Yesu ikeye Mutwe wa cikungulukilo. (Efeso 5:23) Ano matangwa, Yesu ali na kutwamenena baka-kumukabangeya nameme ali mwilu. Ali na kupangesa “ndungo wa kulongwa na kunyanyama.” (Tandeni Mateo 24:45.) Yesu ikeye nangula ou “ndungo” na kumwana nzili ya kupwamo. Nameme ngoco, anga napu ndungo ya Kilistu, co ali na kupangela bandolome ba Kilistu. Ou ndungo napu iya? Co ali na kutukwasa bati?

1. Iya napu “ndungo wa kulongwa na kunyanyama”?

Kushwa lika kusañulu, Yehova napangesa munu nambe cibunga cacindondo ca banalume mu kutwamenena banu bendi. (Malakiya 2:7; Vahevelu 1:1) Munima ya kutsa kwa Yesu, tupositolo na bakulunu mu Yelusalema bakebo bakele na kutwamenena. (Vilinga 15:2) Mu ngila imolika, cibunga cacindondo ca bakulunu ano matangwa cikeco cili na kwana banu ba Yehova byakulya bya ku sipilitu na kutwamenena cipangi ca kwambulula. Eci cibunga bakacitumbula ngwabo Cibunga ca Kutwamenena ca Bakaleho ba Yehova. Co cikeco cinapu ‘ndungo wa kulongwa na kunyanyama yanangula Yesu.’ (Mateo 24:45a) Boshe bali omu mu cibunga bapwa baka-Kilistu ba kubwabesa, baje banabandamena kukayula hamo na Kilistu mwilu.

2. Byakulya muka bya ku sipilitu byali na kutwana ndungo wa kulongwa na kunyanyama?

Yesu wendekele ngwendi ou ngamba ‘akana bangamba bakwabo byakulya byabo ha simbu yaibwa.’ (Mateo 24:45b) Byakulya bya ku mubila bikakanyamesa mibila yetu na kuilingisa ilikangule. Mu ngila imolika, byakulya bya ku sipilitu bije binapu binangulo bya kutunda mu Lijwi lya Njambi bikatukwasa tutwaleleleho kupwa ba kulongwa kuli Yehova na kulinga cipangi catusezelele Yesu. (1 Timateo 4:6) Tukatambula ebi byakulya bya ku sipilitu ku biwano bya cikungulukilo, bya citingitingi na bya mutambela. Co lalo tukabitambula kwitila mu mabulu aje anemana ha Mbimbiliya na mavidio aje atukwasa kuzibisisa cizango ca Njambi na kutukwasa tukanyamese busamba bwetu nendi.

 TONDESESENI

3. Banu ba Yehova banapande kulikwatasana

Yesu ikeye ali na kutwamenena Cibunga ca Kutwamenena cije cili na kutwamenena cipangi cibali na kulinga Bakaleho ba Yehova. Co mukemwo mukwapwililile na mu simbu ya tupositolo. Kengeni VIDIO.

Tandeni 1 Kolinte 14:33, 40, na kusimutwiya ha cihula cinatako:

• Ou mukanda umwesa bati ngwawo Yehova ashaka ngwendi Bakaleho bendi balikwatasane?

4. Ndungo wa kulongwa ali na kutwamenena cipangi ca kwambulula

Cipangi ca kwambulula cikeco capwile ca seho manene kuli baka-Kilistu ba kulibanga. Tandeni Vilinga 8:14, 25, na kusimutwiya ha bihula binatako:

• Beya bakele na kutwamenena cipangi ca kwambulula mu simbu ya baka-Kilistu ba kulibanga?

• Petulu na Yowano balingile bika omwo tupositolo bakwabo babalekele byakulinga?

Cipangi ca kwambulula cikeco cipangi ca seho manene cibali na kutala baje bali mu Cibunga ca Kutwamenena. Kengeni VIDIO.

 Yesu wamwesele seho ya cipangi ca kwambulula. Tandeni Mako 13:10, na kusimutwiya ha bihula binatako:

• Mwafwa bika Cibunga ca Kutwamenena camona cipangi ca kwambulula kupwa ca seho manene?

• Bika bitutondela ngwetu “ndungo wa kulongwa na kunyanyama” atale mucendela cipangi ca kwambulula mu kaye koshe?

5. Ndungo wa kulongwa ali na kutwamenena banu ba Njambi

Cibunga ca Kutwamenena cikeco cili na kutwamenena banu ba Njambi mu kaye koshe. Cikatwamenena bati? Tusimutwiyeni mucakele na kupangela cibunga ca kutwamenena mu simbu ya baka-Kilistu ba kulibanga. Tandeni Vilinga 15:1, 2, na kusimutwiya ha bihula binatako:

• Bika byanenele mpindangano mukati ka baka-Kilistu bamo ba kulibanga?

• Paulu na Mbanambase na bakwabo batwalele kuli ei ñanda?

Tandeni Vilinga 15:12-18, 23-29, na kusimutwiya ha cihula cinatako:

• Bika bibalingile baje bakele mu cibunga ca kutwamenena ca kulibanga mangana Njambi abatwamenene simbu kanda bangule byakulinga?—Taleni vesi 12, 15, na 28.

Tandeni Vilinga 15:30, 31 na 16:4, 5. Kutundaho, simutwiyeni ha bihula binatako:

• Bika bibalingile baka-Kilistu ba kulibanga mubazibile bicabalekele cibunga ca kutwamenena?

• Yehova wababezikisile bati mwafwa ya kwononoka?

Tandeni 2 Timateo 3:16 na Yakomba 1:5. Kutundaho, simutwiyeni ha cihula cinatako:

• Bika bicikalingi Cibunga ca Kutwamenena simbu kanda ciyongole byakulinga?

 SIMPI YAKAMA

Cibunga ca Kutwamenena cikeco cinapu “ndungo wa kulongwa na kunyanyama,” co Kilistu ikeye nacangula. Cikeco cili na kutwamenena banu ba Njambi mu kaye koshe na kubana byakulya bya ku sipilitu.

Kwitulukamo

• Iya nangula “ndungo wa kulongwa na kunyanyama”?

• Cibunga ca Kutwamenena cili na kutukwasa bati?

• Kuma mwakulahela ngweni Cibunga ca Kutwamenena cikeco cinapu “ndungo wa kulongwa na kunyanyama” ndi?