CILONGESA 50
Bika Bikwasa Naanga Yeni Ipwe ya Kubwahelela?—Mutamba 2
Bana bapwa bwana bwa kutunda kuli Yehova, co ashaka ngwendi bisemi bakwate obu bwana na maboko abali. Yehova nana bisemi binangulo byabibwa bije bibakwasa balele mwamubwa bana babo. Binangulo bya Yehova bikwasa lalo bana balinge byuma bije bilingisa naanga ipwe ya kubwahelela.
1. Binangulo muka byanana Yehova ku bisemi?
Yehova ashaka ngwendi bisemi bazeme bana babo na kuwana simbu yaingi ya kukala hamo nabo. Co lalo ashaka ngwendi bisemi banyungilile bana babo na kupangesa Mbimbiliya omwo babalongesa. (Visimo 1:8) Naleke bisemi ngwendi: ‘Leleni bana beni mu kunangula kwa Yehova.’ (Tandeni Efeso 6:4.) Yehova abwahelela nga bisemi bapangesa binangulo byendi omwo balela bana babo na kujeneka kunungulwila eci cipangi ku munu weka.
2. Binangulo muka byanana Yehova ku bana?
Yehova naleke bana ngwendi: ‘Ononokeni bisemi beni.’ (Tandeni Kolose 3:20.) Nga bana bononoka bisemi babo, co bazibisa Yehova kubwaha ku mbunge hamolika na bisemi babo. (Visimo 23:22-25) Yesu namwesa bana mwanja waubwa. Nameme wapwile wa kulumbunuka, oloni wononokele na kusingimika bisemi bendi baje kubapwile ba kulumbunuka.—Luka 2:51, 52.
3. Mwasa kukanyamesa bati busamba bweni na Njambi ha kupwa naanga?
Nga mu bisemi, tukulahela ngwetu mushaka ngweni bana beni nabo bazeme Yehova ngwe mumwamuzemena. Mwasa kubakwasa bati? Mbimbiliya ngwayo: ‘Longeseni bana beni mashiko a Yehova na kuwasimutwiya omwo muli mu binjibo byeni, nambe muli na kwenda mu ngila, nambe ha simbu ya kulala nambe omwo mupanga.’ (Kwituluka mu Mashiko 6:7) Bisemi bazibuka ngwabo banapande kwilukila-ilukila kuleka bana babo byuma bimo mangana babyanuke. Ngeci, banapande kulongesa bana babo bya Yehova simbu yoshe. Calumingo na calumingo, banapande kuwanako simbu ya kulemesela hamo Njambi mu naanga. Nameme kumwesi na bana, munapande kuwanako simbu ya kulilongesa Lijwi lya Njambi calumingo na calumingo.
TONDESESENI
Bika byasa kukwasa naanga ikale mwamubwa na kupwa ya kubwahelela?
4. Longeseni bana beni mu cizemo
Kulela mwana keti kwakwasi. Mbimbiliya imikwasa bati? Tandeni Yakomba 1:19, 20, na kusimutwiya ha bihula binatako:
-
Bisemi basa kumwesa bati ngwabo bazema bana babo omwo basimutwiya nabo?
-
• Mwafwa bika cisemi kapandele kunangula munendi oku nalubala? a
5. Nyungilileni bana beni
Bisemi, munapande kulongesa bana beni biñanda bya kulilala mangana mubanyungilile, nameme kulinga ngoco kunasa kuzibisa shwamwa. Kengeni VIDIO na kusimutwiya ha bihula binatako.
-
Mwafwa bika bisemi bamo kukabakaluwila kusimutwiya na bana babo ha ñanda ya kulilala?
-
Bika binakwasa bisemi bamo basimutwiye na bana babo ha ñanda ya kulilala?
Ngwe muyendekelele Mbimbiliya, bubi buli na kulibwezelela muno mu kaye ka Satana. Tandeni 2 Timateo 3:1, 13, na kusimutwiya ha cihula cinatako:
-
Baka-bubi babanendeka ha vesi 13, banambateselela na baje bakalilala na banike. Ngeci, mwafwa bika bisemi banapande kulongesa bana babo biñanda bya kulilala nomu mubanasa kulinyungililamo?
Muzibuka ndi?
Bakaleho ba Yehova bali na bikwata byabingi bije byasa kukwasa bisemi balongese bana babo biñanda bya kulilala, nomu mubasa kulinyungililamo. Cakumwenako, mwasa kupangesa:
-
Vidio ya Nyungilileni bana beni
-
Libulu lya Itute ku Muluti Yomutuna, capita 10 na 32
-
“Ñanda ya mutwe wa “Longeseni Muneni bya Ñanda ya Kulilala” (Toneni! ya Na. 5 2016)
6. Singimikeni bisemi beni
Bana basa kusingimika bisemi babo nga basimutwiya nabo mwamubwa. Kengeni VIDIO na kusimutwiya ha bihula binatako.
-
Mwafwa bika mwana napande kusimutwiya mwamubwa na bisemi bendi?
-
Bana basa kusimutwiya bati na bisemi babo mu kasingimiko?
Tandeni Visimo 1:8, na kusimutwiya ha cihula cinatako:
-
Mwana napande kulinga bati nga bisemi bendi bamunangula?
7. Lemeseleni hamo Yehova mu naanga
Bakaleho ba Yehova bakawana simbu ya kulemesa Yehova calumingo na calumingo mu binaanga byabo. Bika bimwasa kulinga ha simbu ya kulemesa kwa naanga? Kengeni VIDIO na kusimutwiya ha bihula binatako.
-
Bika bikwasa naanga ilinge Kulemesa kwa Naanga simbu yoshe?
-
Bika byanasa kulinga cisemi mangana naanga yendi ilikuwe na kuwana bukwasi ku kulemesa kwa naanga?—Taleni cikupulo ca kulibanga muno mu cilongesa.
-
Bika byasa kulingisa kumikaluwile kulilongesa hamo mu naanga?
Kusañulu mu Isalele, Yehova watondele ngwendi binaanga biwane simbu ya kusimutwiya na kulilongesa bisoneka. Tandeni Kwituluka mu Mashiko 6:6, 7, na kusimutwiya ha cihula cinatako:
-
Mwasa kupangesa bati cinangulo cili oku ku mukanda?
Bimwasa kulinga ha kulemesa kwa naanga:
-
Kulibwahesela biwano.
-
Kutanda na kusimutwiya ha ñanda imo ya mu Mbimbiliya ije yeta baka-naanga yeni ku bimbunge.
-
Nga muli na banike babandondo, mwasa kulinga daunilodi nambe kupulinta byuma bimo bya banike bije bili ha jw.org.
-
Nga muli na banike ba kukolako, mwasa kusimutwiya nabo ha ñanda imo ili ha jw.org ije yasa kubakwasa.
-
Kwehako bweho bwa biñanda bimo bya mu Mbimbiliya na bana beni.
-
Kukenga vidio imo ili ha jw.org na kusimutwiyaho.
BAMO BAKENDEKA NGWABO: “Twazezama na bipangi, kutwesi na simbu ya kulilongesa Mbimbiliya na bana betu.”
-
Yeni mumona bati?
SIMPI YAKAMA
Yehova atonda ngwendi bisemi bazeme bana babo, babalongese na kubanyungilila. Co lalo ashaka ngwendi bana basingimike bisemi babo na kubononoka. Ashaka lalo ngwendi binaanga biwane simbu ya kumulemesa.
Kwitulukamo
-
Bisemi basa kulongesa bati bana babo na kubanyungilila?
-
Bana basa kumwesa bati bisemi babo kasingimiko?
-
Bubwa muka buli mu kulemesela hamo Yehova mu naanga calumingo na calumingo?
WANENI BIKWABO
Bika bikwasa bana beni mangana bakole mwamubwa?
“Byuma 6 Bimunapande Kulongesa Bana Beni” (Toneni! ya Na. 2 2019)
Binangulo muka bya mu Mbimbiliya bije bimikwasa munyunge mwamubwa bisemi beni baje banakulubala?
“Bika Biyendeka Mbimbiliya ha Kunyunga Bisemi Baje Banakulubala?” (Ñanda ya ha webusaiti)
Bika byakwasele cisemi umo azibuke mwakulelela bana bendi mwamubwa?
Bika bikwasa bisemi ba banalume bakanyamese busamba bwabo na bana babo ba banalume?
“Bisemi ba Banalume Basa Kukanyamesa Bati Busamba Bwabo na Bana Babo ba Banalume?” (Kaposhi ka Kukengela ka November 1, 2011)
a Mu Mbimbiliya, lijwi lya “kunangula” linambateselela kulongesa, kutwamenena na kwolola. Kulilumbununa kulinga mwamubi munu. —Visimo 4:1.
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
