CILONGESA 49
Bika Bikwasa Naanga Yeni Ipwe ya Kubwahelela?—Mutamba 1
Cambato na shombolwa bakakulahela ngwabo batwalelelaho kupwa ba kubwahelela. Co basa bene kulinga ngoco. Baka-Kilistu baje baneshwala mu bulo, baje banapangesa binangulo bya mu Mbimbiliya bazibuka ngwabo baje banalyambata basa kutwalelelaho kupwa ba kubwahelela.
1. Binangulo muka bya mu Mbimbiliya bibanapande kukabangeya banalume baje banambata?
Yehova nangula munalume kupwa mutwe wa naanga. (Tandeni Efeso 5:23.) Co ashaka ngwendi munalume alinge byuma bije bikwasa naanga. Mbimbiliya inanangula banalume ngwayo: ‘Twaleleleniho kuzema banakazi beni.’ (Efeso 5:25) Awa majwi alumbununa bika? Munalume uje wazema munakazi wendi akamulingi mwamubwa, ipwe ku njibo nambe ku mbunga. Akamunyungilila na kulinga mwoshe mwasela kumukwasa ku mubila na mu byuma byeka. (1 Timateo 5:8) Maneneni, akakwasa munakazi wendi akanyamese busamba bwendi na Yehova. (Mateo 4:4) Cakumwenako, napande kulombela na kutanda Mbimbiliya na munakazi wendi. Nga munalume anyunga mwamubwa munakazi wendi, co busamba bwendi na Yehova bukanyama.—Tandeni 1 Petulu 3:7.
2. Binangulo muka bya mu Mbimbiliya bibanapande kukabangeya banakazi baje banashomboka?
Mbimbiliya ngwayo munakazi ‘napande kusingimika manene munalume wendi.’ (Efeso 5:33) Asa kulinga bati ngoco? Napande kusinganyekesesa ha bifwa byabibwa bya munalume wendi na kumona kulifwita kwendi omwo akwasa naanga. Napande lalo kukundwiya byuma byanayongola kulinga munalume wendi na kusimutwiya nendi mwamubwa na kumwendeka mwamubwa ku bakwabo nameme kalemesele Yehova.
3. Baje bali mu bulo basa kukanyamesa bati bulo bwabo?
Mbimbiliya ngwayo baje banalyambata ‘banapu situ imolika.’ (Mateo 19:5) Ngeci, banapande kupangela hamo mangana cizemo cabo keti citonole. Banapande kuwana simbu ya kukala hamo na kusimutwiya na kulileka mubali na kulizibila. Kubapandele kutabesa cuma coshe-coshe nambe munu woshe-woshe kupwa wa seho manene kutubakana muka-limbo lyabo, kubanga Yehova lika. Co lalo kubapandele kulizilila na munu weka mu kutubakanesa.
TONDESESENI
Binangulo muka bya mu Mbimbiliya byasa kukanyamesa bulo bweni?
4. Banalume, zemeni banakazi beni na kubanyunga mwamubwa
Mbimbiliya ngwayo ‘banalume banapande kuzema banakazi babo ngwe mubazemena mibila yabo.’ (Efeso 5:28, 29) Bika byalibungilamo? Kengeni VIDIO na kusimutwiya ha cihula cinatako.
-
Munalume asa kumwesa bati ngwendi wazema munakazi wendi, co lalo wamwaka mbunge?
Tandeni Kolose 3:12, na kusimutwiya ha cihula cinatako:
-
Munalume asa kumwesa bati ebi bifwa mu bulo?
5. Banakazi, zemeni banalume beni na kubasingimika
Mbimbiliya ngwayo munakazi napande kusingimika munalume wendi nameme kalemesele Yehova. Tandeni 1 Petulu 3:1, 2, na kusimutwiya ha bihula binatako:
-
Nga munalume weni kalemesele Yehova, tukulahela ngwetu mushaka ngweni nendi alemese Yehova. Bika byasa kumukwasa, kumwambulwila simbu yoshe, indi kukala na bifwa byabibwa na kumusingimika? Mwafwa bika?
Munalume na mukanazi wendi basa kwangula mwamubwa byakulinga nga bakala hamo na kusimutwiya. Oloni bisimbu bimo, biyongola bya munakazi binasa kuliseza na biyongola bya munalume wendi. Nga mukemwo, co munakazi napande kwendeka biyongola byendi mu kasingimiko. Oloni napande kwanuka ngwendi Yehova nana munalume nzili ya kwangula byuma bije bikwasa naanga. Ngeci, munakazi napande kulikwatasana na munalume wendi. Nga alinga ngoco, co naanga yoshe ipwa ya kubwahelela. Tandeni 1 Petulu 3:3-5, na kusimutwiya ha cihula cinatako:
-
Yehova akalizibi bati nga munakazi asingimika munalume wendi?
6. Mwasa kuhyana bukalu bumunasa kuliwana nabwo mu bulo bweni
Kukwesi bulo bwa kulumbunuka. Ngeci, baje bali mu bulo banapande kulikwatasana mangana bahyane bukalu bubanasa kuliwana nabwo. Kengeni VIDIO na kusimutwiya ha bihula binatako.
-
Kwesekesa na vidio, bika bimwesa ngwabyo cizemo ca uje munalume na munakazi wendi cashangumukile kuzeya?
-
Bika bibalingile mangana bakanyamese lalo bulo bwabo?
Tandeni 1 Kolinte 10:24 na Kolose 3:13. Munima ya kutanda cisoneka na cisoneka, simutwiyeni ha cihula cinatako:
-
Cinangulo cili oku ku mukanda casa kukanyamesa bati bulo?
Mbimbiliya ngwayo tunapande kulisingimika umo na mukwabo. Oku kunambateselela kulinga bakwetu mwamubwa, na kubasingimika. Tandeni Loma 12:10, na kusimutwiya ha bihula binatako:
-
Kuma umo mu bulo napande kubandamena ngwendi mukwabo amusingimike tahi ndi? Mwafwa bika?
BAMO BAKENDEKA NGWABO: “Cizemo cange na muka-limbo lyange cinatonola.”
-
Mwasa kubakwasa bati kupangesa Mbimbiliya?
SIMPI YAKAMA
Munalume na munakazi wendi basa kupwa ba kubwahelela mu bulo nga balizema umo na mukwabo na kulisingimika na kupangesa binangulo bya mu Mbimbiliya.
Kwitulukamo
-
Bika byanapande kulinga munalume mangana bapwe ba kubwahelela mu bulo bwabo?
-
Bika byanapande kulinga munakazi mangana bapwe ba kubwahelela mu bulo bwabo?
-
Nga muli mu bulo, cinangulo muka ca mu Mbimbiliya cije cimikwasa mukanyamese bulo bweni?
WANENI BIKWABO
Bika bimikwasa mangana mukale mwamubwa mu naanga?
Kengeni vidio ya mwaso ije imwesa seho ya kukabangeya binangulo bya Njambi mu bulo.
Kulyaka kwisi ya munalume kulumbununa bika?
Munalume umo na munakazi wendi bahyanene bati bukalu bwabo kwambateselela na bukalu bwa kutsiya bulo bwabo?
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
