CILONGESA 57
Bati Nga Mwalingi Bubi Bwakama?
Bisimbu bimo munasa kusebuka nameme mwazema Yehova, co lalo mukalingi mwoshe mumukasela mangana keti mulinge byuma bije kashakele. Bubi bumo bwapwa bwakama kutubakana bukwabo. (1 Kolinte 6:9, 10) Nga mwalingi bubi bwakama, anukeni ngweni Yehova anga wamizema, co ashaka kumikonekela na kumikwasa.
1. Bika bitunapande kulinga mangana Yehova atukonekele?
Baje bazema Yehova bakalizibi kubihya ku mbunge nga bananguka ngwabo banalingi bubi bwakama. Oloni majwi a Yehova akabakwasa. Yehova ngwendi: ‘Nambe bubi bweni bubenga ngengu, oloni bukatoka to ngwe mema a kukonda.’ (Isaya 1:18) Nga twatenguluka mu busunga, Yehova atukonekela. Twasa kulinga bati ngoco? Nga tunalingi bubi, tunapande kwecela bubi butunalingi na kulomba Yehova ngwetu atukonekele. Co lalo tunapande kulinga mwoshe mutwasela mangana tumbile kuti bisinganyeka byabibi nambe kalingolingo kaje kanatulingisile tulinge obwo bubi. Kutundaho, tunapande kulinga mwoshe mutwasela mangana tuyoye mu kulitombola na mashiko a Yehova.—Tandeni Isaya 55:6, 7.
2. Yehova akapangesa bati bakulunu mu kutukwasa nga tunalingi bubi?
Nga tunalingi bubi bwakama, Yehova ashaka ngwendi ‘tuleke bakulunu ba cikungulukilo.’ (Tandeni Yakomba 5:14, 15.) Bakulunu bazema Yehova hamolika na bimanga bendi. Co Yehova akabatwamenena mangana batukwase tukanyamese busamba bwetu nendi.—Ngalatiya 6:1.
Bakulunu basa kutukwasa bati nga tunalingi bubi bwakama? Bakulunu babali nambe batatu bapangesa bisoneka mangana batunangule. Co lalo banasa kutulekako byuma bimo bije byasa kutukwasa na kutushongangeya mangana keti twilukile kulinga bubi butunalingi. Basa lalo kutwecelesa kulingako bipangi bimo mu cikungulukilo, kweta noho hatukakanyamesela lalo busamba bwetu na Yehova. Nga munu nalingi bubi bwakama, co lalo katengulukile, bakulunu banasa kumutundisa mu cikungulukilo.
TONDESESENI
Mumwesa bati ngweni mwakandelela kuli Yehova ha kumikonekela nga munalingi bubi bwakama?
3. Kulitabela bubi butunalingi kutukwasa
Bubi bwoshe bwalinga munu buzibisa Yehova kubihya ku mbunge. Ngeci, tunapande kulitabela kuli ikeye nga kuli bubi bumo butunalingi. Tandeni Myaso 32:1-5, na kusimutwiya ha cihula cinatako:
-
Mwafwa bika tunapande kulitabela kuli Yehova bubi butunalingi kutubakana kubushweka?
Munima ya kulitabela kuli Yehova bubi butunalingi, tunapande lalo kuleka bakulunu mangana batukwase tupangele lalo Yehova mu kubwahelela. Kengeni VIDIO na kusimutwiya ha cihula cinatako.
-
Kwesekesa na vidio, bakulunu bakwasele bati Canon mangana busamba bwendi na Yehova bukanyame lalo?
Tunapande kwendeka busunga omwo tuleka bakulunu bubi butunalingi mwafwa batukwasa. Tandeni Yakomba 5:16, na kusimutwiya ha cihula cinatako:
-
Nga twendeka busunga omwo tuleka bakulunu bubi butunalingi, kubapwila bati kwakwasi kutukwasa?
Lekeni bakulunu bubi bumunalingi mangana Yehova amikwase
4. Kutundisa munu mu cikungulukilo kwa seho
Munu uje nalingi bubi bwakama, co lalo shendi kukabangeya binangulo bya Yehova, bamutundisa mu cikungulukilo. Co kutwapandele kulikwatasana nendi nambe kusimutwiya nendi. Tandeni 1 Kolinte 5:6, 11 na 2 Yowano 9-11. Kutundaho, simutwiyeni ha cihula cinatako:
-
Musima waundondo unasa kufutunwisa mukasha wa likende. Bukalu muka bwasa kutunda mu kulikwatasana na munu uje natundu mu cikungulukilo?
Banu babangi babakatundisa mu cikungulukilo bakeluka. Binangulo bibakabana bikabakwasa balilule nameme bakazibi kubabala ku mbunge ha simbu ibakabanangula. (Myaso 141:5) Kengeni VIDIO na kusimutwiya ha cihula cinatako.
-
Kwesekesa na vidio, kutunda mu cikungulukilo kwakwasele bati Sonja?
Kutundisa munu mu cikungulukilo . . .
-
kumwesa bati kasingimiko kuli Yehova?
-
kumwesa bati ngwabo Yehova watuzema, co lalo akatuzibisisa?
5. Yehova atukonekela nga tutenguluka
Cakumwenako cendekele Yesu citukwasa tuzibisise mwakalizibila Yehova nga munu uje nalingi bubi atenguluka. Tandeni Luka 15:1-7, na kusimutwiya ha cihula cinatako:
-
Eci cakumwenako cimilongesa bika hali Yehova?
Tandeni Ezekiyele 33:11, na kusimutwiya ha cihula cinatako:
-
Kutenguluka ku bubi kunambateselela bika?
Ngwe mwa kanyungi wamubwa, Yehova waka mbunge bimanga bendi
BAMO BAKENDEKA NGWABO: “Nga njileka bakulunu bubi bunjinalingi, co banjitundisa mu cikungulukilo.”
-
Mwasa kukwasa bati munu aliziba ngoco?
SIMPI YAKAMA
Nga tunalingi bubi bwakama, co twalilula na kutenguluka, Yehova asa kutukonekela.
Kwitulukamo
-
Mwafwa bika tunapande kulitabela kuli Yehova bubi butunalingi?
-
Bika bitunapande kulinga mangana Yehova atukonekele nga tunalingi bubi?
-
Bika bitunapande kulekela bakulunu nga tunalingi bubi bwakama?
WANENI BIKWABO
Nangukeni omwo munalume umo walimwenenene ngozi ya Yehova ije ibanendeka ku mukanda wa Isaya 1:18.
Kutundisa munu mu cikungulukilo kukwasa bati boshe?
Mwasa kulumbunwina bati munu uje keti Mukaleho seho ya kutundisa munu mu cikungulukilo?
“Kuma Bakaleho ba Yehova Bakayengula Baje Babakele na Kukunguluka Nabo Ndi?” (Ñanda ya ha webusaiti)
Tandeni ñanda ya “Njapandele Kwiluka Kuli Yehova” mangana mumone byalingisile munalume umo watundile mu busunga alizibe ngwendi Yehova namukoko lalo.
“Mbimbiliya Ikatengulula Buyoye bwa Banu” (Kaposhi ka Kukengela ka April 1, 2012)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
