” (Kaposhi ka Kukengela ka September 1, 2011)
Bika byalingisile munalume umo wa linyanyamena atengulule futisi yendi na kupwa muka-busunga?
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
