CILONGESA 44
Kuma Bilika Byoshe Bikazibisa Njambi Kubwaha Ndi?
Yehova ashaka ngwendi tulikuwe kuyoya hamolika na kulinga bilika ha bisimbu bimo. Kuma bilika byoshe bikazibisa Njambi kubwaha ndi? Twasa kumwesa bati ngwetu twazema Yehova nga kuli cilika cimo?
1. Mwafwa bika bilika byabingi kubyesi kuzibisa Yehova kubwaha?
Hamo munasa kukomoka kuziba ngweni bilika byabingi kubilitombola nebi biyendeka Mbimbiliya. Ebi bilika binasa kutunda mu bulombelo bwa makuli. Co lalo binasa kwimana ha bilinga bya bundemone nambe ha cilongesa cije cimwesa ngwaco mwonyo kuwesi kutsa. Bilika bimo byemana ha kukulahela sande nambe laki. (Isaya 65:11) Yehova naleke bangamba bendi ngwendi: “Tundeni kuli bakebo. Kesi mulinge cuma cimo ha byuma bya kujwala.”—2 Kolinte 6:17. a
2. Yehova akalizibi bati mwakamono bilika bije bikana kasingimiko ka kutubakanesa ku banu?
Yehova natunangula ngwendi kutwapandele ‘kukulahela munu wangoco.’ (Tandeni Njelemiya 17:5.) Bilika bimo byapwa bya kwana kasingimiko kuli baka-kuyula nambe maswalale. Bimoco byapwa bya kusingimika bizibukiso bya lifuti bya kufwa ngwe pandela nambe kupatuka kwa lifuti. (1 Yowano 5:21) Ha bilika bikwaboco, banu bakakundwiya bibunga bya bupolitiki nambe bimunga bya banu lika.
3. Byuma muka byasa kulingisa cilika cijeneke kupwa cacibwa?
Mbimbiliya kuitabesa ‘kunwa manene bwala na kulinga biwano bya miyoyo na kupenda.’ (1 Petulu 4:3) Ha bilika bimo, banu bakalilingila mwoshe mubashakela, co lalo bakalingi bukwizi. Ngeci, nga tushaka kupwa babusamba ba Yehova, kutwapandele kulikobelesa mu bilinga bya kujwala.
TONDESESENI
Mwasa kwangula bati byakulinga bije bizibisa Yehova kubwaha ku mbunge nga kuli bilika bimo?
4. Keti mulikobelese mu bilika bije kubizibisa Yehova kubwaha
Tandeni Efeso 5:10, na kusimutwiya ha bihula binatako:
-
Bika bitunapande kwaka mu bisinganyeka nga kuli cilika?
-
Bilika muka byalisala manene kumwakala?
-
Mumona bati, kuma bilika byaco bikazibisa Yehova kubwaha ndi?
Kuma mwalihulaho laja mwakalizibila Njambi nga banu balinga cilika ca kwanuka litangwa lyasemukile munu ndi? Mbimbiliya kuimwesa ngwayo kwakele ngamba ya Njambi uje walingile cilika ca kwanuka litangwa lyasemukile. Oloni inamwesa ngwayo banu baje kubalemesele Yehova bakebo balingile bilika bya kwanuka litangwa libasemukile. Tandeni Kushangumuka 40:20-22 na Mateo 14:6-10. Kutundaho, simutwiyeni ha bihula binatako:
-
Ebi bilika bibali binalifu bati?
-
Kwesekesa nei mikanda, mumona ngweni bilika bya kwanuka litangwa lyasemukile munu bikazibisa bati Yehova?
Hamo munasa kulihula ngweni, ‘Kuma Yehova alubala nga njikala ku cilika ca kwanuka litangwa lyasemukile munu nambe ku cilika coshe-coshe cije kucilitombola na Mbimbiliya ndi?’ Tandeni Kutuuka 32:1-8. Kutundaho, kengeni VIDIO na kusimutwiya ha bihula binatako.
-
Mwafwa bika tunapande kulinga byuma bije bizibisa Yehova kubwaha?
-
Twasa kulinga bati ngoco?
Mumwasa kuzibukila cilika cije kucizibisa Njambi kubwaha
-
Kuma oco cilika catunda mu Mbimbiliya ndi? Tondeseseni kucatunda.
-
Kuma cimilingisa mumwese kasingimiko kaje kukapandele ku banu, ku bimunga nambe ku bizibukiso bya lifuti ndi? Yehova ikeye itunapande kusingimika manene kutubakana cuma coshe-coshe. Co lalo twakulahela ngwetu ikeye lika akamanesa bukalu bwoshe bubali na kuliwana nabwo banu mu kaye.
-
Cilitombola nebi biyendeka Mbimbiliya ndi? Tunapande kukala na futisi yaibwa.
5. Kwaseni bakweni mangana basingimike bimwakulahela
Simbu imo kunasa kupwa kwakukalu kubyanena bakwetu baje batushongangeya ngwabo tulikwatasane nabo mu kulinga cilika cije kucizibisa Yehova kubwaha. Weni mbunge na kuwana ngila yaibwa ya kubalekelamo bimwakulahela. Kengeni VIDIO mangana mumone cakumwenako cije cimwesa mumwasa kulingila ngoco.
Tandeni Mateo 7:12, na kusimutwiya ha bihula binatako:
-
Kwesekesa nou mukanda, kuma munapande kuleka babushoko bweni baje kubapwile Bakaleho ngweni kubapandele kulinga cilika cimo ndi?
-
Bika bimwasa kulinga mangana mumwese babushoko bweni ngweni mwabazema nameme kumulikwatasana nabo mu kulinga cilika cimo?
6. Yehova ashaka ngwendi tupwe ba kubwahelela
Yehova ashaka ngwendi tuwane simbu ya kulishubulwisa hamo na babusamba na babushoko bwetu. Tandeni Muka-kwambulula 8:15, na kusimutwiya ha cihula cinatako:
-
Ou mukanda umwesa bati ngwawo Yehova ashaka ngwendi tupwe ba kubwahelela?
Yehova ashaka ngwendi bangamba bendi bawane simbu ya kulishubulwisa. Kengeni VIDIO ije imwesa byuma bikakala ku biwano bya mafuti.
Tandeni Ngalatiya 6:10, na kusimutwiya ha bihula binatako:
-
Kuma kulikwatasana mu kulinga bilika bya kutsimana kukekwo kumwesa ngwabo tuli na kulingila bakwetu byuma byabibwa ndi?
-
Bika bimilingisa mupwe ba kubwahelela, kwana mukweni bwana mwafwa ya kulingila lika cilika, indi kumwana kutundilila kwisi ya mbunge?
-
Bakaleho babangi bisimbu bimo bakalingila bana babo bilika na kubana bwana. Nga muli na bana, byuma muka byabibwa bimwasa kubalingila?
BAMO BAKENDEKA NGWABO: “Indi cilika catunda haka indi haka, bukalu bwahi. Cakama kuunalishubulwisa lika na babusamba na babushoko bwobe.”
-
Yeni mumona bati?
SIMPI YAKAMA
Yehova ashaka ngwendi tuwane simbu ya kukala hamo na babusamba na babushoko na kulishubulwisa. Oloni kashaka ngwendi tulikobelese mu bilika bije kubimuzibisa kubwaha ku mbunge.
Kwitulukamo
-
Bihula muka bitunapande kulihula mangana tumone indi cilika cizibisa Yehova kubwaha?
-
Tukwasa bati babusamba na babushoko bwetu bazibisise byuma bitulingisa tujeneke kulikwatasana nabo mu cilika cimo?
-
Tuzibuka bati ngwetu Yehova washaka ngwendi tupwe ba kubwahelela?
WANENI BIKWABO
Bilika bimo bije kubesi kulinga baka-Kilistu.
“Mwafwa Bika Bakaleho ba Yehova Kubesi Kulinga Bilika Bimo?” (Ñanda ya ha webusaiti)
Byuma biwana bije bikatulingisa tujeneke kulinga bilika bya kwanuka litangwa lyasemukile munu.
Teleni banike bazema Yehova mubasa kumuzibisila kubwaha nga kuli bilika bya ha simbu ya kuhwima.
Baka-Kilistu babangi kubesi kulinga cilika ca Kilisimasi. Kujeneka kulinga eci cilika kukabalingisa balizibe bati?
“Bawanene Cuma ca Seho Manene” (Kaposhi ka Kukengela ka December 1, 2012)
a Taleni Biñanda bya Kushongo 5 mangana mumone bimwasa kulinga nga bakweni balinga cilika cije kucilitombola nebi biyendeka Mbimbiliya.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
