CILONGESA 40
Twasa Kupwa Bati ba Kujela ku Mesho a Njambi?
Lingeni ngwe kuli cisemi uje akwasa munendi wamundondo alibwahesele kuya ku sikola. Napande kumona ngwendi munendi natana, co lalo nazala bizalo bya kujela. Kulinga ngoco kukwasa mwana alikangule ku mubila. Co lalo kumwesa ngwabo cisemi waka munendi mbunge. Mu ngila imolika, Tate yetu wa cizemo Yehova ashaka ngwendi tupwe ba kujela ku mubila, mu bisinganyeka na mu byuma bitulinga. Kupwa ba kujela kutukwasa, co lalo kwana bumpau kuli Yehova.
1. Twasa kupwa bati ba kujela ku mubila?
Yehova natuleke ngwendi: “Pweni ba kujela.” (1 Petulu 1:16) Ngeci, tunapande kupwa ba kujela ku mubila, mu bisinganyeka na mu bilinga. Twasa kupwa ba kujela ku mubila nga tujwela simbu yoshe, tukusha bizalo byetu, tujelesa ha binjibo byetu na kujelesa bikwata byetu, bya kufwa ngwe malonga, binganja, bikwata bya kulimisa na bikwabo. Co lalo tunapande kujelesa Njibo ya Bumwene. Nga tupwa ba kujela ku mubila, co twana Yehova bumpau.—2 Kolinte 6:3, 4.
2. Byuma muka kutwapandele kulinga nga tushaka kupwa ba kujela?
Mbimbiliya ngwayo, ‘tunapande kulijelesa ku byuma byoshe bije bijwalesa mubila na sipilitu.’ (2 Kolinte 7:1) Ngeci, kutushaka kulinga byuma byoshe-byoshe bije byasa kujwalesa mubila nambe bisinganyeka byetu. Byuma bitusinganyeka binapande kuzibisa Yehova kubwaha ku mbunge. Ngeci, tunapande kulifwita mangana keti tukale na bisinganyeka byabibi. (Myaso 104:34) Co lalo tunapande kukala na endekesi yaibwa.—Tandeni Kolose 3:8.
Byuma muka bikwabo byasa kutujwalesa ku mubila nambe mu bisinganyeka? Kuli byuma bimo bije byasa kujwalesa mibila yetu. Cakumwenako, kusipa makaya na kupangesa mwamubi bumbanda. Nga tujenjuka ku byuma bya cifwa eci, co tupwa ba kulikangula ku mubila. Co lalo tumwesa kasingimiko kuli Njambi ha bwana bwa kuyoya bwanatwana. Tupwa lalo ba kujela nga tujenjuka ku bilinga bya mazilo bya kufwa ngwe kulyesesa ku bushwama nambe kukenga bikupulo bya bukwizi. (Myaso 119:37; Efeso 5:5) Kwecela ebi bilinga kunasa kumoneka kukaluwa, oloni Yehova asa kutukwasa mangana tubyecele.—Tandeni Isaya 41:13.
TONDESESENI
Kupwa ba kujela ku mubila kwana bati Yehova bumpau? Bika byasa kumikwasa mwecele bilinga byabibi?
3. Kupwa ba kujela ku mubila kumwesa kasingimiko kuli Yehova
Mashiko anene Yehova kuli Baisalele, amwesa ngwawo Yehova washaka ngwendi bangamba bendi bapwe ba kujela. Tandeni Kutuuka 19:10 na 30:17-19. Kutundaho, simutwiyeni ha bihula binatako:
-
Yehova wamona bati kulijelesa ku mubila?
-
Bika bimwasa kulinga mangana mupwe ba kujela ku mubila?
Tunapande kulifwita mangana tupwe ba kujela. Twasa kupwa ba kujela nameme twatunga kwimbo nambe mu mbongi, nambe tu ba kufuka nambe tu tuhutu. Kengeni VIDIO na kusimutwiya ha cihula cinatako.
-
Kupwa ba kujela na kujelesa byuma byetu kulingisa bati banu basingimike cipangi ca kwambulula?
4. Eceleni bilinga byabibi
Yehova asa kutukwasa twecele kalingolingo koshe-koshe kakabi
Nga mukasipi makaya nambe kupangesa mwamubi bumbanda, co mwasa kuzibisisa ngweni kwecela tulingolingo twatubi keti kwakwasi. Oloni bika bimikwasa? Bika bitundamo nga munu atwalelelaho kulinga byuma bya cifwa eci? Tandeni Mateo 22:37-39. Kutundaho, simutwiyeni omwo kusipa makaya na kupangesa mwamubi bumbanda kwasa . . .
-
kutsiilamo busamba bweni na Yehova.
-
kumanesa likwatasano lili mu naanga nambe kutsiya busamba bweni na bakweni.
Lingeniko bimo mangana mwecele kalingolingo kakabi kamunasa kukala nako. a Kengeni VIDIO.
Tandeni Filipu 4:13, na kusimutwiya ha cihula cinatako:
-
Kulombela, kutanda mbimbiliya na kukunguluka simbu yoshe kukwasa bati munu ecele bilinga byabibi?
5. Lingeni mwoshe mumwasela mangana mwecele bilinga na bisinganyeka byabibi
Tandeni Kolose 3:5, na kusimutwiya ha bihula binatako:
-
Tuzibuka bati ngwetu kuyongola bikupulo bya bukwizi, kulitumina tumizimbu twa bukwizi na kulyesesa ku bushwama binapu bilinga bya mazilo mu mesho a Njambi?
-
Mumona bati, kuma kunapande Yehova mwanatuleke ngwendi tupwe ba kujela mu byuma bitusinganyeka, bitwendeka nebi bitulinga ndi? Mwafwa bika?
Mwasa kubyana bati bisinganyeka bya kujwala? Kengeni VIDIO.
Yesu wendekele cakumwenako cije cimwesa ngwaco tunapande kulingako bimo mangana tukale na futisi ya kujela. Tandeni Mateo 5:29, 30, na kusimutwiya ha cihula cinatako:
-
Yesu kalumbunwine ngwendi tunapande kulibulumuna, oloni walumbunwine ngwendi tunapande kulingako bimo. Byuma muka byanasa kulinga munu mangana keti akale na bisinganyeka bya kujwala? b
Nga muli na kulifwita kwecela bilinga bya kujwala, zibukeni ngweni Yehova ali na kumona kulifwita kweni. Tandeni Myaso 103:13, 14, na kusimutwiya ha cihula cinatako:
-
Nga kuli na kumikaluwila kwecela kalingolingo kamo kakabi, cisoneka muka casa kumikwasa mangana mukahyane?
Keti muzeye nga mwasebuka!
Nga munu nasebuka, kwakwasi kusinganyeka ngwendi, ‘Njasebuka, kunahu, njilikela.’ Lingeni ngwe kuli muka-kushatuka, co atanuka na kuwa. Kuma oho bene kunahu naluzu ndi? Kuma napande kukashangumukila lalo ku maputukilo ndi? Embwe. Mu ngila imolika, nga mwasebuka kukulumbununa ngwabo kumukecela oko kalingolingo kakabi. Co lalo kukulumbununa ngwabo byoshe bimunalifwiti binai lika mu mema. Munu nasa kusebuka, oloni asa kulinga lalo mwamubwa. Keti muzeye. Mwasa kwecela kalingolingo kakabi. Yehova amikwasa.
BAMO BAKENDEKA NGWABO: “Yange njinezilila, kunjasa kwecela.”
-
Nga munu endeka ngoco, cisoneka muka cimwasa kupangesa cije cimwesa ngwaco Yehova asa kumukwasa ecele kalingolingo kakabi?
SIMPI YAKAMA
Nga tushaka kuzibisa Yehova kubwaha, tunapande kupwa ba kujela ku mubila, mu bisinganyeka na mu bilinga.
Kwitulukamo
-
Bika bimunapande kupwila ba kujela?
-
Mwasa kutwalelelaho bati kupwa ba kujela ku mubila?
-
Bika bimikwasa mutwaleleleho kukala na bisinganyeka na bilinga bya kujela?
WANENI BIKWABO
Byuma muka bimo bimunasa kulinga mangana mutwaleleleho kupwa ba kujela nameme muli mu buhutu?
Moneni byuma bimwasa kulinga mangana mwecele kusipa.
Nangukeni bukalu bwasa kutunda mu kuyongola bikupulo bya bukwizi.
Munalume umo wasele bati kwecela kalingolingo ka kuyongola bikupulo bya bukwizi?
“Njonowele Lwalwingi, Oloni Njinasa” (Kaposhi ka Kukengela ka Na. 4 2016)
a Ha mutamba wa Waneni Bikwabo hali ñanda ya “Njasa Kwecela Bati Kusipa Makaya,” ije inalumbununa byuma byanapande kulinga munu mangana ecele kusipa makaya.
b Nga mushaka kuwana bukwasi bwa mwakwecelela kalingolingo ka kulyesesa ku bushwama, tandeni ñanda ya mutwe wa “Njasa Kwecela Bati Kalingolingo ka Kulyesesa ku Bushwama?” ije ili mu libulu lya Bikumbululo ku Bihula Bibakehula Babaha, Volyumu 1, capita 25.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
