CILONGESA 58
Twaleleleniho Kupwa ba Kulongwa Kuli Yehova
Baka-Kilistu ba busunga kubashaka kutabesa munu nambe cuma coshe-coshe cibonowese kulemesa mwamubwa Yehova. Co twakulahela ngwetu neni kumushaka ngoco. Yehova akamono kulongwa kweni. (Tandeni 1 Mizimbu 28:9.) Byeseko muka bitwasa kuliwana nabyo bije byasa kutwonowesa kupwa ba kulongwa kuli Yehova? Co twasa kubihyana bati?
1. Bakwetu basa kutwonowesa bati kupwa ba kulongwa kuli Yehova?
Banu bamo banasa kumilingisa mwecele kupangela Yehova. Beya basa kumilingisa ngoco? Banu bamo baje banatundu mu busunga bakatengulukila munga ya Njambi, co bakendeka biñanda bya makuli mangana bazeyese likulahelo lyetu. Co lalo bantwama bamo ba bulombelo bakashandola biñanda bya makuli hali yetu mangana bongumune bamo na kubatundisa mu busunga. Ngeci, kutwapandele kulinga bimata na baka-kutengulukila, kutanda mabulu abo, kuya ha mawebusaiti abo nambe kukenga mavidio abo. Yesu wendekele bya baje bashaka kutwonowesa kupangela Yehova ngwendi: “Beceleni. Banapu bantwama ba tupuputwa. Ngeci, nga kapuputwa atwamenena mukwabo kapuputwa, boshe babali bawila mu bwina.”—Mateo 15:14.
Batico nga munu ituzibuka alikela kulikwatasana na Bakaleho ba Yehova? Oku kunasa kutuzeyesa, maneneni nga owo munu kabushoko nambe kabusamba wa ha mbunge. Oloni tunapande kupwa ba kulongwa kuli Yehova keti ku munu nambe ku cuma coshe-coshe. (Mateo 10:37) Ngeci, tunapande kwononoka mashiko a Yehova aje amwesa ngwawo kutwapandele kulikwatasana na banu ba cifwa eci.—Tandeni 1 Kolinte 5:11.
2. Byuma muka bitunasa kwangula kulinga bije bitwonowesa kupwa ba kulongwa kuli Yehova?
Kuzema Yehova kutulingisa tujeneke kulikwatasana na bulombelo bwa makuli mu ngila yoshe-yoshe. Kutwapandele kulinga ngoco ipwe ku bipangi byetu, bibunga bitunasa kulikwatasana nabyo, nambe byuma byoshe-byoshe. Yehova natuleke ngwendi: ‘Tundeni kuli Mbambilone Wakama, eni banu bange.’—Kujombolola 18:2, 4.
TONDESESENI
Bika bimwasa kulinga mangana banu keti bamyonowese kupwa ba kulongwa kuli Yehova? Kujeneka kulikwatasana na Mbambilone Wakama kumwesa bati ngwabo mwapwa ba kulongwa kuli Yehova?
3. Nyanyameni na balongesi ba makuli
Bika bitunapande kulinga nga tuziba banu bendeka byuma byabibi ha munga ya Yehova? Tandeni Visimo 14:15, na kusimutwiya ha cihula cinatako:
-
Mwafwa bika kutwapandele kutaba nambe kukulahela byoshe bituziba?
Tandeni 2 Yowano 10, na kusimutwiya ha bihula binatako:
-
Tunapande kumona bati baka-kutengulukila?
-
Nameme kutwasa kulikwatasana na baka-kutengulukila mesho na mesho, mu bingila muka mutwasa kulikwatasanena nabo?
-
Musinganyeka ngweni Yehova aliziba bati nga twaka manene mbunge ku biñanda bije byendeka mwamubi hali ikeye na ha munga yendi?
4. Twaleleleniho kupwa ba kulongwa kuli Njambi nga kuli umo nalingi bubi
Bika bimunapande kulinga nga kuli umo mu cikungulukilo nalingi bubi bwakama? Tandeni Valevi 5:1 mangana mumone lishiko lyanene Njambi kuli Baisalele.
Kwesekesa nou mukanda, munapande kuleka bakulunu bimuzibuka nga kuli umo nalingi bubi bwakama. Oloni simbu kanda mulinge ngoco, cibwaha manene nga muleka tahi owo nalingi bubi ngweni alyambulule ku bakulunu. Nga abyana kulinga ngoco, kupwa ba kulongwa kuli Yehova kumilingisa muleke bakulunu. Kulinga ngoco kumwesa bati ngwabo . . .
-
mwazema Yehova Njambi?
-
mwazema owo munu nalingi bubi?
-
mwazema bakweni mu cikungulukilo?
Kwaseni mukweni muka-Kilistu uje nalingi bubi
5. Tundeni kuli Mbambilone Wakama
Tandeni Luka 4:8 na Kujombolola 18:4, 5. Kutundaho, kumbululeni bihula binatako:
-
Ku bulombelo kumwakele bacimitanda ngwabo mu banu babo ndi?
-
Kuma mwalikwatasana na cibunga nambe munga ije ili na kukundwiya bulombelo bwa makuli ndi?
-
Cipangi ceni cili na kukundwiya bulombelo bwa makuli ndi?
-
Kuli byuma bimo bimunapande kwecela mangana keti mulikwatasane na bulombelo bwa makuli ndi?
-
Nga mukemwo, bika bimunapande kulinga?
Mu byuma byoshe bimwangula kulinga, anguleni byuma bije bimilingisa mukale na citakutaku ca kujela, co lalo bije bimwesa ngwabyo mu ba kulongwa kuli Yehova.
Mulinga bati nga bamilomba ngwabo mulambule mulambu uje ukwasa mu cipangi cimo ca kukwasa banu, cije cibuli na kutwamenena bulombelo bumo bwa makuli?
BAMO BAKENDEKA NGWABO: “Njinapande kuzibuka bibali na kwendeka baka-kutengulukila mangana njizibuke mwakwimanena busunga.”
-
Kuma kulinga ngoco kwakubwa ndi? Mwafwa bika?
SIMPI YAKAMA
Nga tushaka kutwalelelaho kupwa ba kulongwa kuli Yehova, kutwapandele kulikwatasana na banu baje kubashaka kupwa ba kulongwa kuli ikeye. Co lalo kutwapandele kulikwatasana na bulombelo bwa makuli mu ngila yoshe-yoshe.
Kwitulukamo
-
Mwafwa bika kutwapandele kukenga, kutanda nambe kutolilila ku biñanda bibakendeka baka-kutengulukila?
-
Bika kutwapandele kulinga kuli baje banalyangununa ku munga ya Yehova?
-
Twasa kwononoka bati cinangulo cije cimwesa ngwaco kutwapandele kulikwatasana na bulombelo bwa makuli?
WANENI BIKWABO
Bika bimunapande kulinga nga kuli banu bamo baje bali na kushandola biñanda bya makuli ha Bakaleho ba Yehova?
“Muli na Bukaleho bwa Kushula Ndi?” (Kaposhi ka Kukengela ka August 2018)
Mwasa kuzibuka bati munga nambe cibunga nambe byuma bije bikundwiya bulombelo bwa makuli?
Bika bibanalingi baka-kulwisa bamo mu kushaka kuzeyesa likulahelo lyetu?
Moneni byalingisile kapilistu umo wa bulombelo bwa Shinto ecele kulikwatasana na bulombelo bwendi. Tandeni ñanda ya “Njinashakezeka Njambi Kushwa ku Bwanike Bwange.”
“Mbimbiliya Ikatengulula Buyoye bwa Banu” (Kaposhi ka Kukengela ka July 1, 2011)
Hamo Mushaka Lalo Ebi
BIHULA BIBAKEHULA MANENE BANU
Cilongesa ca Mbimbiliya Cibakatwamenena Bakaleho ba Yehova Cafwa Bati?
Ha cilongesa ca Mbimbiliya ca bwana cibakatwamenena Bakaleho ba Yehova, mwasa kupangesa Mbimbiliya yoshe-yoshe imushaka. Mwasa kulilongesela hamo na naanga yeni yoshe nambe kulanyako babusamba beni.
